A A A A A
Bible in one year
November 13

Ezequiel 17:1-24
1. Tatitusti nayan ucaru jutasinjja, saraquituwa:
2. “Jumasti chacha, Israel marcarojj mä uñtasïwi churaraquim.
3. Ucatsti saraquim: ‘Aqham siw Tatitojja: Mä jach'a pacaw Líbano kollurojj purini, chhekhanacapasti sinti jach'anacänwa, cunayman casta color phuyunacaniraquïnwa. Cedro sat lawa acht'ataraquiwa,
4. cawquïritejj jach'a laymïcän uca qhuchhokaraqui, alaquipa lurir jakenacan marcapar ayruntiriw sararaqui, cawqui marcantejj alaquipa lurañajj walt'atäqui ucaru.
5. Ucatsti oraket mä jatha aptasinjja, mä waquichat orakeruw satantaraqui, walja umani mä jawira thiyaru.
6. Jathasti mistuniwa, mä jach'a uva aliw tucuraqui; janis wali jach'acchïnjja, ucampisa uca jach'a paca tokeruw layminacapajj jiltaraqui, saphinacapasti orake tokeruw juc'ampi jilantaraqui. Mä uva aliruw tucuraqui, cülltasinsti, walja layminacaniw tucuwayaraqui.
7. Ucampisa yakha jach'a pacaw utjaraquïna, wali jach'a chhekhanacani, walja phuyunacani. Uca uva alin saphinacapasa, layminacapasa uca jach'a paca tokeruw jilantaraqui, juc'ampi uma churañapataqui, cawqui chekaru ayruntatäcäntejj ucat jayana.
8. Ucampisa mä suma orakeru ayruntatäscänwa, walja umanaca jac'aru, ucanjja wali laymintasapäna uqhamaraqui suma achunac churaraquispänjja, mä suma uva aliru tucuraquisapänjja.’
9. “Jichhasti nayan sutejjaru jupanacarojj saraquim: ‘Aqham siw Tatitojja: Aca uva alejj janiw jiltcaniti, nayrïri pacaw juparojj saphinacapa jiq'irani, achunacapsa willirtayaraquini. Juc'a ch'amampi, mä juc'a jakenacampiquiw saphinacapjja jiq'iraraquini, take machaka cülltatanacapasti wañsjjaquiraquiniwa.
10. Wasitat ayruntapcani ucasa, janiw ch'ojjñatatcaniti, inti jalsu toket thayt'aniri thayaw wañsuyjjaraquini, cawqhantejj ch'ojjñatatañapäcän ucqhansa wañsjjaraquiniwa.’ ”
11. Tatitusti nayan ucaru jutasinjja, saraquituwa:
12. “Jichhajj aca naya toke sayt'asiri marcaru jisct'am, cuna amuyt'äwtejj churctan ucjja amuyt'apjjpachati janicha uca toketa. Jupanacarusti saraquim: ‘Babilonia orakenquir reyiw Jerusalén marcar jutasinjja Judá orakenquir reyiru uqhamaraqui jilïrinacaparusa preso catuntasaw Babilonia marcarojj apasjjaraqui.
13. Ucatsti reyin familiapanquirinacatjja mä waynaruw catuntaraqui, jupampisti mä arust'äwi luraraqui, juparu take chuymampi sirviñapataquiw juramento lurayaraqui ucatsti aca marcatjja wali aytat jakenacwa apasjjaraqui,
14. uqhamat Judá orakejj mä jan ch'amani marcäñapataqui, jan sayt'asiri uqhamaraqui cuna arust'äwtejj lurqui ucsa phokheriquiraqui.
15. Ucampisa uca reyin familiapanquiri waynajj sayt'asïnwa uca Babilonia reyitaquejja, ucatsti Egiptoruw qhitanaca qhitaraquïnjja ucat caballonaca, uqhamaraqui walja jakenaca mayiniñapataqui. ¿Jumanacasti amuyapjjtati ucanac lurasinjja atipjañapa, uqhamaraqui jiwañatsa jaltjjañapjja? ¿Uca arust'äwiru jan phokheristi jiwañat khespiraquispati?
16. Naya Tatituw juramentompi arsta, qhititejj uca juramento luratapatjja phiscascani, tronoru kont'ascasinsa janiraqui arust'äwi lurataparus jan phokcaraquiniti, ucajj pachpa Babilonia orakenwa jiwani.
17. Cunapachatejj Babilonianquir reyejja, marcaru nuwantani, ucatsti nuwantañataqui suma sayt'asiñ chekanac waquichasiraquini, marcaru muytata jach'a perkanacsa perkantaraquini, uqhamaraqui walja jakenacarusa jiwarayaraquini ucapachajj faraón reyejj janiw ch'aman ejercitopjja qhitancaniti, janiraquiw walja jakenacsa qhitancaraquiniti.
18. Jupajj juramento luratapata sawcasïnwa, cuna arust'äwtejj lurcäna ucsa janiw phokcänti; jupasti phokhañataquiw arsuraquitayna, ucampisa janiw uca arsutanacaparojj phokcjjeti, ucatwa jichhajj jiwayatäni.
19. “Naya Tatituw jacañajj laycu juramentompi arsta: Jupajj cuna juramenttejja nayampi lurcän ucanacatjja sawcasiwa, cuna arust'äwinacarutejj mantapcta ucanacatsa phiscasiraquiwa jan phokhasa, ucatpï jichhajj juparojj luratapatjja wayt'äjja.
20. Jupjjarusti jichhajj känajjwa jakjjatanëjja, ucampiraquiw catuntäjja, Babilonia orakeruw aparaquëjja, ucanwa juparojj luratapatjja wayt'araquï jan nayaru take chuymampi arcatapata.
21. Suma soldadonacapas guerranwa jiwarapjjani, ucat jilt'irinacasa take tokeru ananucutäpjjaraquiniwa. Ucapachaw jumanacajj yatipjjäta, naya Tatitun parlascatajja.
22. “Naya Tatituw arsta: Jichhasti nayajj uca jach'a cedron alipwa caturaquëjja; cawquïri ramatejj wali alayancqui suma wawäcaraqui ucwa q'ichekaniraquëjja, ucatsti naya quipcaraquiw mä jach'a kollur ayruntä,
23. cawquïri kollutejj Israel marcan wali jach'a kollüqui ucaru. Walwa ramanacapas jilantaraquini, uqhamaraquiw achunacapasa, ucatsti mä suma cedro kokaw tucuraquini. Cunayman casta animalanacaw uca koka c'uchunjja jacapjjaraquini, ramanacapa taypinacarusa cunayman casta jamach'inacaw tapachasipjjaraquini.
24. Take pampanquiri kokanacasti yatipjjaraquiniwa nayan Tatitütajja. Nayajj jach'a jach'a tucuri kokanacarojj liwinuctwa, jisc'a kokanacaruw jiltayaractjja. Ch'ojjña kokanacarojj wañsuytwa, waña kokanacarusti ch'ojjñatatayaractwa. Naya Tatituw ucjja arsta, arsutajjarusti phokharactwa.’ ”

Ezequiel 18:1-32
1. Tatitusti nayan ucaru jutasinjja, saraquituwa:
2. “¿Cunats Israel marcana parlasi aqham säwejja: ‘Awquinacaw c'allc'u uvanac mank'antapjjatayna, ucat jichhajj wawanacajj laca c'amancamaqui’ sasajja?
3. Naya Tatituw juramentompi arsta jacañajj laycu, janipuniw jichhajj jumanacajj mayampsa uca säwjja Israel marcan parlapcjjätati.
4. Take jakenacajj nayanquiwa, awquis, yokasa nayanquiwa, cawquïritejj jucha lurcani ucasti jiwaraquiniwa.
5. “Asqui jakesti cunatejj chekapäqui, asquïqui ucwa luraraqui.
6. Kollu patanacan cuna mank'äwinacatejj utjqui yakha diosanacar yupaychañanjja ucanacatjja jithektiwa, janiraquiw Israel c'ari diosanacaparus catuyascaraquiti; jake masipatsa janiw warminacapjja irparcaraquiti, janiraquiw pachpa warmiparus jac'caraquiti cunapachatejj uca warmejj phajjsi wilapampïqui ucapachajja.
7. Janiw qhitirus t'akhesiyquiti, jan ucasti manuparusa cuntejj mayt'ascatayna ucatjja phokjjaraquiwa; janiw qhititsa lunthatcaraquiti, mank'añapatsti qhititejj jan mank'añanïqui ucarus churaraquiwa, jan isinirus ist'ayaraquiwa.
8. Kollkepsa janiw ganañ laycu mayt'quiti, janiraquiw walja interesanacsa kollke mayt'atapatjja maycaraquiti; janiw qhitirus ñankhachquiti, cunapachatejj pani ch'ajjwiri jakenacaru ch'ajjwatanacapa t'akqui ucapachasti chekaparupuniw t'akjaraqui.
9. Leyinacajjarjamaw cunsa luraraqui, camachi arunacajjarus phokharaquiwa. Uca jakejj chekpachansa asqui, cheka jakewa, jupasti jacaraquiniwa. Naya Tatituw ucjja arsta.
10. “Ucampis uca jaketejj mä khoru jake jiwayiri yokanïni uqhamaraqui take ucanacsa luraraquini,
11. cuntejj awquipajj jan lurcän ucanacsa. Ucasti mank'äwinacarusa sararaquini kollu patanacana c'ari diosanacar yupaychasina, jake masipatsa warmipjja irpararaquini,
12. pobrerusa, pist'ata jakerusa t'akhesiyaraquini. Mayninacatsa lunthataraquini, qhititejj mayt'asqui ucatsa janiraqui phokcaniti uca manupjja, uqhamaraqui uca c'ari diosanacaruraqui catuyasini, uqhamaraqui cuntejj nayajj uñiscta uca luräwinac luraraquini.
13. Kollkepsa walja ganancianac jicjjatañataqui mayt'ani, uqhamaraqui walja interesanac mayiraquini; uca jakesti jiwaniwa, janiw jaccaniti. Take ucanaca, cuntejj nayajj ajjtascta ucanaca luratapatsti jiwaniwa, jiwatapatsti jupa pachparaquiw juchanïscani.
14. “Uqhamaraquiw utjaraquispa uca pachpa jaken mä yokapa, uca yokapasti awquiparojj take uca juchanac luriri uñjascaraquispa ucampisa janiraqui jupajj awquipjam uca juchanac lurcaniti;
15. janiraqui uca kollu patanacan c'ari diosanacar yupaychasa mank'äwinacarus sarcaniti, janiraqui Israelan c'ari diosanacaparus catuyascaraquiniti; jake masipan warmipsa janiraqui irparcaraquiniti,
16. janiraqui qhitirus t'akhesiycaraquiniti; uqhamaraqui cunapachatejj jupatjja mä cunsa mayt'asipjjani ucapachajj janiraqui mä prenda maycaniti; janiraqui qhititsa lunthatcaniti, jan ucasti mank'at awtjatarus mank'aña churaraquini, jan isinirus ist'ayaraquini;
17. janiraqui qhitirus cuna ñankhsa lurcaniti, kollkepsa walja ganancia uñjjatañ laycus mayt'caniti, janirac interesanacsa mayiscaraquiniti. Ucatsti leyinacajjarjamaraqui sarnakani, camachi arunacajjsa phokharaquini uca jakejj janiw awquipan juchap laycu jiwcaniti, jan ucasti jacaniwa.
18. “Awquipatejj jake masiparu t'akhesiychïnjja, lunthatasiñanacarus uscuschïnjja, uqhamaraqui marcapanjja take jan walinacsa lurcchïnjja, ucajj pachpa juchanacapat mutuyäwi catokasaw jiwascani.
19. Jumanacasti jichhajj sapjjätawa: ‘¿Cunatarac wawasti awquipan juchanacap jan phokhesti?’ sasa. Jïsa, wawajj cunatejj chekapäqui, cunatejj asquïqui ucwa phokharaqui, take leyinacajjsa phokharaquiwa; ucatwa jichhajj jacanejja.
20. Qhititejj jucha lurqui ucaw jiwascanejja. Wawajj janiw awquin juchapatjja phokcaniti, awquis janiw wawan juchanacapatjja phokcaraquiniti. Asqui jakejj asqui lurataparjamaw suma wajjt'asïwi catokani, ñankha jakesti ñankha lurataparjamaraquiw mutuyäwi catokaraquini.
21. “Ñankha lurir jaketejj take ñankha juchanaca lurcän ucanaca apanucjjani, ucatsti nayan leyinacajjarjamaraqui sarnakjjani, cunatejj asquïqui, cunatejj chekapäqui ucanac lurjjaraquini ucajj jacascaniwa, janiw jiwcaniti.
22. Nayasti janiw mayampsa uca jucha luratanacapatjja amtascjjäti, jupasti asqui luratap laycuw jacjjaraquini.
23. Janiw nayajj ñankha jaken jiwañapjja muncti jan ucasti muntwa sarnakäwipjja asquichasjjañapa, ucatsti jacjjañaparaqui. Naya Tatituw ucjja arsta.
24. “Ucampisa, asqui jaketejj asqui luräwinacapa apanucuni, ucatsti cuntejj ñankha jakejj ajjtañanac lurqui ucanaca luraraquini, ucatsti ¿jumanacajj amuyapjjtati ucan jacascañapjja? Nayasti janiw amtascjjäti cuna asquinactejj jupajj lurcän ucanacatjja, jan take chuymampi arcatap laycu jucha luratanacap laycuw jiwani.
25. Jumanacajj sapjjätawa: ‘Tatitojj janiw chekaparu uñjquiti’ sasa, ucampisa ist'am Israel marca: ¿Jumanacasti amuyapjjtati nayan jan chekaparu uñjascatajja? ¿Janit jumanacaqui jan chekaparu cunanacsa lurapcta?
26. Asqui jaketejj asqui luräwinacap apanucusin ñankha luräwinaca lurjjchi ucasti jiwaniwa, uca jan walinac luratap laycu.
27. Ucampisa mä ñankha jaketejj ñankha luräwinacap apanucjjchi, ucatsti asqui luräwinac lurjjaracchi ucasti khespiyataw uñjasiraquini.
28. Jupatejj sum amuyt'asini, sum uñatatasiraquini, ucat take ñankha luräwinacap apanucjjaraquini, ucajj chekpachaw jacani, janiw jiwcaniti.
29. “Ucampisa Israel marcajj sascaquiniwa: ‘Tatitojj janiw chekaparu uñjquiti’ sasa. ¿Janit Israel marcaqui antisas jan walinaca lurcpacha?
30. Nayasti israelit jakenaca, sapakat mayniruw uñjapjjsma, luräwinacamarjama. Naya Tatituw ucjja arsta. Ñankha lurañanacamjja mäpita apanucupjjam, uqhamat jan jumanacpacha uca ñankha luräwinacam laycu jiwarascañataqui.
31. Cuna ñankhanactejj naya nayrakatan lurapcta ucanacsti mäpita apanucupjjam, mä machaka chuymani, mä machaka ajayuni tucupjjaraquim. Israel marca, ¿cunatarac jiwascätasti?
32. Janejjay nayajj qhitin jiwañapsa muncstejja. Ñankha luräwinacamatjja jithektjjapjjam, ucapachaquiw jacapjjäta. Naya Tatituw ucjja arsta.

Salmos 124:1-8
1. Tatitutejj jan jiwasanacampïcasapän ucajja, —Israel marcajj arspan—
2. Tatitutejj jan jiwasanacampïcasapän ucajja, jakenacajj chhucjjatapquistän ucapachajja,
3. jacquirpach mank'antistasapäna, k'apisiñapan jiwasanac contra naqhatap laycu.
4. Ucapachajj umajj chhaktayjjestasapänwa, jawirajj jiwasanac pat llumiquipasapäna.
5. Jupokon k'añu umajj cuncacamaw llumcatistasapäna.
6. Tatitojj jach'añchatäpan, janiw jupajj apanucquistuti, janiraquiw laca ch'aqhanacapampis t'uruntayquistuti.
7. Jamach'ir uñtataw jacañ khespiyasipjjtan, jiwayirin waquichat sipitapata; sipitajj t'akasïnwa, jiwasanacasti jaltjjapjjtanwa.
8. Yanapt'ajj Tatitut juti, jupaw alajjpach acapach lurirejja.

Proverbios 28:21-21
21. Janiw jake masi ajlliñajj walïquiti, uqhamatwa mä juc'a mank'a laycusa juchar puriñajj utji.

Hebreos 9:1-28
1. Uqhamajj nayra arust'äwinjj culto sarayañanacapajja utjänwa, ucajj acapachanquir santuariotaquiquïnwa.
2. Uca santuariosti aqham uscutänwa: Nayräjjancquis uca Kollan Chekäquis ucawjanjja utjänwa mä candelabrompi, mä kollan t'ant'anac uchañ mesampi.
3. Payïri cortina khepäjjanjja Sinti Kollan sat Chekaraquiw ucancäna.
4. Ucansti mä kori altaraw utjaraquïna, incienso naqhayañataqui, uqhamarac arust'äwi arca korimpi apaquipata. Uca arca mankhansti mä kori chatuw ucancäna, maná sat t'ant'araquiw uca chatu mankhancaraquïna, Aaronan ch'ojjñatatcänsa uca varapasa ucancaraquïnwa, uqhamarac arust'äwi kellkat kalanacasa.
5. Kori arca patjjansti querubines sat angelanacaw ucancascäna, Diosas ucanccaspa uqhama, chhekhanacapampiraquiw imantapjjäna, cawqharutejj juchanac laycu sacrificiojj loktascän ucqharu. Ucsti janiw jichhajj juc'amp sum khanañchcsnati.
6. Uqham waquicht'atarusti, sacerdotenacajj sapa cutiw mantapjje nayräjja santuarioru cunatejj waquisqui uca culto lurañataqui.
7. Ucatsti Sinti Kollan Chekarojj jilïri jach'a sacerdotequiw mantirïna, maran mä cuti. Ucar mantañataquisti apañapänwa animalanacan wilapa, juchanacapat loktañataqui, uqhamarac jakenacataquisa.
8. Kollan Ajayojj take ucanacampejj amuyt'ayistuwa, uca nayrïri santuariojja culto lurañaquïscatapa, Sinti Kollan sat Chekar puriñataquisti janïraw thaquejj jist'aratäcänti.
9. Take acanacasti mä uñacht'äwjamawa jichhürunacataquejja. Ucan ofrendanaca uqhamarac sacrificio Diosar loktatajj janiw suma k'oma tucuycaspati uqham yupaychirinacan chuymapjja.
10. Ucasti mank'añawjata, umañawjampitac parli, yakhep k'omachasiñanacampita. Ucasti ankäjjataquiquiwa ch'amanejja, cuna horasatï Diosajj mayampi machakat lurcani ucqhacama.
11. Ucampis Cristojj jutjjewa, jichhajj jupaw jilïri sacerdotejja take suma luräwinaca utjqui ucatjja. Cawqhantejj jupajj sacerdotet sirvqui uca santuariojja juc'amp sumawa, juc'amp phokhataraquiwa, janiraquiw jakenacan luratäquisa ni acapachanquirïcaraquisa.
12. Cristojj Sinti Kollan Chekaruw manti, janiraquiw cabritonacan ni vaca kallunacan wilap loktirisa, jan ucasti jupan pachpa wilapa loktasiriw manti. Uqhamaw mä cutiqui takenitaqui mantawayi, ucatsti wiñay khespiyasiñwa jiwasatac jicjjataraqui.
13. Chekaraquïnwa toronacana, cabritonacan wilanacapampi, uqhamarac kachu vaca kallunacan khellanacapampi altaran naqhantqui, juchararanacjjaru ch'alljjatatäcaraqui ucajja, ch'amaniraquiw ankäjjat k'omachañataquejja.
14. Ucampis ucajj uqhamächi ucajja ¡kawkha juc'amp ch'amanïpachas Criston wilapajja! Ucasti wiñay jaquir Ajayu tokew Cristojj Diosaru jupa pachpa loktasi jan k'añucht'ata, wilapas k'omacharaquistuw chuymasjja jiwañaru apquistus uca jan wali luräwinacatjja, jacquir Diosar sirviñasataqui.
15. Ucatpï Jesucristojj machak arust'äwin sumancthapiyiripajja. Nayra arust'äwirjam jucha luratanacasajj Criston jiwatap laycuw perdonatäjje, qhitinacarutejj Diosajj jawsqui ucanaca Diosajj churañatac arscatayna uca wiñay herencia catokapjjañapataqui.
16. Mä testamenton asquïñapataquejja, qhititejj lurqui uca luririn jiwatapaw yatisiñapa.
17. Testamento luriritejj jacascchejja, uca testamentopajj janïraw valoranïquiti, jan ucasti jiwjjatapatacwa valoranëjja.
18. Ucataracwa nayra arust'äwejj wila wartäwimpi lurasïna.
19. Moisesajj Diosan take camachinacapjja yatiyänwa takpach jakenacaru; ucatsti mä wila t'awra aptäna, mä hisopo laymimpi, vaca kallunacana, cabritonacan wilaparu, umampiruw chilltäna, ucjjarojj ley libroru uqhamarac take jakjjaruraquiw ch'alljjatäna.
20. Ucatsti saraquïnwa: “Aca wilawa cuntejj Diosajj jumanacamp arust'awayi ucjja sayt'ayi” sasa.
21. Moisesajj santuariorusa, uqhamarac take cunanacatejj ucan utjcäna ucanacamppacharuw wilamp ch'alljjataraquïna.
22. Ucatsti leyirjamajj niya take cunanacaw wilampi k'omachatäñapa; janiw juchat k'omachasiñajj utjcaspati, janitejj wilajj wartascaspa ucqhajja.
23. Ucatpï waquisïnjja aca sacrificionaca utjañapajja alajjpachat yatekasit yänaca k'omachañataqui, ucatsipan alajjpach yänacajj ucats juc'amp suma sacrificionac muni.
24. Jaken lurat santuariojj mä uñacht'äwiquïnwa chekpach santuariotjja. Cristosti janiw uca jakenacan lurat santuariorojj mantquiti, jan ucasti alajjpach quicparuw manti, jichhasti ucan Diosan nayrakatapan jiwasat arjjatasquistu.
25. Jilïr jach'a judío sacerdotejj sapa maraw mantirïna Sinti Kollan Chekawjaru mä animalan wilap loktiri, ucatsipan Cristosti janiw walja cuti sacrificiot loktasquiti.
26. Uqhamäsapän ucajja walja cutiraquiw jiwañapäsapänjja aca orake kalltatpachjja. Jichhajj take uca urunac phokhasisquipanjja, Cristojj mä sapa cutiquiw pacha tucuyar uñstani, jupapachparaquiw mä sacrificio loktasiwayi take juchanac apakañataqui.
27. Cunjämatejj take maynins mä cuti jiwañapäquejja, ucjjarusti taripäwiw jutaraqui.
28. Uqhamaraquiw Cristojj mä cutiqui sacrificionjj loktasïna waljanin juchapa apakañataqui. Ucatsti khepïrinjja uñstaniraquiniwa, janiw juchanac apakeriti, jan ucasti jupar suyt'irinacar khespiyañataqui.