A A A A A
Bible in one year
November 2

Jeremías 51:1-64
1. Tatitojj siwa: “Caldeonacataqui, uqhamaraqui Babilonianquirinacataquisa, mä t'unjir thaywa apayaniraquï.
2. Babilonia marcarusti, uñisirinacapampejj cunjämatejj trigojj thayampi thalsutajja uqhamaracwa thalsuyäjja, marcapsti jan mä jakenwa jaytaraquini. Cuna urutejj uca jach'a aynacht'añap urojj purincani ucapachasti take toketwa juparojj nuwantapjjani.
3. ¡Arco apnaker jakenacasti arconacap waquichasipjjpan! ¡Corazanacapsa uscuntasipjjaracpan! ¡Babilonianquiri waynanacatsti jan qhuyapt'ayasipjjamti; ejercitoparusti k'alpun tucjapjjam!
4. Caldeonacan take orakenacapansti, jakenacajj callenacanwa liwirtapjjani,
5. Israel marcampi, Judá marcampejja nayataquejj nayrakatan jucha lurapcchi ucasa, uqhamaraqui jucha luratanacapampejj marcanacapjja phokhantapcchi ucasa, naya take ch'amani Tatitojja, Israelan Kollan Diosapajja, janiw jupanacarojj apanuccti.
6. “¡Babilonia marcat jaltjjapjjam! ¡Qhitis khespiyaschini ucajj khesppan! ¡Jan jupan juchap laycu jiwapjjamti! Acaw nayan phoksusiña horasajjajja, cunjämarutejj waquisqui uqhamaruw churaraquëjja.
7. Babiloniasti nayan amparajjanjja mä kori copjamänwa, take aca orakpacharu umjayiriraquïnwa. Marcanacasti uca vino umapjjänjja, k'alwa p'eksa muytayaraquïnjja.
8. Ucampisa acatjamatwa Babiloniajj jisc'a jisc'a t'unjat uñjasi. ¡Jichhajj jupatjam jachapjjam! Kollanac chhojjrinacapataquejj apanipjjam, uñjañäni, inacha kollasini.”
9. Babiloniarojj kollanacampi kolljjatatänwa, ucampisa janiw kollasquiti. ¡Pachparu apanucupjjam! Acat sarjjaraquiñäni, sapa maynis marcaparcama, Babilonian jach'a juchanacapasti alajjpachcamaw purjjaraqui, kenayanaccamaw maqhataraqui.
10. Tatituw jiwasan luräwinacasjja khanaru apsu. Jichhajj Sionar sarjjapjjañäni, ucan jact'araquiñäni cuntejj Tatitu Diosasajj jiwasanacataqui lurqui ucanaca.
11. Tatitojj Babilonia marca t'unjañ muni, Media orakenquir reyinacan chuymaparusti uca pachpa t'unjaña amtäwinacwa uscuraqui. Ucaw Tatitun phoksusïwipajja, jupan temploparu cuntejj lurapqui ucanacatjja. ¡Jichhajj flechanacam waquichasipjjam! ¡Escudonacamsa sum catjjarupjjaraquim!
12. ¡Babilonia marcan perkanacaparu nuwantañataquisti chimpunaca churapjjaraquim! ¡Guardianacarusti juc'ampi yapjjatapjjaraquim ch'amanïpjjañapataqui! ¡Uñch'uquirinaca uscupjjaraquim! ¡Imantasisin suyjjatapjjaraquim jupan uñisirinacaparojja! Tatitusti, cuntejj Babilonia marcan utjiri jakenacatac amtcatayna, ucat yatiycaraquïna ucanacwa phokhascaraqui.
13. Jumasti Babilonia, jach'a jawiranac thiyanctawa, kamir cancañamas waliraquiwa, ¡Tucusiñamajj purinjjesä, sarnakäwimas tucuyjjaraquiwa!
14. Take ch'amani Tatitu Diosasti pachpa jacañapjjaruw juramentompi arsuraqui: “¡Uñisirinacamampisti t'ijut'iju lak'onacampjamaw phokhantäma, jupanacasti jumaru atipjasinjja jach'at arnakasipjjani!.”
15. Tatitojj ch'amapampiw aca orake luri, ch'iqhi cancañapampiw aca orakjja sayt'ayaraqui, amuyt'apampiw alajjpachjja jach'aptayaraqui.
16. Jach'at arsutapampiw umas alajjpachan khothutiraqui, kenayanacsti aca orake tucusitpachwa maqhatayaraqui, jallu taypinracwa k'ejjok'ejjonacsa khantayaraqui, cawqhantejj thayajj imantatäqui ucatpachwa apsuniraqui.
17. Take jakenacasa pisi amuyuni jan cuna yatirïpjjaraquiwa, diosanacasti qhititejj jupanacaru lurqui ucanacarojj sallkjapjjaraquiwa. Inamaya uñtasit luratanacaquiwa, janiw jacañanïpcaraquiti.
18. Jan cunatac inamaya yänacaquïpjjaraquiwa, mä p'enkaraqui, Tatitusti jupanacarojj taripäwi urunwa t'unjaraquini.
19. ¡Ucat sipansa cunja jach'as Jacobon Diosapajja, juparaquiw take cunanacatejj utjqui ucanacjja uscuraqui! Juparaquiw Israelarojj jupatacjama ajllisi; sutipasti: Take Ch'amani Tatitu sataraquiwa.
20. “¡Babilonia, jumajj nayan amparajjanjja mä jach'a martilljamätawa!, guerran nuwasiña armajjaraquïtawa. Jumampiw marcanacsa, reyinacan apnakañanacapsa t'unjaractjja.
21. Jumampiw caballonacsa, jakenacapsa t'unjaractjja, carronacsa, uqhamarac cocheronacsa.
22. Jumampiw chachanacsa, warminacsa, chuymani jakenacsa, waynanacsa, yokall wawanacarusa, imill wawanacarusa t'unjaractjja.
23. Jumampiw awatirinacsa, tamanacapsa t'unjaractjja, yapuchirinacsa, uqhamaraqui yuntanacapsa, marca apnakerinacsa, jilïrinacsa.
24. “Ucampisa, jumanacan uñjcataw, Babilonianquirinacarusa, caldeonacarusa, cunjämatejj jupanacar churañajj waquisqui uqhamarjama churaraquëjja, Sionar ñankhanaca lurapjjatapata. Naya Tatituw ucjja arsta.
25. Nayajj jumataquiw sayt'tjja, t'unjiri kollu, jumasti take aca orakpacharuw t'unjaractajja. Naya Tatituw ucjja arsta. Jichhajj amparajj aytä jumar mutuyañataqui, karka parquinacatpach jumarojj korumiyaniraquïma, mä naqhantata kollururaquiw tucuyäma.
26. T'unjata marcamansti, janipuniw mä kalas wasitat perkañataquejj sumäcjjaniti. Wiñayataqui wasararu tucuyataw uñjasiraquïta. Naya Tatituw ucjja arsta.
27. “¡Marcansti nuwantañataqui chimpu churapjjam! Trompetanac phust'apjjam, marcanacarusti waquichapjjaraquim Babiloniaru nuwantapjjañapataqui. ¡Jupa tokesti Ararat, Mini, uqhamarac Askenaz marcanaca toke sayt'apjjam! ¡Jumanacan nuwasiñanacama sum sarayañapataquisti mä general chhijllasipjjaraquim! ¡Caballeriarusti wali khoru t'ijut'ijunacarjamaraqui nayraru ant'apjjam!
28. Marcanacarusti nuwantapjjañapataqui waquichapjjaraquim. Media orakenquiri reyinacarusa, apnakerinacaparusa, jilïrinacaparusa, uqhamaraqui jupan apnakata take orakenacarusa.”
29. Aca orakejj qhathatiwa, ajjsarthapiraquiwa, Tatitun amtatanacapa phokhascatap laycu, Babiloniarojj mä ajjtascaña wasararuw tucuyaraqui.
30. Babilonia soldadonacasti janiw nuwascjjapjjänti; pachpa perkanacapanacwa sayarjjapjjäna; ch'amanacapasti pist'atäjjaraquïnwa, warminacjamaquëjjapjjaraquïnwa. Marcanacapasti uñisirinacan phokhantataraquïnwa, utanacapas ninampi naqhayataraquïnwa.
31. Yatiyirinacasti mayni mayniwa Babilonianquiri reyiru yatiyirejj sarapjje, marcapajj k'ala catuntatätapata.
32. Uñisirinacasti jawira maqhatañanacsa k'alwa catuntapjjaraqui, sayt'asiña chekanacsa ninampiw naqhantayapjjaraqui, soldadonacasti ajjsarañatsa wal qhathatipjjaraqui.
33. Take ch'amani Tatitojja, Israelan Diosapajj aqham satap laycu: “¡Babiloniajj trigo jawk'añ orakjamawa, jawk'a horasan tacsuta orakjamawa, janc'aquiraquiw juparojj cosecha horasajj purinini!” sasa.
34. [34-35] Jerusalén marcasti, Sión marcajja saraquiwa: “Babilonianquiri Nabucodonosor reyejj jisc'a jisc'wa nayarojj tucjitu, mank'antaraquituwa; ch'usa plator uñtatwa jaytaraquitu. Jach'a kotanquiri mä jach'a animaläcaspas uqhamaw mank'antitu; cunatejj nayat sumäcäna ucampiw sist'asi, ucat jilt'irsti liwtjjaraquiwa. ¡Cuntejj nayar Babiloniajj lurquitu ucatsti jichhajj yatpan! ¡Caldeo jakenacasti, jakenacajja jiwarayatapatjja yatiracpan!”
35. ***
36. Tatitojj siwa: “Nayaw jumarojj chekaparu uñjäma, uñisirinacamatsti phoksusiraquïwa. Babilonianquiri jawiranacsa, uqhamarac uma phuch'unacsa k'alwa wañsuyaraquëjja,
37. t'unjata, mayjjaru montonthapitaw khepararaquini, kamakenacan putunacaparu tucuyataraquïniwa, jakensa jan mayampi jaccañaru tucuyataraquïniwa, takenirusa sustjascaña, uqhamarac ajjsarthapiyañaru tucuyatäniwa.
38. Take jupanacasti leonanacjamaw wararipjjaraquini, león kallunacjamaw ojjopjjaraquini.
39. Cunapachatejj jupanacaru calorajj khatt'ani ucapachasti nayaw machjayiri umanac churaraquï, ucasti jupanacarojj p'eke muytayaraquini. Uqhamat jupanacajj mä wiñaya samcaru puripjjaraquini, janiraquiw ucatjja mayampsa sartcjjapjjaniti. Naya Tatituw ucjja arsta.
40. Ucatsti jupanacarojj janc'aquiw mataderoru anaquiraquï, cunjämatejj ovejanaca, chivonaca, orko ovejanacasa qharitäñataqui anaquitajj uqhama.”
41. ¡Take aca orakpachan wali sumat uñt'ata Babilonia marcajj aynacht'iwa, catuntataraquiwa! ¡Cunjämsa marcanacajj jupar uñjasajj wali sustjasipjje!
42. Jach'a kotasti Babiloniarojj k'alwa chhaktayi, jach'a mathapinacapampiw chhaktayaraqui.
43. Marcanacapasti ajjsarcaña wasararu tucuyataraquiwa, waña, llaquiscaña orakeru tucuyataraquiwa, janiw ucanjja mayni jakes jaccaraquispati, uca cheksti janiw qhitis pascaraquiti.
44. “Bel sat diosarusti Babilonia chekanjja mutuyaraquïwa, cuntejj mank'antqui ucsa wak'aksuyaraquïwa, janiraquiw marcanacajj juc'ampi ucaru cuttcjjapjjaniti cuna yanapa mayisasa. ¡Babilonian perkanacapajj liwirtjjewa!
45. Nayan marcajja, uca taypit mistunjjam, sapa maynis jacañapa khespiyaspan, nayan akquiri colerasiñajjatjja!
46. Jan sustjasipjjamti, janiraqui ajjsarapjjamsa cuna arunacatejj marcan parlasqui uca arunacatjja. Sapa maraw take casta arunaca parlasini, nuwasiña toket parlanacaw ist'asini, marcanac apnakerinacas jupanaccamaw ch'ajjwapjjaraquini.
47. Uqhamapï purininejja Babilonianquiri c'ari diosanacar mutuyañajj urojja. Take aca marcpachaw jisc'achjata uñjasiraquini, jake jiwaratanacampi phokhantataraquïniwa.
48. Alajjpachasa, acapachasa take cunanacatejj utjqui ucanacasa Babilonian aynacht'atätap uñjasajj walipuniw cusisipjjani, cunapachatejj amsta toket t'unjiripajj jutcani ucapachajja. Naya Tatituw ucjja arsta.
49. Jïsa, Babiloniajj aynacht'aniwa, Israel marcan jakenacaru uqhamaraqui take aca orakpachana jakenacaru jiwarayapjjatap laycu.”
50. Jumanacasti, qhitinacatejj jiwatäñat khespinipjjta ucanacasti jan sayt'asa jaltjjapjjam, jayanccasasa Tatitutjja amtasipjjapunim, Jerusalén marcatsa amtasipjjaraquim.
51. Jumanacasti sapjjaractawa: “Cunjämtejj jan wali arunacampi jisc'achapjjestu ucanac ist'asajj p'enkastanwa. P'enkasiñaw ajanunacasa imantaraqui, jaya marcanquiri jakenacaraquiw mantapjje, templon kollanans Kollanapäquis uqhacama.”
52. Ucampisa Tatitojj saraquiwa: “Babilonianquiri c'ari diosanacaru mutuyañ urojja jac'achasisinquiwa, take orakepasa usuyasitat wararipjjaraquini.
53. Babiloniajj alajjpachcamas maqhatascpan, jach'a ch'amapa jach'aru aptañataqui, ucarus jupanacataquejj uñisirinacapjja qhitascaquïwa ucan jupanacaru t'unjañapataqui. Naya Tatituw ucjja arsta.”
54. Babiloniatpacha usuyasitat warariñanacajj ist'asi, caldeonacan orakepatpachwa cunayman wararitanacajj ist'asi.
55. Tatituw Babiloniaru t'unjasqui, ch'ajjwataparusti amuct'ayjjaraquiwa. Uñisirinacasti jach'a kota mathapinacjamaw wali ch'amampi jupanacjjarojj puriraquini.
56. Babiloniaru t'unjiriw jutapjjatayna, guerrar sarir jakenacapsti caturjjapjjaraquiwa, jisc'a jisc'wa arconacapsa tucjapjjaraqui. Tatitusti chekapa Diosawa, sapa maynirus waquisitaparjamaw churaraqui.
57. Reyi, take ch'amani Tatitusti siwa: “Babilonianquiri jilïrinacarojj machjayäwa, yatiñani jakenacaparusa, marca apnakerinacaparusa, jilïrinacaparusa, soldadonacaparusa, wiñayataquiw ict'jjapjjaraquini, janiraquiw mayampsa ucatjja sartcjjapjjaniti.
58. Babilonian uca thuru perkanacapasti k'ala liwinucutaraquïniwa, uca jach'a puncunacapas ninampi naqhantayataraquïniwa. Marcanacasa inamayaquiw sayt'ayapjjaraquejja, ch'ama tucutanacapasa ninanwa tucusiraquini.” Take ch'amani Tatituw ucjja arsu.
59. Sedequías reyejj pusi mara Judá orake apnakcän ucapachajja, Jeremías profetajj mä ewjja churaraquïna Seraías sat jakeru, ucasti Nerías sat jaken yokapänwa, Maasías sat jaken allchhiparaqui. Seraiasasti Sedequiasampi chict'ataw sararaquïna Babilonia marcarojja, reyin korpachasiñapataqui wact'ayirïcaspas uqhama.
60. Jeremiasasti mä libroruw kellksuraquitayna take cuna jan walt'añanacatejj Babilonia marcjjaru jutcani take ucanacatjja, takwa uca tokenacatjja kellksutayna,
61. ucat Seraiasarojj saraquïna: “Cunapachatejj Babiloniaru purcäta ucqhasti wali amuyasiraquïta aca arunaca leet'añatjja.
62. Ucat saraquïta: ‘Tata, jumajj sistawa aca cheka t'unjañjjatjja, uqhamat jan qhitis aca chekan juc'ampi jacjjañapataqui, janiraqui jakenacasa, uywanacasa, jumajj aca cheka wiñay wasararu tucuyjjatam laycu.’
63. Aca libro leeñ tucuyatatsti mä kalampi chinuntasin Eufrates sat jawiraru jakontjjam,
64. saraquïtawa: ‘Aqhamaw Babiloniajj aynacht'ani, janiraquiw mayampi cuna aynacht'äwtejj Tatitojj apayancani ucatjja sartcjjaniti’ ” sasa. Aqharuw Jeremiasan arunacapajj tucusjji.

Jeremías 52:1-34
1. Cunapachatejj Sedequías reyejj apnakañ kalltkäna ucapachasti pä tunca mayan maranïnwa, Jerusalén marcansti tunca mayan maraw apnakaraquïna. Taycapasti Hamutal sataraquïnwa, Libna marcanquiri Jeremiasan phuchaparaquïnwa.
2. Sedequías chachajj cunatï Tatitutaqui jan walïqui ucanacwa luraraquïna, cunjämtejj Joacim reyejj lurcatayna uqhamaraquiqui.
3. Ucatwa Tatitojj Jerusalén marcataquisa, Judá oraketaquisa colerataraquïnjja, jupan nayrakatapatsti apanucuraquïnwa. Sedequías chachasti Babilonianquiri reyitaquiw sayt'asiraquïna.
4. Cunapachatejj Sedequías chachajj niya llätunca mara apnakcäna, ucapachaw tunquïri phajjsina tunca uru sarakataru, Babilonianquiri Nabucodonosor reyejj take ejercitopampi Jerusalén marcaru jutantäna, ucat k'alwa muyuntaraquïna. Uca marca uñcatasiruw purintapjjaraquïna, ucat uca marca muyuntatarusti orakenac alliraquïna Jerusalén marcaru nuwantañataqui.
5. Marcasti uqham muyuntataw uñjasïna Sedequiasajj niya tunca mayani mara apnakcänsa ucqhacama.
6. Uca marana, pusi phajjsi, llätunca uru sarakatarusti marcanjja mank'at awtjatäñajj juc'ampiw jiljjattäna, jakenacataquisti janiw cuna mank'añas utjcaraquïnti.
7. Ucatwa jupanacajj mä jach'a p'iya lurasipjjäna uca marca perka jac'arojja, caldeonacajj jupanacaru muyuntatäcchïna ucasa. Reyimpi, soldadonacampisti arumawa uca chekanjam jalsuwayjjapjjäna. Pä perka taypincquis uca puncunjamwa mistuwayjjapjjäna, reyin jardinanacap taypi sarquis uca thaquinjama, ucatsti Jordán valle tokeru sarquis uca thaquinjamwa sarjjapjjaraquïna.
8. Ucampisa caldeo soldadonacajj Sedequías reyirojj arctapjjänwa, Jericó pamparuw jicjjatapjjaraquïna. Ejercitopasti takpachaniw apanucuwayasin sarjjapjjaraquïna, take tokeruw saranucuwayjjapjjaraquïna.
9. Caldeo jakenacasti reyirojj preso catuntapjjaraqui ucat Babilonianquiri reyin nayrakataparuw apapjjaraquïna, uca reyisti Ribla sisqui uca chekancascaraquïnwa, Hamat sisqui uca orakena. Ucanwa Nabucodonosor reyejj Sedequías chachataqui juchañchäwi arunac arsuraquïna,
10. jupan uñjcataraquiw wawanacaparojj p'eke apakayi, uqhamaraqui Judá orakenquir take jilïrinacarusa.
11. Sedequías reyirusti nayranacap q'ilarayaraqui, ucat cadenanacampi ñach'antatwa Babiloniaru apayaraqui, cawqhantejj jiwañapcama presöcän ucaru.
12. Nabucodonosorajj Babilonia marca tunca llätuncani mara apnakcän ucqha, pheskëri phajjsina tunca uru sarakataru ucapachaw Nebuzaradán sat reyin ministropa uqhamaraqui reyin guardiapan comandantepajj Jerusalén marcaru purinïna.
13. Ninampiw templo phichhantaraquïna, reyin palaciopsa, uqhamarac marcan take utanacsa, nayrakatjja jach'a jilïri jakenacan utanacapjja k'alwa naqhantayaraquïna.
14. Jupampi chica jutcän uca ejercitosti Jerusalén marcan perkanacapjja k'alwa tincurayaraquïna.
15. Ucatsti Nabuzaradanajj preso Babiloniaru aparaquïna take qhitinacatejj marcaru kheparasipcatayna take ucanacaru, uqhamaraqui qhitinacatejj Babilonianquiri reyir jakcatjjapjjäna ucanacsa, uqhamaraqui jilt'iri amparanacapamp irnakeri.
16. Mä kawkha sinti pobre jakenacaruquiw jaytawayjjänjja, uva yapunaca yapuchapjjañapataqui.
17. Caldeonacasti k'alwa jisc'a jisc'a t'unjapjjaraquïnjja cunanacatejj templon utjcäna uca yänacjja: postenaca, pilaranaca, uqhamaraqui cuna jach'a pilatejj umataqui utjcän ucsa, ucat take uca broncenacsti Babiloniaruw apasipjjäna.
18. Uqhamaraquiw khellataqui waquichatäcän ucsa, palanacsa, pabilonacataqui luratäcän ucanacsa, jach'a tazanacsa, cucharonanacsa, uqhamarac take cunanacatejj broncet lurata utjcäna Tatituru yupaychañataqui take uca yänacsa k'alwa apasjjapjjäna.
19. Uqhamaraquiwa uca guardianacan comandantepajj take korit lurat yänacsa apasjjäna: Palanganas sata korit luratäcänsa uca, braseronaca, jach'a tazanaca, khella uscuñataqui luratäcänsa uca, candelabronaca, cucharonanaca, vino ofrenda churañataqui uscutäcänsa uca copanacsa apasjjapjjaraquïnwa.
20. Uca pä jach'a pilaranacajj sayascäna, uqhamaraqui uca jach'a pilasa, broncet lurat uca tunca payani orko vacanacasa cawquïrinacatejj uca pila k'epjjäsipcän ucanaca, uqhamaraqui cuna cayunactejj Salomón reyejj Tatitun templopataqui luraycatayna ucanacan pisopasti janiw tantiyañjamäcänti.
21. Uca paya jach'a pilaranacasti sapa maynejj amstarojj quimsakallko metronïnwa, pheska metro chicataniraquïnwa thururojja; mankhajja aleka phusaquïnwa, uca broncesti pakallko centímetro ucqha thururaquïnwa.
22. Sapa maya piläraraquiw p'eke tokerojj broncen apjjatatäna, uca broncesti niya pä metronjamänwa, uca muytatasti broncet lurata mä c'anaw utjaraquïna, ucasti granadas sat ucanacampi c'achachataraquïnwa. Uca paypacha pilaranacasti quipcaquiraquïnwa.
23. Uca broncet c'anatansti pataca granadanacaw utjaraquïna, ucanacatsti llätunca tunca sojjtanisti khanancaraquïnwa.
24. Guardianacan comandantepasti Seraías sat jakerojj preso catuntaraquïna, qhititejj jilïri sacerdotëcän ucaru, uqhamaraqui ucjjaru arquirïqui uca Sofonías sacerdoterusa, uqhamaraqui templon umbralanacapa uñjirïpcän uca quimsa jakenacarusa.
25. Marcanquiri jakenacatsti, tropanacan oficialapäcänsa ucaruraquiw preso catuntayänjja, uqhamaraqui reyir sirvirinacata kheparcäna ucanacarusti pakallkoniruw caturayaraquïnjja, uqhamaraqui cawquïri militaratejj jakenacaru caturirïcän reyir sirvipjjañapataqui ucanacarusa, uqhamaraqui sojjta tunca jakenacarusa, qhitinacatejj alek jakenacaquïsipcäna, uqhamarac marcaru kheparapcatayna ucanacarusa caturayaraquïnwa.
26. [26-27] Nabuzaradanasti take ucanaca caturasinjja Babilonia marcanquiri reyin nayrakataparuw aparaquïna, uca reyisti Ribla sisqui uca chekancascaraquïnwa, Hamat orakena. Ucanwa Babilonianquiri reyejj ordenaraquïna uca jakenacajj jiwarayatäpjjañapataqui. Uqhamaw Judá marcajj orakepatjja jaya marcaru apanucuta uñjasïna.
27. ***
28. Nabucodonosor reyin uqham apanucuyata jakenacasti aqhanïnwa: pakallko mara jupajj reyit apnakcäna uca marasti quimsa waranka pä tunca quimsani jakenacwa apanucuyaraquïna Judá oraketjja,
29. tunca quimsakallkoni mara apnakcäna uca marasti Jerusalén marcatjja quimsakallko pataca quimsa tunca payani jakenacwa apanucuyaraquïna;
30. pä tunca quimsani mara pasjjepansti Nabuzaradán jakesti pakallko pataca pusi tunca pheskani jakenacwa Judá oraket apanucuyaraquïnjja, takpachanisti pusi waranka sojjta patacani jakenacaw apanucuta uñjasipjjaraquïnjja.
31. Judá orakenquiri Joaquín reyejj niya quimsa tunca pakallkoni mara apanucuta uñjascäna, ucapachaw tunca payani phajjsi sarakatarusti, Babilonia marcanjja Evil-merodac sat reyiw apnakaña kalltjjaraquïna, jupasti Joaquín chachatjja qhuyapt'ayasiraquïnwa, ucat carcelat irpsjjaraquïna.
32. Wali sumwa juparojj uñjaraquïna, uqhamarac take reyinacatejj Babilonian jupampi chica utjapcän ucanacat sipansa juc'ampi sumwa juparojj uñjaraquïna.
33. Uqhamaw Joaquín sat Judá marcanquir reyejj carcel isipjja apsusjjäna, ucatsti reyimpi chicaraquiw mesapan mank'asjjäna take urunacapanjja.
34. Uqhamarusa, take jacaña urunacapanjja, jiwañapcamajja Joaquín chachajj sapüruraquiw reyitjja mä yanapa catokäna. Uqhamwa juparojj Babilonianquiri reyejj uñjaraquïna.

Salmos 119:129-136
129. Arunacamajj muspharcañawa, ucat arunacamar jaysta.
130. Arunacamat khanañchäwejj amuyt'ayituwa, pisi amuyt'aninacarojj amuyt'ayiwa.
131. Munañ chuymampiw lacajj jist'arta, camächit arunacam yatiñ laycu.
132. Nayarojj uñtanjjaquitaya, qhuyapayasiraquita, jumar munasirinacar uñjctas uqhamay uñjita.
133. Arunacamarjam sarnakayita, janiquiy cuna ñankhas nayar atipitpati.
134. Jakenacan t'akhesiyañapat khespiyita, nayasti arunacamarjamaw phokhä.
135. Uywatamarojj qhuyapayasiñampiy uñtanim, leyinacamay yatichita.
136. Umjamaw jachajj nayranacajjat warasi, yatichäwiman jan yäkatätap laycu.

Proverbios 28:7-8
7. Qhititejj Diosan leyip phokqui ucajja, ch'iqhi wawawa, ucampis sinti mank'er jakenacampi chicachasiri wawasti, awquiparojj p'enkachayiwa.
8. Qhititejj kamir cancañapa waljaptayqui jila interesanaca apsusa ucajja, qhititejj pobre jakenacata qhuyapayasqui, ucaw kamir cancañapjja waljaptayasi.

Tito 2:1-15
1. Cuntejj parlctas ucajj mayaquïñapaw k'oma yatichäwimpejja.
2. Chuyman jilïrinacasti jan camscayäpjjpan, ajjsart'añani, suma amuyuni, suma iyawsañani, munasiñani, uqhamarac llamp'u chuymani.
3. Uqhamaraqui jilïri warminacajj suma sarnakerïpjjpan. Janiraqui aru apnakerïpjjpati ni machirïpjjpasa. Mayninacataquisti mä sumar uñtatäpjjañapawa.
4. Uqhamat tawak warminacarus chachanacapar munañ yatichañataqui, uqhamarac wawanacapar munañsa.
5. Suma amuyunïpjjañapawa, k'oma chuymaninaca, uqhamarac utapsa sum apnakerinaca, suma chuymaninaca, chachanacaparus ist'irinaca, jan qhitisa Diosan arupatjja jan wali parlañapataqui.
6. Uqhamaraqui waynanacarus waytt'am suma amuyunïpjjañapataquipuni.
7. Juma pachparaqui mä suma uñtäwi uñacht'ayam take cunansa. Yatichañansti cheka cancañampi yaticham, phokhasaraqui,
8. suma parlasaraqui jan qhitins juchañchañapataqui, uqhamatwa qhititejj conträqui ucajj p'enkachat amuyasini, janiraquiw jumanacjjatjja cuna jan wals parlcaniti.
9. Uywatanacarusti ewjjt'am, uywirinacaparu take cunansa ist'apjjpan, janiraqui jupanacarojj ayncatapjjpati.
10. Janiraqui lunthatasipjjpasa, jan ucasti suma cheka jakenacäpjjpan, jacäwinacapajj takens uñjcata, Khespiyir Diosan yatichäwipajj sumätapa yatipjjañapataqui.
11. Diosasti uñachayistuwa qhuyapayasiñapjja khespiyasiñap apanisa take jaketaqui.
12. Uca qhuyapayasiñaparaquiw yaticharaquistu juchampi, acapachar munañampi apanucjjañasa. Ucatsti aca orakenjja mä suma amuyumpi, chekapana Dios chuymaraqui sarnakañasa.
13. Yaticharaquistuwa mä cusiscañ suyt'äwimpi jacañasa, jach'a Khespiyiri Jesucristo Diosajj uñstancani uc suyasina.
14. Jupawa jiwas laycu jiwawayi jan walinacat jiwasar khespiyañataqui, k'omachañataqui, uqhamata jupancañataqui jan karjasisa asqui lurañasataqui.
15. Acanacwa jumajj yatichañamajja, yanapt'asa, uqhamarac take jilïr cancañampi ewjjt'asa jan qhitimpis jisc'achayasisa.