A A A A A
Bible in one year
October 10

Jeremías 5:1-31
1. Tatitojj siwa: “Jerusalén callenac muytanipjjam, suma uñatatanipjjam, plaza tokenac thaktanipjjam, inach maynsa jicjjatapjjäta take cunsa chekapar luriri, uqhamaraqui cheka chuymani. Uctejj jicjjatapjjät ucapachasti Jerusalenarojj perdonäwa.
2. Yakhepanacajj Tatitun sutipjjaruw juramento lurasipqui, ucampisa uca juramento luratanacapajj inamayawa, c'ariraquiwa.”
3. Tata, jumajj cheka chuymani jakenac thaktajja. Mutuyaractawa, ucampisa janiw usuyasipquiti; Aynacht'ayascaractawa, ucampisa janiw yatekañ munapquiti. Kala chuymanïpjjewa, wali khorunacäpjjaraquiwa, janiraquiw cheka thaquiru cuttaniñsa munapquiti.
4. Nayasti saractwa: “Pobrenacaquiw pisi chuyma jakenacjam sarnakapjjejja, cunatsa jan amuyt'asipjjpacha cuntejj Tatitojj munqui ucjja, cuntejj Diosapajj sisqui ucjja.
5. Jilïri jakenacan ucaru sarä, ucatsti jupanacarojj saraquïwa. Jupanacasti amuyt'asipjjapuniniw cuntejj Tatitojj munqui ucatjja, cuntejj Diosajj sisqui ucsa. Ucampisa takeniw Dios toke sayt'asipjje, janiraquiw jupar jaysañsa munapquiti.
6. Ucatwa jichhajj leonanacajj ch'umit mistunisin jiwarayapjjani, wasaranquiri kamakenacaw jisc'a jisc'a tucjapjjaraquini, marcat mistusinquirinacarusti jisc'a jisc'a tucjaraquini, walja jach'a juchanac lurapjjatap laycu, maynir aljantapjjatap laycu.
7. Tatitojj siwa: “¿Cunjämsa jichhajj take ucanac perdonäma? Wawanacamajj nayarojj apanucuwayapjjetuwa, ucatsti cawquïrinacatejj jan diosäpqui ucanacjjaruw juramento lurapjje, mank'sti jilarquirwa churta, ucatsti takpachaniw yakhampi sarnakañarojj catuyasipjjaraqui.
8. Orko caballonacar uñtataw, jake masipan warminacap uñtasajj wararipjje.
9. ¿Uca luratanacapatsti janit mutuycästi? ¿Uqham sarnaker jakenacarojj janit juchap uñt'asiycäjja?
10. ¡Jichhajj uñisirinacapajj mantanpan ucatsti uva yapunacjja tucjpan, janisa takpach tucjapcchini ucasa! ¡Layminacapsa khakharapjjpan, janiw jichhajj uva yapöjjäcjjeti!
11. ¡Israelampi, Judämpejj nayarojj sallkjapjjetuwa! Naya Tatituw ucjja arsta” sasa.
12. Israelampi, Judämpejj Tatiturojj jan uñt'iriw tucupjje; sapjjaraquiwa: “Janiw Diosajj utjquiti. Janiw cuna jan walis pasquistaniti, janiraquiw guerras, mach'as utjcaniti” sasa.
13. [13-14] Profetanacajj thayampi sasiquiwa, Diosan arunacapasti janiw jupanacampïcaraquiti. Jichhajj waliquiwa, ucwa take ch'amani Tatitojj situ: “Jupanacan uqham parlapjjatapatsti, acanacaw jichhajj jupanacarojj pasaraquini: Arunacajjsti lacamaruw uscuraquï, uca arunacsti ninjam tucuyaraquï, jakenacarusti lawäpcaspas uqham tucuyaraquï, ucatsti uca ninaw jupanacarojj naqhantaraquini.”
14. ***
15. Tatitojj siwa: “Israel, jumataquisti mä jayat jutir marca apayanï, wali ch'amani marca, uqhamaraqui nayratpacha utjir marca; jumasti parlatanacapjja janiw yatctati, cuntejj sapcani ucsa janiw amuyt'caraquïtati.
16. Take jupanacasti guerran nuwasiri jan ajjsariri jakenacäpjjewa, armanacapasti pachpa jiwañäcaspas uqhamäpjjaraquiwa.
17. Jupanacasti yapunacamwa catuntasipjjani, t'ant'amsa mank'antapjjaraquini, imill wawanacamsa, yokall wawanacamsa mank'antapjjaraquiniwa, ovejanacamsa, vaca kallunacamsa mank'antapjjaniwa, uqhamaraqui uva yapunacamsa, higo yapunacamsa. Jumajj alcatascta uca jach'a perkani marcanacamsa armanacapampiw t'unjapjjani.”
18. Tatitusti sascaquiwa: “Uca urunacansti janiraquiw takpacha t'unjcäti.
19. Cunapachatejj jisct'apcätam ucapachasti: ‘¿Cunatsa aqham take acanaca luristu Tatitu Diosasajja?’ sasa, ucapachasti jumajj jupanacarojj saraquïtawa: ‘Cunjämatejj jumanacajj Tatiturojj apanucusin yakha diosanacaru aca pachpa orakepan yupaychapjjtajja, uqhamaraquiw jichhajj yakha marcanquir jakenacaru sirvipjjäta, jaya orakena’ sasa.
20. “Israel marcaru yatiyapjjam, Judä orakerusti sapjjaraquim:
21. ‘Aca arunac ist'am, jan amuyt'an marca, nayranïsquiwa, ucampis janiw uñjquiti, jinchunïscaraqui, ucampis janiw ist'quiti.
22. Naya Tatituw sista: ¿Janit jumanacajj nayaru ajjsarapquista? ¿Janit naya nayrakatan qhathatipcta? Nayaw kota thiyjja uscta jach'a kotataquejj korpäcaspas uqhama, uca korpsti janiw jach'a kotajj pasancaspati. Mathapinacapas inamayaquiw ucan sartasqui, khothutisipquiwa, ucampis janiw pasanipcaspati.
23. Jumanacajj khoru jan ist'asiri chuymanïpjjtawa, nayarojj apanucuwayapjjestawa, ucatsti sarjjapjjaractawa.
24. Janiw amuythapisipcaractasa, ni sapcaractasa: Tatitu Diosasarojj ajjsartañäni, horasaparuw khepa, nayra jallsa apayanistu, uqhamaraqui cosecha apthapiñ horasas apayaniraquistu.
25. Ucampisa jumanacan juchanacamajj take ucanacjja mayjt'ayjjewa, jichhasti janiw juc'ampi uca asquinacjja catokcjjapjjätati.
26. Marcajjansti ñankha jakenacaw utji, jupanacasti jamach'inac jiwayirinacjamaw suyjjatasipqui, mayninacaru catuntañataquisti sipitanac uscusipcaraqui.
27. Utanacapasti lunthatata yänacampi phokhantatawa, cunjämatejj jaulanacarojj jamach'inacajj phokhantatäqui uqhama. Uqhamatwa jupanacajj kamiri, ch'amani tucupjjaraqui,
28. wali pokontatäpjjewa, suma mankt'ataraqui. Ñankha luratanacapasti janiw korpanïquiti. Janiw wajcharojj chekaparu uñjapquiti, pobrenacarus janiraquiw chekaparu uñjapquiti.
29. ¿Janit ucanacatsti mutuycästi? ¿Janit uqhama jakenacarusti juchap uñt'aycästi? Naya, Tatituw ucjja arsta.
30. “Maya ajjsarcaña, sustjascañaw aca marcanjja pasasqui.
31. Cuntejj profetanacajj yatiyapjje ucajj c'ariwa; sacerdotenacasti munañanacaparuw apnakapjjaraqui, ¡marcajjasti uqhamwa munaraqui! Ucampisa ¿cunsa lurapjjäta tucuya urojj purincan ucqhajja?’ ”

Jeremías 6:1-30
1. ¡Benjamín token utjir jakenaca! ¡Imantasiñ thaktapjjam, Jerusalenat jaltjjapjjam! Tecoa chekansti trompeta phust'apjjam, Bet-haquerem chekansti mä chimpu sayt'ayapjjam, mä jach'a jan walt'añampi, mä jach'a aynacht'añampiw, amsta toket ajjsarañapa churasinqui.
2. Sión orakejj mä suma ch'ojjña orakjamawa,
3. cawquirutejj awatirinacajj tamanacapampi sarapjje uqhama; uca orakeruw muyuntapjje, sapa tamanacaraquiw ucanjja mank'arasipqui.
4. Uñisirinacapasti sapjjaraquiwa: “¡Sionampi jichhajj nuwasiñäni! ¡Jutapjjam, chica urunpacha nuwantapjjañäni! Ucampisa, ¡llaquiscañawa! Jayp'öjjewa, ch'iwis sarakanjjaraquiwa.
5. ¡Uqhamajj aruma nuwantañäni, torrenacapsti t'unjaraquiñäni!” sasa.
6. Take ch'amani Tatituw uca arunacjja churaraqui: “¡Kokanac tincuyapjjam, ucatsti uca lawanac arct'apjjam, ucanac patjjata Jerusalenar nuwantañataqui! Aca marcajj juchañchatäñataqui catuyatawa, mayninacaru t'akhesiyapjjatap laycu.
7. Jerusalenatwa ñankha lurañajj mistu, cunjämatejj umajj mä phuch'ut mistojj uqhama. Uca marcansti nuwasiñanacampi ch'ajjwañanacampiquiw ist'asisqui; ucansti chhojjriñchasiñanacaqui, usuyasiñanacampicwa uñjaractjja,
8. Jichhajj Jerusalén yatekamaya, jan ucasti nayajj jumatjja mayjt'ataw sarjjä, mä wasararuw tucuyäma, jan jakeni antutaraquïma.”
9. Take ch'amani Tatitusti siwa: “Cawquïri israelitanacatejj kheparcani ucanacarusti k'ala thaksutäniwa, cunjämatejj mä uva alinjja layminacajj thaksutajj uqhama, uca alina jan mä sapa uva achus kheparañapataqui uqhama” sasa.
10. Nayasti saractwa: “¿Qhitirac ist'itani, nayan parlatajjarusti, uqhamaraqui aca yatiyäwi churatajjarusa? Tata, jinchunacapajj lluphantatawa, janiw ist'apcaraquiniti; arunacamatsti larusipjjaraquiwa, Arunacamsti janiw munapcaraquiti.
11. Colerasiñaman phokhantatätwa, Tata; janiw juc'ampi cuns lurirjamäcti” sasa. Tatitusti saraquituwa: “Uca colerasiñamsti callen waynanacjjaru warjjatam, tam tama sarnakquis uca waynanacjjaru. Chachanacarusti warminacapamppachwa catuntasina apapjjani, uqhamaraqui sinti chuymani jakenacsa.
12. Utanacapasa, orakenacapasa, warminacapasa yakhancjjaniwa. Nayasti amparajj aytaraquï, aca marcan utjirinacaru mutuyañataqui. Naya Tatituw, ucjja arsta.
13. “Takenisa, jisc'as jach'asa, lunthatasiñampi jicjjatañatacwa lup'isipquejja; profetanacasa, sacerdotenacasa, takeniw lunthatasiñaru catuyasipjje.
14. Marcajjan chhojjrinacapsti patatacwa kollañ munapjje; take cunas waliquïsquiwa sapjjaraquiwa, ucampisa take cunasa jan walipuniwa.
15. ¡Jumanacajj take ucanacatjja p'enkasipjjañamänwa, take cunanactejj nayajj jan muncta ucanac luratanacamatjja! Ucampisa, janiw p'enkasipquiti, ¡janiraquiw cunatejj p'enkasiñäqui ucsa yatipquiti! Ucatpï jichhajja, cunapachatejj nayajj mutuycä ucqhajja, ch'anktasipjjaniwa, mayninacjamaw liwirtapjjaraquini. Naya Tatituw, ucjja sista.”
16. Tatitojj marcaparojj siwa: “Thaqui jac'anacaru sayt'asipjjam ucatsti uñatatasipjjaraquim, nayra thaquinacat jisct'apjjam; cawquïrisa suma thaquejja ucata; ucatsti uca thaquinjam sarapjjam, ucapachaw samarapjjaraquïta.” Ucampisa jupanacajj sapjjewa: “Janiwa, janiw uca thaquinjam sarapquiristti” sasa.
17. Tatitusti uñjirinac uscu, marcarusti saraquiwa: “Cuna unañchäwtejj churapcäma ucar sum suyapjjam” sasa. Ucampisa marcajj siwa: “Janiw nanacajj ist'apcäti” sasa.
18. Ucatpï jichhajj Tatitojj sejja: “Ist'apjjam marcanaca, yatipjjaraquim cunanacatejj marcajjaru pascani ucanacsa.
19. Jumas, orake ist'araquim: Aca marcarusti mä jach'a jan walt'añwa apayani, jan wali lurañanacaqui amtasipcatapata; arunacajjarusti janiw ist'apcaraquitänti, jan ucasti yatichäwinacajj-jja jisc'achapjjewa.
20. ¿Cunataquis jumanacajj Sabá sisqui uca oraket incienso apanirapipjjesta? ¿Uqhamaraqui jaya orakenacatpacha suma k'aphini alinacsa? Nayarojj janiw munasquituti uca loktasitanacamajja, ni yakha sacrificionacamasa.”
21. Ucatwa Tatitojj saraqui: “Aca marcarojj ch'anktasiyäwa, liwisiyaraquïwa. Awquinacasa, wawanacasa, uta jac'anacasa, amigonacasa, takeniw mayaqui jiwarapjjani” sasa.
22. Tatitojj siwa: “Amsta toketa jaya orakenacatpachwa, mä ch'amani marcajj jutantañataqui waquichasisqui.
23. Jupanacasti arconacampi, flechanacampi armantatäpjjewa; sinti khoru jakenacäpjjewa, janiw qhuyapt'ayasiñsa yatipcaraquiti; arnakasitanacapasti jach'a kotan khothutitapjamawa, caballonacar lat'jjatatcamaw jutapjjaraqui. Sionampi nuwantasiñataquisti janc'aquïpjjaraquiwa” sasa.
24. Jerusalén marcansti jakenacajj sapjjaraquiwa: “Nanacajj uca yatiyäwjja ist'apjjtwa, ajjsarañasti jan ch'amani antutapjjaraquitu; walpun llaquisipjjta, ajjsarapjjaracta, mä wawachasir warmjama.
25. ¡Jan pampa tokeru mistupjjamti. Jan thaquinacaru sarapjjamti! ¡Uñisirisajj wali armantatawa, take chekansa ajjsarañaquiw utji!” sasa.
26. ¡Marcajja, jichhajj chhanqha isinacampi isthapisim t'akhesitam uñacht'ayañ laycu; khellaru sunt'suraquim, luto isinacampi isthapisim, wal jacharaquim, cunapachatejj mä sapa yokall wawajj jiwquis uqhama; jiwasaru t'unjiristi janc'aquiw jutaraquini jiwasanacar t'unjañataqui!
27. Tatitusti saraquituwa: “Nayasti aca marcajjaru yant'añamataquiw jaytaracsma. Sum uñjam cunjämasa sarnakäwipajj uca” sasa.
28. Tata, take jupanacajj wali khorunacäpjjewa; jakjjata parlasiri ñankha jakenacäpjjewa; hierrot sipansa, broncet sipansa sinti ch'ullkhëpjjewa.
29. Cunapachatejj fuellejj ch'amampi phust'i ucqhajja, ninajj umatatayiw plomo metalarojja. Ucampisa jupanacaru k'omachatajj inamayawa, ñankha jakenacasti janiw chhaktquiti.
30. Ucampisa: “Apanucut kollke” sasay sutichañächispa, jumajj jupanacaru apanucutam laycu.

Salmos 117:1-2
1. Tatitur jach'añchapjjam, takpach jakenaca, jupar art'asipjjam, takpach marcanaca:
2. qhuyapayasiñapajj jiwasanacatac wali jach'awa, asqui cancañapajj wiñayawa. ¡Tatitojj jach'añchatäpan!

Proverbios 27:3-4
3. Kalasa, ch'allasa jathiwa, ucampis jan amuyt'an jaken colerasitapajj ucanacat sipansa juc'amp jathiwa.
4. Colerasiñajj jan wali tucjiriwa, ucampis envidiasiñajja ucat sipansa juc'amp jan waliwa.

Colosenses 1:1-29
1. Naya Pablojj Diosan munañap laycuw Jesucriston apostolop satätjja. Timoteo jilatampiw aca carta kellkanipjjsma,
2. qhitinacatejj Colosas marcan jicjjatasipctas ucanacaru. Jumanacasti take chuymaw Diosancapjjta, Jesucristorus iyawsapjjaracta. Jiwasan Dios awquisay jumanacarojj bendispan, sumancañaps churaracpan
3. Jesucristo Tatitusan Dios Awquiparojj yuspagarapjjapuntwa jumanacatac Diosat maycasinjja.
4. Yatipjjaractwa jumanacan Jesucristor iyawsapjjatama, uqhamarac take Diosanquirinacarus munapjjatama,
5. cuna suyt'äwtï jumanacajj suyasipcta uca laycu, ucasti jumanacataquejj alajjpachan imatäsquiwa. Uca suyt'äwsti jumanacajj catokapjjaractawa Diosan khespiyasiñ arunacap ist'apjjatam laycu.
6. Aca pachpa Diosan arunacapasti take chekanwa wali jiltasqui, take chekan parlataraquiwa, take chekanracwa apthapitäscaraqui. Uqhamaw jumanac taypinsa lurasiscaraquejja cunapachattï jumanacajj Diosan munasiñapat ist'apjjäyäta, uca munasiñapajj chekätap yatipjjaraquïyäta ucqhatpacha.
7. Aca arunacsti jiwasan Epafras sat munat jilatasaw yatichapjjtamjja, jupasti nanac chicaw irnakaraqui, jumanacasti mä suma Tatitun sirviripatracwa juparojj uñt'asipjjtajja.
8. Juparaquiw nanacarojj jumanacjjatjja yatiyapjjetu, uqhamarac jumanacan munasiñanacamatsa.
9. Ucat nanacajj cunürutï ucanac yatipcta ucürutpachaw jumanacataquejj jan karjasisa orapjjta, Diosatjja mayipjjtwa jumanacajj jupan munañapa amuyt'apjjañamataqui, uqhamarac take casta yatiñanacsa ajay token amuyt'añanacsa jumanacar churaniñapataqui.
10. Mayipjjaractwa jumanacajj Tatitunquirjama sarnakapjjañamataqui, uqhamarac cunatejj jupataquejj asquïqui ucanac lurapjjañamataqui, uca suma luräwinacamajj mä suma cosechjama utjañapataqui, Diosarus juc'ampi sumrac uñt'apjjañamataqui.
11. Mayipjjaractwa jupa quipca jumanacarojj alajjpach ch'amapampi, ch'amani tucuyañapataqui, uqhamata take cunsa llamp'u chuymampi cusisiñampiraqui lurapjjañamataqui,
12. uqhamata Dios Awquiru yuspagarapjjañamataqui. Juparaquiw jiwasarojj waquichistu ucjja khanan catokañasataqui, cuntï Diosajj jupanquirinacar churcän ucjja.
13. Diosaw jiwasarojj ch'amacanacan munañapat khespiyanistu, Jesucristo Yokapan apnakatäñataquiw uchasiraquistu.
14. Uca Yokapasti jiwäwipampiw khespiyaraquistu, juchanacasat pampachasa.
15. Jan uñjcay Diosajj uñjcañaw juti Yokap toke, uca Yokapasti take cunatejj utjqui ucatjja nayrïriwa.
16. Jupa tokeracwa Diosajj luri take cunatejj alajjpachansa acapachansa utjqui ucanacjja, jan uñjatäqui ucsa, uñjatäqui ucsa. Take ajayunacan ch'amanïtapsa, munañan apnakerïtapsa, jupa tokew luri, jupataquiraqui.
17. Janïr cunas utjcän ucqhatpachwa Cristojj utji, jupïpanaracwa take cunas chekaparu utjascaraqui.
18. Uqhamarus Cristojj uca cuerpon p'ekepawa, ucasti iglesiawa. Juparaquiw uca cuerporojj jacañ churi, jupajj jiwatanacat nayrakat jactiriwa, uqhamat jupajj take cunansa nayrancañapataqui.
19. Diosajj munaraquïnwa jupajj cunäquitejj ucajj Criston uñstañapa.
20. Ucatsti munaraquïnwa aca orakpachpana Cristo toke sumancañajj utjañapa, take aca orakpachanquirinacampi, alajjpachanquirinacampisa, sumancthapiñapa Criston crusan jiwäwip toke.
21. Nayrajj jumanacajj Diosat jayancasipcäyätawa chuymanacamansti Diosan uñisirinacaparaqui, jan walinac lurapjjatam laycu. Ucampis jichhajj Diosajj jupampejj sumancthapiyjjapjjtamwa,
22. Cristojj janchipan jiwatap toke. Acsti jumanacar jupa nayräjjar uñstayañataquiw luri, jan cuna k'añuni ni cuna juchansa.
23. Ucampis acataquejj sum sayt'asipjjañamawa iyawsañanacamanjja, suma saphintataraqui, cuna suyt'äwtï suyt'apcta Diosan arunacap ist'asinjja ucatjja janiw jithektasipjjañamäquiti. Aca khespiyasiñ arunacasti take chekanwa parlasi, naya Pablosti uca parlañanjja yanapasiractwa.
24. Jichhajj jumanac laycu t'akhesisajj cusistwa, uqhamatwa pachpa janchejjan phokhascta, cunatejj Criston cuerpopan t'akhesiñajj jan phokhatäcän ucjja, uca cuerposti iglesiawa.
25. Iglesiapansti mä sirviriparaquiw tucta, Diosat ewjja catokasa. Uca ewjjsti juparaquiw churitu, jumanacan asquimataqui, uqhamata Diosan arunacapa phokhata churañajjataqui,
26. uqhamaraqui cunatejj nayra pachanacatpacha imantatäcän ucanaca uñacht'ayañajjataqui. Uca imantäwsti Diosajj jichhajj wawanacaparojj uñacht'ayjjewa.
27. Jupanacaruw Diosajj aca imantatjja uñacht'ayaraqui, cuna kamir cancañatejj Diosan utjqui jan judiöpquis uca jakenacaru. Imantäwisti Jesucristojj jumanacancqui ucawa, juparaquiwa cuntejj catokapcäta uca suyt'äwisa.
28. Nanacajj Cristo Tatitjjatwa parlapjjtjja. Takeniruraquiw ewjjt'apjjta yatichapjjaracta sum amuyt'apjjañapataqui, uqhamata takenis suma jiltatäñapataqui Tatitumpi mayaquïñapanjja.
29. Ucataquiraquiw nayajj irnakta ch'am tucusa, cuntï Tatitojj churquitu uca ch'amampi.