A A A A A
Bible in one year
April 20

Jueces 5:1-31
1. Qhä urusti Deborampi, Barac sata, Abinoam sat chachan yokapampisti k'ochupjjänwa aqham sasa:
2. “Diosaru takeni yupaychapjjam, Israel marcanjja utjasquiwa janc'aqui nuwasiri chachanacajja; uqhamarac marca taypinjja utjasquiwa nuwasiñataqui jawsataru ist'iri chachanacajja.
3. ¡Juma reyinacajja, ist'apjjeta! ¡Juma jilïr apnakerinacasa, ist'apjjaraquita! ¡Nayajj, Diosaruw k'ochöjja! ¡Nayajj, Israelan Diosaparuw k'ochöjja!
4. “Dios Tata, Seir sat chekat mistuwaycta ucqhasti; uqhamarac Edom sat chekaru sarcta ucqhajja, orakes qhathatïnwa, alajjpachasti chhijthaptaraquïnwa; kenayatsa jalluraquiw purintaraquïna.
5. Juman nayrakatamansti, Dios Tata, juman nayrakatamansti Israelan Diosapa, kollunacasa, Sinaí sat kollusa qhathatipjjänwa.
6. Samgar sata, Anat sat chachan urunacapana, uqhamarac Jael satan urunacapanjja, saririnacajj thaquimatjja armasipjjänwa, jupanacajj jan wali thaquiruw sarapjjäna.
7. Israelitanacan utanacapasti take apanucutaw uñjasïna. Ucampis ¡naya Deborajja sayt'twa, israelitanacan mä taycapjama!
8. “Takenisa yakha machak diosanac ajllisipjjäna, cunapachatejj marca puncuna nuwasiñajj utjqui ucqhajja, janiw uñjascänti mä escudosa, ni mä lanzasa pusi tunca waranka israelitanac taypinjja.
9. “¡Nayajj take chuymajjwa churta, Israelan jach'a jilïrinacapatjja, uqhamarac marcajjancqui uca jakenacatsa, jupanacasti nuwasiñatac jawsatajj mäquiw ist'asipjje! ¡Diosaru takeni yupaychapjjam!
10. “Arsupjjamay jank'o asnor konjjatatanaca, asqui uñjañatac konuñan konurinaca, uqhamarac jumanaca saririnacasa.
11. ¡Cawqhantejj uywanacajj um umapqui uca taypin platillonacan suenapampi chica Diosan atipjatapjja arnakapjjam; uqhamarac Israelan utanacapan atipjatapsa!
12. “¡Sartasim, Débora, sartasimaya; sartasim mä k'ochu k'ochuñataqui! ¡Jumasti, Barac, Abinoam chachan yokapa, sartasim preso catuntatanacama apasjjañataqui!
13. “Ucampis israelitanacajj sarakanipjjänwa, ch'amaninacampi nuwasiñataqui; nayäpanwa Diosan tamapajj sarakanipjjäna, nuwasir jutir jakenacampi nuwasiñataqui.
14. Efraín satan yakhep jakenacapasti valle chekaruw sarakanipjjäna, jupanacan khepapsti Benjaminanquir tamaraquiw sarapjjaraquïna, Maquir sat chekatsti jilïrinacapajj sarakanipjjänwa, Zabulonanquiritsti jilïr apnakerinacaparaquiw sarakanipjjäna.
15. Deborampi chicasti sarapjjänwa Isacar satäqui jilïrinaca, Isacar satasti, Barac sat chachar yanapirejja jupan khepapatjja valleruw saraktapjjäna. “Ucampis Rubenan tamapansti, utjiwa take chuyma amtäwimpi sayt'ir chachanaca.
16. ¿Cunatsa kheparapjjta ovejanac taypiru, awatirinacar ovejanacap jawsir ist'asinjja? ¡Rubenan tamapa taypinsti, utjiwa jach'a jakenacajj chuymanacapan ajjsaririnaca!
17. “Galaad satasti Jordán jawirat mayscataruw kheparjje, Dan satajja barconacampi chicaraquiw kheparjjaraqui, Aser satasti jawir thiyaruraquiw kheparjjaraqui, uca chekatsti janiw cawcsarusa onjjtcjjeti.
18. Ucampis pampata alto chekanacansti Zabulonampi, Neftalí satampisti niyapiniw jacañanacapsa apt'asipjje.
19. “Ucampis reyinacajja jutapjjewa Taanac sat marcaru, Meguido sat marcan umanacap jac'aru. Cananeonquir reyinacasti jutapjjänwa amtata nuwasiñataqui, ucampis jupanacajja janiwa kollksa, ni cuna casta kamirïña yänacsa apasipcänti.
20. Warawaranacasti alajjpacha altotwa Sísara chachataquejj nuwasinipjjäna.
21. Jichha jawirasa, nayra jawirasa, uqhamarac Cisón sat jawirasa take jupanacaruw chhaktayi. ¡Ucampis jumajja ch'amaninacarojja janiw arsuycätati!
22. “Caballonacaru uchatäpqui uca casconacasti walipuniw chhollokepjje caballonacas thokhonacapqui ucqhajja.
23. Diosan angelapasti yatiyiwa: ‘¡Meroz sat marcjjaru, uqhamarac ucan jaquirinacjjarusti jutaniwa mä jach'a maldiciona!’ sasa. Jupanacasti janiw jutapquiti Diosan yanapapampejja, cunjämtejj Diosan yanapata ch'amaninacajj jutapqui uqhamjja.
24. “Heber sat quenitan Jael sat warmipasti, ¡bendicitäpan take warminac taypinjja! Uqhamaraqui, ¡bendicitäpan campamento utanacanquir warminac taypinsa!
25. Sisarajj uma mayipansti, Jael warmejj leche churi. ¡Poktat lechwa churi mä suma jach'a tazaru!
26. Uccañcamasti ch'eka amparapampisti mä ch'acurwa catu, cupi amparapampejj irnakarinacana martilloparaqui caturaqui, ucatsti Sisararojj ucampi p'eketa jisctasinwa p'ekepa ch'iyji, ucatjja p'eke parapataracwa uca ch'acurumpi lek'entaraqui.
27. Ucatsti Sisarajja, Jaelan cayupa jac'aruwa jakotattäna, uqhamarac wali usutap laycojja orakeru jakotattäna. Cawqharutejj jakotatcqui ucqharuwa jiwäna.
28. “Uccañcamasti Sisaran mamapajj wali llaquitawa uta ventanar jac'achasisajj säna: ‘¿Cunatsa carropajj jan janc'asa purinpacha? ¿Cunsa lurpacha guerrar saraña carropajj jichhacama?’ sasa.
29. Ucampis yakhepa ch'iqhi warminacasti uqham ist'asinjja arusjjatapjjänwa, uqhamarac jupa sapaquisa parlasiraquïnwa:
30. ‘Inasa cuntejj guerrana gananipqui ucanaca jaljasisipcchi. Maya, jan ucajj paya warmi sapa maynitaqui, Sisarataquisti suma coloranacat lurat telanaca, maya jan ucajj paysa, uqhamarac walja coloranacampi bordatäqui ucsti atipjirina cuncapataquiraqui’ sasa.
31. “¡Dios Tatitu, uqhama tucjatäpana jumaru take uñisirinacajja, ucampis jumaru take munirinacasti waliraqui khanapjjpan cunjämtejj intejj khanqui uqhama!” Uca khepatsti uca orakenjja samarañaw utjäna pusi tunca maranaca.

Jueces 6:1-40
1. Israelitanacasti Diosan uñjcatajja cunayman jan walinacwa lurapjjäna. Ucatsti Diosajja pakallko maranacawa madianitanacan apnakatäñaru catuyäna.
2. Ucampis madianitanacana wali t'akhesiyata uñjasisasti, israelitanacajj ajjsarañatjja imantasiñwa lurasipjjäna kollunacaru, orak p'iyanacaru, yakha jan uñjcañ chekanacaru jan jicjjatayasiñataqui.
3. Ucampis cunapachatejj israelitanacajj cunsa yapuchasipcäna ucqhajja madianitanacasa, amalecitanacasa, uqhamarac inti jalsu toket jutiri jakenacasa nuwantapjjänwa.
4. Jupanacasti israelitanacan orakeparu jutasinjja, yapunaca tucjapjjäna Gaza sata chekacama. Israelitanacataquisti janiwa cuna mank'añsa jaytapcänti, ni ovejanaca, ni vacanaca, ni asnonacsa.
5. Jupanacasti utanacapampi, uqhamarac walja uywanacapampi jutasinwa take cunanaca tucjayapjjäna. Walja camellonacampi jutasinsti, walja t'ijut'ijunacjamaw jutapjjäna.
6. Uqhama madianitanacan luratasti, israelitanacajj wali pist'ayasiñanwa jacasipjjäna, ucatsti Diosaruwa yanapa mayisipjjäna.
7. Cunapachatejj israelitanacajj Diosaru arnakasipjjäna madianitanacat khespiyañapataqui ucqhajja,
8. Diosasti mä profeta qhithäna, ucatsti sänwa: “Israelan Dios Tatitupajj aqham siwa: ‘Nayawa jumanacarojj Egipto marcata irpsunipjjsma, cawqhantejj t'akhesisa sirvisina jacapcäyäta ucatjja.
9. Janiwa egiptonquir jakenacatacjja khespiyapcsmati jan ucasti take jumanacar t'akhesiyirinacatwa khespiyapjjsmajja. Jupanacarusti jumanacan uñjcatawa alisnuctjja, uqhamaraqui orakenacapsa jumanacaruraqui churapjjaracsma, sasa.
10. Ucatsti sapjjaracsmawa: ‘Nayätwa jumanacan Diosamajja, uca laycusti janiwa amorreonacan diosanacaparojj ajjsarapjjätati, cawquïr orakentejj jichhajj jacapcta ucanjja; sasa. ‘Ucampis jumanacajj janiw ist'apquistati’ ” sasa.
11. Ucatsti Diosana mä angelapajj jutasinjja Ofra sat chekansti encina sat koka patjjaruw kont'asïna. Aca orakesti Joás sat chachancänwa, jupajj Abiezer sat familianquirïtap laycu. Gedeón sat Joás sat chachan yokapasti mä jamasa chekanjja trigo thalascäna, cawqhantejj uvanaca taquipjjerïcäna vino lurañataqui ucqhana, jani madianitanacampi uñjayasiñataqui.
12. Diosan angelapajj uñstasinjj sänwa: —¡Diosajj jumampïsquiwa, ch'amani, jan ajjsarir jake! —sasa.
13. Ucatsti Gedeonajj saraquïnwa: —Tata, perdont'ita, Diosatejj nanacampïscchi ucajja, ¿cunatsa aqhama jan walt'añanacajj juti? ¿Cawquinquisa take milagronaca luratanacapajja, cawquïr luratanacapatejj nanacan nayra awquinacajjajj parlapquitu Diosawa Egipto marcatjja irpsunistu sasa ucajja? Diosasti nanacat armt'asisa apanucusasti madianitanacana t'akhesiyatäñaruw catuyapjjetu —sasa.
14. Diosasti uñcatasinjja sänwa: —Kawkhatejj ch'amamajj utjqui ucampi israelitanac khespiyir saram madianitanacan t'akhesiyatäñata. Nayawa jumarojj qhithascsma —sasa.
15. Ucampis Gedeonajj wastatampiw saraqui: —Tata, mayampiw achict'assma perdont'aquitaya, ¿cunjämarac nayasti israelitanacar khespiyiriststi? Nayana familiajjasti wali pobrequiwa Manasés sat tribu taypinjja. Uqhamarac nayajj sullcaquïtwa familiajj taypinjja —sasa.
16. Diosasti sascaquïnwa: —Lurätawa, nayawa jumampiscäjja jumasti atipjätawa madianitanacarojja cunjämtejj qhitisa mä sapa jakeru atipjqui uqhama —sasa.
17. Gedeonasti wastatampi sascaquïnwa: —Nayatejj juman qhuyapt'ayasiñama jicjjatsta ucajja, mä uñacht'äwi churita chekpachana jumajj nayampi parlatama yatiñajjataqui.
18. Tata, achict'assmawa janiquiy acat sarcamti nayan cutt'aniñajjcama, nayasti muntwa jumaru mä ofrenda loktaña —sasa. Diosasti saraquïnwa: —Nayasti acata suyämawa cutt'aniñamcama —sasa.
19. Gedeonasti sarasinjja waquicht'anïnwa mä cabrito, uqhamarac pä tunca libra jac'utsti jan levaduran t'ant'a. Ucatjja aychanacjja mä canastaruw uchäna, caldsti mä phuqhururaqui. Uqham waquicht'awayasinsti cawqhanccäntejj angelajj ucqharuw apäna loktañataqui.
20. Diosan angelapasti saraquïnwa: “Aychanacampi, jan levaduran t'ant'anacampjja mä kala janqha patjjaru ucham, ucjjarusti caldompiraqui waraquipam” sasa. Ucatsti Gedeonajj cunjämtejj angelajj sisqui uqhamwa luräna.
21. Ucat angelajja aychanacampiru, t'ant'anacampirojj amparapancqui uca thujrumpiw ayjjatäna, ucatsti uca kala janqharatjja ninaw mistsunïna aychanacsa, t'ant'anacsa take naqhantäna. Uccañcamasti Diosan angelapajj Gedeón jac'atjja chhactawayjjänwa.
22. Gedeonajj Diosan angelapätapa amuyasinsti sänwa: —¡Dios Tata! ¡Nayasti Diosan angelaparojj ajanuy ajanuw uñcatjja! —sasa.
23. Diosasti saraquïnwa: —Jan ajjsaramti, janiw jiwcätati. Nayana samarañajja catokam —sasa.
24. Ucatsti Gedeonajja mä altarwa Diosataqui waquicht'i ucarusti suticharaquïnwa “Diosawa samarañajja” sasa. Aca altarasti Ofra marcancasquiwa, Abiezer sat familian marcapana.
25. Ucampis uca arumpacharaquiw Diosajj, Gedeonaru saraquïna: —Awquiman vacanacapatsti mayïri orko vaca catum, maysti pakallko marani orko vacäquis ucaraqui, ucjjarojj awquimana Baal sat diosapan altarapa allthapiraquim, uqhamarac uca Baal diosan altarapa jac'ancqui uca koksa qhuchthapiraquim.
26. Sayt'asiñ kollu patansti Diosamataqui mä altara luram. Ucatsti payïri orko vaca catusinsti uca patjjaru mä wilanchäwi sacrificio loktita. Qhuchthapcta uca ajjsarata koka lawanacampiw loktitäta —sasa.
27. Ucatsti Gedeonajj tunca sirvirinacapampejj cunjämtejj Diosajj sisqui uqhamaruw luräna. Jupasti janiw urojj lurcänti jan ucasti arumaquiw luräna awquipana familiaparu, uqhamarac marcanquir jakenacaru ajjsarasina.
28. Khepa arumarji khantatisti marcanquir jakenacajj sartasinsti uñjapjjänwa Baal sat diosan altarapajja allthapita, uqhamaraqui uca altara jac'ana ajjsarata kokasa qhuchthapita uqhama. Uca quipcaraqui uñjapjjänwa machak altararu mä orko vaca sacrificio loktata.
29. Ucatsti maynit maynicamaw jisct'asipjjäna: “¿Qhitisa uqhama lurpacha?” sasa. Ucampis wali thakhasa jiscjjatasinjja yatjjatapjjänwa Joás sat chachan Gedeón yokapa luratapa ucatsti sarapjjänwa Joasan uca.
30. Purisasti sapjjänwa: —¡Irpsunim uca yokamaru, jiwayapjjäwa. Jupawa Baal sat diosan altarapa allthapi, uqhamarac uca altar jac'ancqui uca ajjsarat koksa qhuchthapiraqui! —sasa.
31. Ucampis Joás chachajja jutapqui uca jakenacarojj sänwa: —¿Jumanacasti Baal diosatti sayt'asipjjäta, uqhamarac jupat arjjatasisach nuwasipjjäta? ¡Uqhamasti qhititejj Baal diosaru arjjataña munchi ucajj jichha khantatpacha jiwpan! Baal diosächi ucajja jupa pachpa arjjataspan, uca tucjat altarajj jupancänwa —sasa.
32. Uca urutsti Gedeonarojj Jerobaal sasaw sutichapjjäna, ucampis sapjjaraquïnwa: “Baal diosajj arjjataspan” sasa, Gedeonajj Baal diosan altarapa tincthapiyatap laycu.
33. Ucatsti take madianitanacampi, amalecitanacampi, inti jalsu tokenquirinacampejja mayaqui tantacht'asisawa Jordán jawira maqhatcatanipjjäna. Ucatsti Jezreel sat valleru kamnokapjjäna.
34. Ucampis Diosan ajayupawa Gedeonjjaru jutäna, ucatsti jupajj mä ovejan maysa wajjrapa llamct'äna Abiezer satan familiapanquirinacajja jupampi mayachasipjjañapataqui.
35. Ucampis qhitharaquïnwa yatiyirinaca jawsaniñapataqui Manasés, Aser, Zabulón, Neftalí sat tribu tamanquirinacaru jupampi mayachasipjjañapataqui.
36. Gedeonasti Diosarojj saraquïnwa: “Jumatejj nayaru yanapchitäta Israel marcamaru khespiyañataqui, cunjämtejj juma pachpa siscta uqhamarjama ucajja.
37. Nayasti jichha arumajj mä jisc'a ovej lip'ichi uchawayäjja trigo jawk'añäqui uca chekaru. Arumarji khantatitejj uca jisc'a lip'ichejj ch'aranäni, orakesti wañaquiraquïni ucajja, nayasti yatïwa jumajja nayaru yanapitätawa Israel marcaru khespiyañataqui, cunjämtejj juma pachpa siscta uqhamarjama” sasa.
38. Uqhamapuniw lurasïna. Gedeonasti wali alwata sartasinsti, uca lip'ichitjja mä taza phokha umwa ch'iwrsüna.
39. Ucampis Gedeonajj sascaquïnwa: “Dios Tata, janiw colerasïtati nayana wastatampi yant'atajjata, mayampi suma yatiñajjataqui. Jichha cutinsti lip'ichejja wañaquiscpan, orakesti jurïpan” sasa.
40. Uca arumasti Diosajj uqhamwa luräna. Khepa arumarji alwatasti lip'ichejja wañaquiscänwa, orakequiw wali jurïnjja.

Salmos 49:1-9
1. Takpach marcanaca, aca arunac ist'apjjam, acapachan jaquirinaca, sum ist'apjjam:
2. jan yäkat jakenaca, aytat jakenaca, kamir jakenaca, jan cunan jakenaca.
3. Lacajjajj yatiñ cancañampiw arsuni, amuyt'äwinacajjajj wali amuyt'cayäniwa;
4. säwinac ist'añaruw uchasï; chuymajjan imantat arunacsti arpamp chicaw arsuraquï.
5. ¿Cunatarac jan wali urunac jutquipan ajjsarascästi? ¿Cunatarac timanacajjan muyuntat jicjjatasisast ajjsarascästi?
6. Jupanacajj yänacaparuw chuymap uchapjje, kamir cancañapat jach'a jach'ajj tucupjjaraqui,
7. Janiw qhitis jupa pachpajj khespiyascaspati, janiraquiw khespiyasiñataquejj Diosar kollk churapcaspati.
8. Jaken jacañapajj wali jila alaniwa, janiw cunas alañataquejj cunjjatcaspati,
9. wiñay jacañapataqui, jiwañat khespiñapataqui.

Proverbios 14:20-21
20. Pobrenacasti jake masipansa uñisitawa, ucampis kamirejj wali munataraquiwa.
21. Qhititejj jake masipar jisc'achqui ucajja, juchwa luri, ucampis, ¡cusisiñaniwa qhititejj pobre jaketa qhuyapayasqui ucajja!

Lucas 15:1-10
1. Takeniw impuesto cobririnacampi, juchararanacampejj Jesusar jac'achasipjjäna ist'añataqui.
2. Ucatwa fariseonacampi, ley yatichirinacampejj juparojj c'umipjjäna: —Aca jakejj juchararanacaruw catoke, ucanacampiraquiw mank'e —sasaw sapjjäna.
3. Ucatwa Jesusajj aca uñtasïw toke yatichäna:
4. “¿Qhitis jumanacatjj patak ovejanïsajj, may chhakatïpanjj, llätunc tunc llätuncani pampar jaytawayasajj, janejj chhakat ovej thaktïr jicjjatañcam sarcaspajja?
5. Jicjjatjjasinsti cusisitaw callachipjjaru apasinjje.
6. Utar purjjasinsti take amigonacapa jawsthapisi, uqhamarac uta jac'anacapsa ucat saraqui: ‘Cusisipjjam nayampi, chhakatäcäns uca ovej-jja jicjjatjjtwa’ sasa.
7. Sapjjsmawa, uca pachpawa alajjpachanjj juc'amp cusisiñajj utji mä juchararan arrepientisitapatjja, llätunc tunca llätuncani asqui jakenacajj jan cunats arrepientisipjjañapajj utjqui ucanacat sipansa.
8. “¿Jan ucajj, qhiti warmich tunca sencill kollkenïsajj may chhakayasinjj jan lampar khantayasisajj wali amuyumpi utap pichsusquejj jicjjatañcamajja?
9. Jicjjatasasti amiganacap jawsthapisi, uqhamarac uta jac'anacapsa, ucat jupanacarojj saraqui: ‘Nayamp chic cusisipjjam, chhakatäcän uca kollkjja jichhajj jicjjatasjjtwa’ sasa.
10. Sapjjsmawa, uqhamaraquipï cusisiñajj Diosan angelanacap taypinjj utjejja mä juchararan arrepientisitapatjja.”