A A A A A
Bible in one year
October 6

Isaías 63:1-19
1. —¿Qhitis ucajj Edom marcan Bosra capitalapat jutqui ucajja, wila tiñit isini, wali suma isthapt'ata, wali ch'amamp sartas jutqui ucajja? —Nayätwa, atipjatäquis ucanac yatiyirïtwa, khespiyañataquis ch'amaniraquïtwa.
2. ¿Cunatraqui wila isinïtasti, uvanacsa cayumpi tacscasma uqhama?
3. —Jïsa, naya sapaquiw uvanac tacsuscäyät, janiw qhitis yanapquituti; wali colerataraquiw uñisirinacajjarojj tacstjja, colerasiñajjampiraquiw k'al jupanacarojj taquistjja, wilanacapasti isejjaruraquiw ch'itsutu, isejjsti k'alracwa wilampi ch'allsutu.
4. Nayaw mä uru cheka uñjäwi utjañapjja amtta; marcajjar khespiyañ horasasti purinjjaraquitaynawa.
5. Uñatatastwa, ucatsti janiraquiw qhiti yanapiris utjcänti; musphataraquiw uñjasta jan qhitis nayaru yanapt'añ munatapatjja. Amparajjaw atipjañjja churitu, colerasiñajjaquiraquiw wayjjäsitu.
6. Coleratajja, k'alpun marcanacarojj t'unjta, colerasiñajjampiraquiw jupanacarojj tucjtjja, wilanacapsti orakenjam llumiyaractjja.
7. Nayajj Tatitun munasiñapatwa parlañ munta, yupaychaña k'ochunacap k'ochuña, take cuntejj jupajj jiwasanacatac lurqui ucanacata, Israelan wawanacapataquejj qhuyapayasiñapajj jach'ätapata, cuntejj qhuyapayasiñapanjja lurqui, uqhamaraqui jach'a munasiñapansa, take ucanacata.
8. Jupajj siwa: “Jupanacajj nayan marcajjawa, janiw aca wawanacajjajj ch'ojjña lurapquitaniti” sasa.
9. Juparaquiw take llaquinacapatjja khespiyi. Janiw jupan mä qhitanitapati khespiyquejja; jan ucasti quipca Tatituw khespiyi. Qhuyapayasiñap laycu, munasiñap laycuraquiw jupajj khespiyi, jupaw wayti, amparat caturaqui. Uqhampunwa luri.
10. Ucampis jupanacajj Tatitutaquiw sayt'asipjje, k'oma cancañaparusti ñankhachapjjaraquiwa; ucatwa jupanacataquejj mä uñisiri, nuwjiriraqui tucuraquejja.
11. Jupanacasti nayrapachanacatwa amtasipjje, qhititejj marcapar khespiyqui uca Moisesatsa amtasipjjaraquiwa, jisct'asipjjaraquïnwa: “¿Cawquincaraqui Nilo jawiran Moisesar khespiyiri Diosasti? Uca Moisesajj tamapa awatirïnwa. ¿Cawquincaraqui qhititejj Moisesar Kollan Ajayupa uchqui ucasti,
12. qhititejj uca jach'a ch'amapsa Moisesar churcaraqui; marcap nayrakatansa jach'a kotjja payar jaljaraqui, uqhamat wiñayataqui aytatäñapataqui;
13. qhititejj kota mankhanjam jan llust'tasa maqhatayqui, caballonacas wasaranjam sarcaspa uqhama,
14. jan ucajj uywanacas pampanacaru sarakcaspa uqhama, cawquincaraqui jichhasti?” Pachpa Tatitun Ajayupaw jupanacarojj irpänjja. Uqhamwa marcaparojj irpänjja, ucatsti wali jach'a cancaña jicjjataraqui.
15. Tata, alajjpachatpacha uñtanipjjeta, cawqha kollana, c'ajquiri chekantejj utjcta ucqhatpacha. ¿Cawquincaraqui uca jach'a munasiñamasti, ch'amamasa, colerasiñamasa? ¿Qhuyapayasiñamasti nanacataquejj tucusjjeti?
16. ¡Jumätaw nanacan awquejjajja! Abrahamajj inas jani uñt'apcchitaniti, Israelas janiraqui nanacatjja inas amtascjjchiniti, ucampis Tata, jumaw nanacan awquejjätajja; nayratpacha jumaw nanacan khespiyirejjätajja.
17. ¿Tata, cunatrac thaquimat saranucupcta ucqhasti jan jarct'apjjesta, cunatrac chuymanacajjsti kalarayapjjesta jumar jan jaysañataquisti? Sirvirinacamar munatam laycusay sum tucuyapjjeta cawquïri tribunacatejj jumancqui ucanac laycusaya.
18. ¡Cunja juc'a maranacaquis kollana marcamajj orakepatjja ‘orakejjaw’ sapjjänjja! Uñisirinacajjaraquiw templomjja taquisipjje.
19. Janis jumajj cunapachas apnakapquitasamän uqhamäpjjtwa, janis cunapachas sutimjja apapquiriscäyät uqhama.

Isaías 64:1-12
1. Alajjpach ch'iyjaraquisman, ucat apakaniraquisman, uqhamaraqui juman ucancatamampejja kollunacsa qhathatiyaraquisma,
2. cunjämtejj ninajj ch'aphi alinac naqhantqui, jan ucajj umsa walljjtaycaraqui uqhama. Ucapachaw uñisirinacamajj sutimjja uñt'apjjaspa, marcanacasti juma nayrakatanjja qhathatipjjaraquispawa.
3. Cunapachatejj uca ajjsarcañanaca cuntejj nanacajj jan suyapcäyätsa ucanac lurcta ucqhajj, cunapachatejj jumajj sarakancta ucapachajj, kollunacajj juma nayrakatanjja qhathatipjjewa.
4. Janipuniw cunapachas ist'asquiti ni uñjascaraquisa, jumat sipana yakha diosan utjatapajja, qhititejj take ucanac lurcaspa, qhitinacatejj jupar iyawsqui ucanacataquejja.
5. Jumasti qhititejj asquinac cusisiñampi lurqui ucanacaruw catoktajja, uqhamaraqui cuntejj jumajj muncta uc lurqui ucarusa. Jumajj nanacataquejj coleratätawa, nanacan jucha lurapjjatajj laycu; nayratpachracwa jumarojj chuymama usuyapjjsma.
6. Take nanacasti mä k'añu lurir jaker uñtatäpjjtwa, take asqui luräwinacajjasti k'añu traponacar uñtataraquiwa. Takeniraquiw ancuntat laphinacar uñtata willirtapjjta, nanacan ñankha luratanacajjasti thayar uñtataw apapjjaraquitu.
7. Janiw qhitis jumar mayisirejj utjquiti, janiraquiw jumar thakañataquejj ch'amacht'asquiti; ucatpï nanacatjja imantasjjtajja, ñankha luratanacajj laycuw apanucupjjaraquistajja.
8. Ucampis Tata, jumaw nanacan awquejjätajja; nanacajj ñek'equïpjjtwa, jumasti sañu lurirïtawa; ¡take nanacasti juman uscutäpjjaractwa!
9. Tata, janiquiy juc'ampi colerasjjamti, ñankha lurapjjatanacajjatsa janiquiy amtasjjamti. ¡Uñtanipjjeta, nanacajj marcamäpjjtwa!
10. Kollana marcanacamasti ch'usa wasararu tucuyatawa, Jerusalenasti tucjatawa, k'ala aynacht'ataraquiwa.
11. Nanacan suma santuariojjasti, cawqhantï awquinacajjajj yupaychapcäyätam uca chekanacajja k'ala ninampi tucjatawa. ¡Cuntejj wal munasipcäyät ucanacasti k'ala tucjatawa!
12. ¿Take ucanac pasipansti, Tata, janit camscätasa? ¿Janit arscäta, amuquiyätati, uqhamti nanacarusti jisc'achjapjjetäta?

Salmos 115:14-18
14. Tatitojj wawanacamar waljaniptaypan, jumanacarusa, wawanacamarusa.
15. Alajjpach acapach lurir Tatitojj asquinacapay jumanacar churpan.
16. Alajjpachajj Tatitunquiwa, jakerusti orak catuyi.
17. Jiwatanacajj janiw Tatitur jach'añchapcaspati, janiraquiw mankhapachanquirinacas jach'ar aptapcaspati.
18. Jiwasanacasti Tatituruw jach'añchapjjañäni, jichhasa, wiñayasa. ¡Tatitojj jach'añchatäpan!

Proverbios 26:27-27
27. Qhititejj mä p'iya allini ucajja, uca pachparuwa jalantani; qhititejj mä jach'a kala korumt'aycani ucajja, uca pachpa kalawa jupjjaru jaljjattani.

Filipenses 1:1-30
1. Naya Pablompi, Timoteompi Jesucriston sirvirinacapaw aca carta Filipos marcanquir jilatanacar kellkanipjjsma, uqhamarac obisponacarusa, diacononacarusa. Jumanacasti Diosatac ajllitäpjjtawa, Jesucristompisti mayaquïpjjaractawa.
2. Bendicionampi sumancañampisti jumanacampïpan Dios Awquisata, uqhamarac Tatit Jesucristompita.
3. Sapa cuti jumanacat amtasta ucqhajja Diosaruw yuspagarta.
4. Cunapachatejj oración lurcta ucapachajja, take jumanacataquejj cusisiñampiw mayirapipjjsma.
5. Jumanacampi chicaw khespiyasiñ arunac yatiyapjjäyätan, kalltat jichhürcama.
6. Nayasti sum yattjja, Diosajj cuna suma luräwinactï jumanacampi kalltqui ucanacajj lurascaquiniwa, Jesucriston jutañapcama.
7. Uqham amuyatajjasti asquiwa, jumanacarusti walpun munasipjjsma, nayamp chicaraquiw jumanacajj take bendicionanacsa catokapjjtajja carcelt'atäñajjansa, autoridadanac nayrakatan arsuñansa, khespiyasiñ arunac arjjatañansa, uqhamarac uca khespiyasiñajj chekawa sañansa.
8. Diosaquiw yatejja cunjämtejj nayajj jumanacarojj Jesucriston munasiñapampi munapcsma ucjja.
9. Diosatsti mayiscaractwa jumanacan munasiñanacamajj juc'ampi utjañapataqui, yatiñansa, amuyt'añansa, take cunansa,
10. uqhamat asquïquis ucpin ajllipjjañamataqui. Uqhamatwa jumanacan mä k'oma jacasiñajj utjani, cunapachatejj Cristojj jutcani ucqhajj jan cuna jan walis utjañapataqui.
11. Uqhamwa jacañanacamanjja mä suma cosech apthapiñäcaspas uqhama, Tatit Jesucristor yuspagarasina Diosar jach'añchañataqui.
12. Jilatanaca, munaractwa ac yatipjjañama: Cunanacatejj nayar pasquitu ucanacajja, chekpachansa mä yanapjamaw juti, uquïpanracwa khespiyasiñ yatiyäwejj juc'ampi sarti.
13. Palacionquir takpach soldadonacasa, uqhamarac mayninacas yatiraquiwa, nayan Cristor arcatajj laycuqui preso catuntatätajja.
14. Nayar preso uñjasinjja, waljpachaniw jilatanacajj juc'ampi ch'am catjjatapjje. Diosan arunacap yatiyañanjja, jan ajjsarasaraquiw Tatitur juc'amp catuyasisin parlapjje.
15. Chekpachansa yakhepanacajj Cristotjja parlapjjaraquiw uñisisiñata, ch'ajjwañampita, ucampis yakhepanacajj suma amtäwinacampiw yatiyapjjaraqui.
16. Ucampis mayninacajj take munasiñampiw parlapjje, jupanacasti yatipjjewa nayan khespiyasïwi arunaca parlañajjataqui, uca laycu.
17. Mayninacajj parlapjjewa Tatitutjja jupatac take cunsa thakasaqui, janiw take chuyma parlapquiti. Jupanacasti munapjjaraquiwa nayan juc'ampi jan walt'añajja, jichhajj preso jicjjatasitajj laycu.
18. Ucasti, ¿cunaraqui? Cunjämatsa waliquiwa, take chuymampisa jan ucajj janisa, Cristotwa parlapjje, ucasti nayarojj cusisiyaraquituwa; jichhas juc'ampi cusisiscaquïwa.
19. Nayajj yattwa, take acanacatjja walicwa mistuscäjja, jumanacan oración luratanacamampi, uqhamarac Jesucriston Ajayupan yanapapampi.
20. Cuntejj muncta, suycaracta ucajja jan nayan p'enkasiñajj utjañapataquiwa; ucat sipana take iyawsañampi Diosan arunacapat parlt'añajjataquiwa, uqhamat jichhajj nayan Cristojj juc'ampi jach'ar aptatäñapataqui, jiwatäcasasa jan ucajj jacascasasa.
21. Nayataquejj jacañajj Cristowa, jiwañasti atipt'añaraquiwa.
22. Janchin jaccasinjja nayajj irnakawayiristwa Tatit laycu, ucampis janiw cawquïris ajllisiñjamäquiti.
23. Nayataquejj wali ch'amawa aca payat cawquïri ajllisiñasa, mä toketjja jiwañ munirista ucat Cristompi chicäjjañataqui, ucasti nayataquejj juc'amp sumäspawa.
24. Ucampis mä toketjja nayan jacañajjajja juc'ampi asquïspawa jumanacataquejja.
25. Nayajj yatistwa jacascañajja jumanacar yanapt'añataqui, ucat jumanacan juc'ampi cusisiñajj utjañapataqui iyawsañanacamana.
26. Uqhamasti wasitat jumanac taypincäjja, ucat jumanacan cusisiñamajj Cristo Jesusan utjañapataqui.
27. Take jumanacasti Jesucriston arunacaparjam sarnakapjjam. Nayasti jutcäsa jan ucajj jayanccäsa, yatiñwa munta jumanacatjja suma yatiyäwinaca, ch'amampi sarantasa mä jakjamaqui, uqhamarac khespiyasiña arunacar iyawsäwi laycusti takenisa mayaqui nuwasïwincasasa,
28. uñisirinacamampis jan sustjayasisa. Ucasti jupanacataquejj mä khanañchäwiwa chhakañaru sarascatanacapajja, ucampis jumanacataquejj khespiyasiñajj Diosat jutatapa uñacht'ayi.
29. Cristo laycuw jumanacarojj jupar iyawsañajj churatäpjjtajja, uqhamarac jupa laycu t'akhesiñasa.
30. Jumanacas uqhamarac nayasa uca quipca nuwasiñancapjjtanwa, uñjapjjaractawa cunjämtejj nayas nuwascta ucjja, jichhasti yatipjjaractawa nayan nuwasiscatajjsa.