A A A A A

Éxodo 7:1-25
1. Ucat Tatitojj Moisesarojj sascaquïnwa: —Nayawa jumarojj uchsma naya lanti faraón jac'ana lurañanacamataqui, ucampis Aarón jilamawa juma lanti parlascani.
2. Jumasti cuntejj nayajj siscäma take ucanacwa Aarón jilamarojj yatiyäta; ucatsti jupawa faraonarojj parlascani, israelitanacaru marcapat antutjjañapataquejja.
3. Ucampis nayawa faraonarojj chuymap kalarayäjja jan munañapataqui, uqhamarac Egiptonjja nayaraquiwa walja muspharcañ uñacht'äwi milagronacjja luraraquëjja.
4. Faraonasti jumanacarojj janiw ist'añ munapcätamti, ucampis nayawa Egiptjjarojj ch'amajj uñacht'ayäjja, ucatsti jach'a muspharcañ cheka luräwinaca uñacht'ayasaraqui, nayaw Israel ejército marcajjaru Egiptot apsuniraquëjja.
5. Cunapachatejj Egiptjjaru ch'amajj uñacht'ayasa Israel marcajjaru uca marcat apsuncäjja, ucqhawa egipcionacajj yatipjjani nayana cheka Tatitu Diosätajja —sasa.
6. Moisesampi, Aaronampejj cunjämtejj Tatitojj siscäna uqhamarjamaw lurapjjäna.
7. Cunapachatejj rey faraonampi parlapcäna ucqhasti Moisesajj quimsakallk tunca maranïnwa, Aaronasti quimsakallk tunca quimsan maraniraqui.
8. Tatitojj Moisesampir, Aaronampirojj parlascaquïnwa:
9. —Faraonatejj ‘Milagro lurapjjam’ sapjjätam ucajja jumasti Aaronaruw säta: ‘Thujruma faraonan nayrakatapar liwnokam’ sasa, uca thujrojja mä catariru tucuñapataqui.
10. Ucatsti Moisesampi, Aaronampejj faraonan ucar sarasinjja cunjämtejj Tatitojj siscäna uqhamarjamaw lurapjjäna. Aaronasti faraonana, uqhamarac jilïri jakenacapan nayrakataparuw thujrupa liwnokäna, ucatsti uca thujrojj mä catariruw tucüna.
11. Uca uñjasinsti faraonajj wali amuyt'an jakenacaru, uqhamarac jupanacan wali yatiri jakenacaruw jawsayanïna, ucatsti uca jakenacajj yatiñanacapampejja quipcaracwa lurapjjaraquïna;
12. jupanacajj sapa mayniw varanacap oraker liwnokapjjäna, ucatsti uca varanacapajj catarinacaruraquiw tucuraquïna. Ucampis Aaronan jach'a thujrupasti wali amuyt'ani jakenacampina, uqhamarac yatiri jakenacan varanacaparojj mank'antänwa.
13. Ucampis faraonajj chuymapjja wali kalarayasïna, janiraquiw ist'añ muncänti cuntejj Tatitojj siscäna uca arunacjja.
14. Ucjjarusti Tatitojj Moisesar parlascaquïnwa: —Faraonasti colerañampi chuymapan kalarayasisajja janiw israelitanacarojj antutañ munquiti.
15. Arumanthi alwatasti, faraonajj cunapachatejj jawiraru sarcani ucqhasti jumajja jicjjatiriw saräta. Ucatjja Nilo sat jawir thiyaru purisajja ucatwa suyt'äta, ucampis cawquïr jach'a thujrumatejj catariru tucqui ucjja apasiraquïtawa.
16. Ucansti aqham sätawa: ‘Hebreonacan Tatitu Diosapawa nayaru qhithanitu jumaru aca yatiyañataqui: ‘Antutjjam marcajjaru sarjjañapataqui jupanacasti wasaranwa nayaru yupaychapjjetani. Ucampis jumajja jichhacamajj janiw ist'añ munctati.
17. Uca laycusti Tatitojj siwa: ‘Jichhawa yatïtajja nayan cheka Tatitu Diosätajja. Cunapachatejj nayajj aca thujrojjampi jawirancqui uca umaru jisctä ucqhajja umanacajj wilaruw tucuni.
18. Jawir umana jaquir chawllanacasa jiwaraniwa, ucat jawirajj wali thujsätap laycusti egipcionacajj ajjtasisajj janiw jawirat umañ munapcaniti.’
19. Ucat Tatitojj Moisesarojj parlascaquïnwa: —Aarón jilamaru aqham sam: ‘Amparamar thujruma ayjjarusina loktam take egiptonquir umanacjjaru, jawiranquiri, k'awanacanquiri, khothañanacanquiri, take tantat umanaca, uqhamarac lawata, kalata lurat tinajanacan uchat umanacajja wilaru tucuñapataqui’ —sasa.
20. Ucatsti Moisesampi, Aaronampejj lurapjjänwa cunjämtejj Tatitojj jupanacar siscäna uqhama. Aaronasti, faraonana, uqhamarac faraonan sirvirinacapan uñjcatawa jach'a thujrupampi jawiranquir umaru jisctäna, ucatsti jawiranquir umajja wilaruw tucüna.
21. Jawiran jaquir chawllanacasti jiwarapjjänwa. Ucampis uca jawirajja wali thujsätap laycusti egipcionacajj janiw ucat umcjjapjjänti, take Egipto orakenquir umanacaw wilaru tucüna.
22. Ucampis Egiptonquir yatiri jakenacajja uca quipcaraquiw lurapjjaraquïna, ucatsti faraonajj chuymapa colerañampi kalarayasisajj janiw ist'añ muncänti cuntejj Tatitojj siscäna ucjja.
23. Ucat faraonajj palacioparuw cutt'jjäna cunatejj pascäna ucar jan yäkasina.
24. Take egipcionacajja jawir thiyaruw phuch'unaca allinokapjjäna ucat k'oma uma apsuñataqui, jawiranquir umajja janiw umt'añjamäcänti uca laycu.
25. Pakallko urunacaw pasjjäna Tatitojj jawiranquir umaru wila tucuycäna uca urutjja.

Éxodo 8:1-32
1. Tatitusti Moisesarojj sänwa: —Faraonan ucar sarasinsti sätawa: ‘Tatitojj aqham siwa: Antutjjam marcajjaru nayar yupaychir sarjjapjjañapataqui.
2. Janitejj antutañ muncäta ucajja, nayajj takpach marcamaruw c'ayranacampi castigäjja.
3. Jawiratsti c'ayranacaw mistsunini, ucanacawa mantapjjani palaciomaru, iquiña utamaru, iquiñanacam patjjaru, sirvirinacaman utanacaparu, take jakenacaman utanacaparu, uqhamarac t'ant'anaca lurapcta uca hornonacarusa.
4. C'ayranacasti mistsupjjaniwa juma pataru, sirvirinacam pataru, uqhamarac take jakenacam pataru.’
5. Tatitusti Moisesarojj sascaquïnwa: —Aaronar sam: ‘Thujruma ayjjarusina amparam loktam jawiranacjjaru uma jalir k'awanacjjaru, uma khothañanacjjaru, ucanacat c'ayranacajj mistsunisa Egipto marcpacharu phokhantañapataqui’ —sasa.
6. Aaronajj amparapwa loktäna Egiptonquir umanacjjaru, ucatsti c'ayranacajja umanacat mistsunisajja Egipto marcpacharuw phokhantäna.
7. Ucampis jach'a yatiri jakenacajja yatiñanacapampejj quipcacracwa lurapjjaraquïna, jupanacasti c'ayranacapjja Egipto orakerojj jutayapjjaraquïnwa.
8. Ucatsti faraonajj Moisesampiru, Aaronampir jawsayanisajja sänwa: —Tatitur mayipjjam c'ayranaca apakañapataqui nayata, uqhamarac jakenacajjata, nayasti jakenacamarojj antutjjäwa Tatitur sacrificio loktir sarjjapjjañapataqui.
9. Ucat Moisesajja faraonarojj saraquïnwa: —Sitaya, ¿cuna horasa mayiñajjsa munta jumataqui, sirvirinacamataqui, uqhamarac jakenacamataquisa c'ayranacajj apakatäñapataqui jumata, uqhamarac palaciomatsa, uqhamat c'ayranacajj jawirancañapataquejja?
10. Faraonasti sänwa: —Kharürpacha mayipjjam —sasa. Ucatsti Moisesajj saraquïnwa: —Lurasiniwa mayitamarjamajja, uqhamatwa yatïta jan yakhajj utjatapa nanacan Tatitu Diosajj-jamajja.
11. C'ayranacasti palaciomatjja jawiraruw sarjjapjjani, janiraquiw jumarusa, sirvirinacamarusa, ni jakenacamarusa coleraycjjapjjätamti.
12. Moisesampi, Aaronampejj faraonan ucat sarjjasinjja Tatituruw mayipjjäna Tatitojj c'ayranaca faraonjjar qhithancatayna uca apakañapataqui.
13. Tatitusti Moisesan mayitaparjamasti luränwa, utanacancqui, pationacancqui, pampanacancqui uca c'ayranacajj jiwarjjapjjänwa.
14. Ucampis jakenacajja jiwat c'ayranacjja monton montona apthapipjjäna, ucatsti uca montonanacajj take chekanraqui thujstjjaraquïna.
15. Ucampis faraonajj jan cuna llaquis ujtcjjatap laycusti chuymapa colerañampi kalarayasisajja janiraquiquiw ist'añjja muncjjänti cuntejj Tatitojj Moisesampiru, Aaronampiru siscäna ucjja.
16. Ucatsti Tatitojj Moisesarojj saraquïnwa: —Aaronar sam: ‘Thujrupampi orak lak'aru jisctpan uca lak'ajj jisc'a chhichhillanqhanacar tucuñapataqui take Egipto marcpachana’ —sasa.
17. Jupanacasti Tatitun arsutaparjamaw lurapjjäna. Aaronajja thujrupampiw orak lak'aru jisctäna ucatsti Egipto marcpachanwa lak'anacajj jisc'a chhichhillanqhanacaru tucusina jakenacaru, uqhamarac take uywanacaru t'akhesiyaraquïna.
18. Jach'a yatiri jakenacajj quipcacracwa jisc'a chhichhillanqhanac tucuyañ munapjjaraquïna yatiñanacapampejja, ucampis janiw puedipcänti. Uccañcamasti jisc'a chhichhillanqhanacajj t'akhesiyascaquïnwa jakenacaru, uqhamarac uywanacarusa.
19. Ucatsti jach'a yatiri jakenacajj faraonarojj sapjjänwa: —¡Acasti Diosan luräwipawa! —sasa. Ucampis faraonajj chuymapa kalarayasisajj janiw ist'añ muncänti cuntejj Tatitojj siscän ucjja.
20. Tatitusti Moisesarojj sänwa: —Faraonasti arumanthejja jawiraruw sarani, ucampis jumajja wali alwata sartasinjja saram aqham siri: ‘Tatitojj siwa: Antutjjam marcajjaru nayar yupaychiri sarjjapjjañapataqui.
21. Janitejj marcajjar antutcäta sarjjañapataqui ucajja, nayasti qhithanïwa take casta wila ch'amsuri jach'a chhichhillanqhanaca jumjjaru, sirvirinacamjjaru, take jakenacamjjaru, utanacamjjaru. Uca jach'a chhichhillanqhanacaw egipcionacan utanacaparu, uqhamarac orakenacarusa phokhantani.
22. Uqham pascani ucqhasti, Gosén sat orakenjja janiw mä jach'a chhichhillanqhas utjcaniti, marcajjajja ucan jacatap laycu. Uqhamatwa yatïta naya Tatitojj uca orakencatajja.
23. Nayasti uñacht'ayäwa marcajjajja mayjätapa, marcamat sipansa, acsti arumanthiw luräjja’ —sasa.
24. Tatitusti arsutaparjamajja luränwa, cunayman wila ch'amsuri jach'a chhichhillanqhanacaw jutasina wal phokhantapjjäna mä kenayar uñtata faraonan palacioparu, sirvirinacapan utanacaparu, uqhamarac take Egipto orakpacharu. Ucatsti uca jach'a chhichhillanqhanacajj take marcpachwa tucjawayapjjäna.
25. Ucatsti faraonajj Moisesampiru, Aaronampir jawsayanisajja sänwa: —Sarapjjam Diosamaru sacrificio loktiri, ucampis janiw aca marcatjja mistupjjätati —sasa.
26. Moisesasti saraquïnwa: —Uqham nanacan lurañanacajjajj janiw walïcaspati. Cawquïr animalanactejj nanacan Tatitu Diosajjaru sacrificio loktapcä ucajja Egipcionacataquejja janiw walïcaspati, jupanacajj animalanacaru yupaychapjjatap laycusti uqham lurañajja janiw walïquiti. Egipcionacatejj nanacaru animalanaca sacrificio loktir uñjapjjetaspa ucajja kalampi c'upjasaw jiwayapjjetaspa.
27. Nanacasti wasararuwa quimsür sararu sarapjjäjja, ucanwa nanacan Tatitu Diosajjarojj sacrificio loktanipjjäjja, cunjämtejj jupajj nanacar sapquitu uqhamarjama.
28. Ucatsti faraonajj saraquïnwa: —Nayasti antutapjjämawa wasararu sarapjjañamataqui, ucana jumanacan Diosamaru sacrificio loktanipjjañamataqui, ucampis janiw wali jayaru sarapjjätati, nayataquis mayipjjaraquïtawa —sasa.
29. Moisesajj saraquïnwa: —Nayasti acata mistuwayasinjja Tatituruw mayëjja, arumanthejja jach'a chhichhillanqhanacajj sarjjañapataqui juma jac'ata, sirvirinacamata, uqhamarac take jakenacamatsa. Ucampis nanac israelitanacarojja janiw engañasipcaquitätati, ni jarc'apjjetätasa Tatituru sacrificio loktir nanacajj sarapjjañanacajjatjja —sasa.
30. Ucampis Moisesajja, faraonan ucat sarjjasinjja Tatituruw mayïna.
31. Tatitojja Moisesan mayitap ist'asinjja take jach'a chhichhillanqhanacwa apakäna faraonata, sirvirinacapata, uqhamarac take jakenacatsa, janiw maya jach'a chhichhillanqhas jilt'cänti.
32. Ucampis faraonajj chuymapa kalarayasisajj janiraquiquiw israelitanacar antutañ muncjjaraquiquïnti.

Salmos 17:1-7
1. Tatay, chekapat mayisitajjarojj ist'aquimaya, arnakasitajjarojj jaysaquimaya, mayisitajjarus iyawsaquimaya, janiw c'ari arunacamp mayiscsmati.
2. Nayar juchañchañajj jumat jutpan, jumaw chekapäc uc yattajja.
3. Jumaw takpach amuyunacajj yattajja, arumanacaw chuymajj uñaker jutista; ninampjamaw yant'ista, janiraquiw cuna ñankhsa jicjjatquistati.
4. Lacajjajj janiw c'arinac arsquiti, cunjämtejj jakenacajj parlapqui uqhama; ch'ajjwañ thaquinacat jithektasta, juman arsutamarjamaw phokta.
5. Cayunacajjajj thaquiman thurt'ataw sarnake, chellktanacajjasti janiw thaquimat jithektquiti.
6. Diosajjay, ist'asirïtam laycuw mayisinsma, naya tokeruy jinchum alcatanim, arunacajjar ist'araquim.
7. Qhuyapayasiñaman muspharcañanacap uñacht'ayita, ch'amamar take chuymamp iyawsirirojj jumaw timanacapat arjjattajja.

Proverbios 5:15-20
15. “Jumasti warmimampi jacasim, cunjämatejj maynejj jupa pachpan phuch'upan umapata umasquejja uqhama.
16. Jan wawanïcamti callenacan jan wali sarnaker warminacampejja, umanacamjja thaquirus wartcasman uqhama.
17. Wawanacamasti warmiman wawanacapäñapawa, janiw yakhanacampejja, ¡cunjämatï phuch'usa, umasa jumanquejja uqhama!
18. ¡Juman warmimasti bendecitäpan! ¡Cusisitaqui jacasim waynäcasin warmimampejja!
19. ¡Warmimasti suma muncaña tarujar uñtatawa! ¡Jumarusti munasipunïtamwa! ¡Munasiñapampiwa jumarojj muyuntayätam!
20. Munat wawajja, ¿cunataquirac yakha warmi thakätasti, jan walt'añaru mantañamataquisti? ¿Cunataquirac yakha warmiru khomätasti?

Mateo 19:1-30
1. Take acanac arsutatjja Jesusajj Galileatjja Judearuw sarjjäna, cawquïritejj Jordán jawirat inti jalsu tokencquis ucsaru.
2. Walja jakenacaraquiw juparojj arcäna, ucansti usutanacarojj c'umaraptayänwa.
3. Ucanjja mä kawkha fariseonacaraquiw Jesusaru jac'achasipjjäna jupar jan walt'ayañataqui, ucat jisct'apjjäna: —¿Waliquiti mä jakejj warmipampi jaljtañapajj cunïpansa? —sasa.
4. Jupasti ucjjarojj saraquïnwa: —¿Janit jumanacajj Diosan arunacapana leet'apcta, qhititejj kalltan lurcäna ucajj chacha warmi lurqui ucjja?
5. Saraquïnwa: ‘Ucatwa chachajj awquiparu taycaparu jaytanucusin warmipampi mayachasjjani, panipasti mayaquëjjaraquiniwa.’
6. Uqhamasti janiw paninïcjjapjjeti jan ucasti mayaquëjjapjjewa. Uqhamajj jakejj janiw jaljtaycaspati cuntejj Diosajj mayachquis ucjja.
7. Ucatsti jisct'asipcaquïnwa: —¿Cunataraqui Moisesasti warmiru jaljtañ papel loktasin jaytanucuñ yatichänsti?
8. Jesusasti saraquïnwa: —Jumanacan wali kala chuymanïtam laycuwa Moisesajj warmimp jaljtañjja jaytawayapjjtamjja, ucampis kalltanjja janiw uqhamäcänti.
9. Nayasti sapjjsmawa, qhititejj warmiparu jan wachoka juch lurquipana apanucojja, ucat yakhampi casarasiraquejja, uca jakejj wachoka juchwa luri. [Uca pachparaquiw jaljtat warmimpi casarasirejja wachoka jucha luraraqui.]
10. Discipulonacapasti ucapachajj sapjjänwa: —Uqhamajj mä jaketejj warmipampi uqham utjañapächi ucajja, janiw waquisquiti casarasiñajja —sasa.
11. Jesusajj saraquïnwa: —Janiw takenis suma amuyt'apcaspati, jan ucasti take qhitinacarutejj Diosajj amuyt'a churqui ucanacaquiwa.
12. Cunayman amuyunacaraquiw utji jaken jan casarasiñapataquejja. Yakhepanacajja jan casarasiñataquiw naci, mayninacasti jake masipan uqham jan casarasquiri tucuyataraquiwa, mayninacasti Diosan reinop laycuw jan casarasipcaraquiti. Qhititejj uqham tucurjamächi ucajj uqham tucpan —sasa.
13. Mä kawkha wawanacaracwa Jesusan ucaru irpanipjjäna, jupanacjjaru Jesusajj amparapampi lokjjatañapataqui ucat orañapataquiraqui. Ucampis discipulonacapajj uqham uñjasinjja tokenokapjjänwa uca wawa irpanirinacarojja.
14. Jesusasti saraquïnwa: “Wawanacajj nayan ucar jutasipcpan, janirac jarc'apjjamti, Diosan reinopasti jupanacjamataquiwa” sasa.
15. Jesusasti amparapampi uqham wawanacaru lokjjatasinwa yakha tokeru sarawayjjäna.
16. Ucapachajj mä waynaraquiw Jesusan ucaru jutäna, ucatsti jisct'araquïnwa: —Suma Yatichiri, ¿cuna asquinac lurañajjas waquisi nayan wiñay jacañanïñataquejja? —sasa.
17. Jesusasti sänwa: —¿Cunatsa ‘asquinacjjat’ jisct'ista? Mayaquiw asquejja utji, ucasti Diosawa. Ucampis wiñay jacañarutejj mantañ munstajja, camachinac phokham.
18. Waynasti saraquïnwa: —¿Cawquïrinacsa? —sasa. Jesusasti ucjjarojj sänwa: —‘Jan jiwayamti, jan wachoka jucha luramti, jan lunthatamti, janirac qhitirus c'arintamti,
19. awquimaru taycamaru jach'añcham, uqhamarac jake masimarusti juma quipcarjam munaraquim’ —sasa.
20. Waynasti ucjjarojj saraquïnwa: —Take acanacjja wawatpachwa phokhascta. ¿Cunas juc'ampi lurañajjajj waquisi? —sasa.
21. Jesusasti sänwa: —Jumatejj wali sumäñ munstajja, saram, ucatsti take cunatejj utjtam ucanac aljaranim, pobrenacar churaraquim, ucatwa alajjpach marcan wali suma yänacanïyäta, ucatsti nayar arquita —sasa.
22. Waynasti uca arunac ist'asinjja wali llact'ataw sarjjäna wali kamirïtap laycu.
23. Jesusasti discipulonacaparojj saraquïnwa: —Khanacwa sapjjsma, wali ch'amawa mä kamir jaken Diosan reinopar mantañapajja.
24. Sapjjaracsmawa, juc'amp jasaquiwa mä camellon aguja nayra toke passuñapajja, mä kamir jaken Diosan reinopar mantañapat sipana.
25. Discipulonacapasti take acanac ist'asinjja wal muspharasipjjäna, jupanacpuras jisct'asipjjaraquïnwa: —¿Qhitipunirac uqhamast khespitäspasti? —sasa.
26. Jesusasti jupanacar uñtasinjja sänwa: —Jakenacataquejj take acanac lurañajj wali ch'amawa, ucampis Diosataquejj janiw ch'amäquiti —sasa.
27. Pedrosti ucjjarojj sänwa: —Tata, nanacajj take cunanacatejj utjapquitän ucanacjja apanucunipjjtwa, ucatsti jumaruw arcapjjsma. ¿Cunarac nanacataquisti utjani? —sasa.
28. Jesusasti juparojj sänwa: —Khanacwa sapjjsma, cunapachatejj take cunas wasitat machak lurascan ucqhajja, cunapachatejj Jaken Yokapajj konuñapjjar kont'ascan ucqhajja, jumanacan nayaru arcatam laycojja tunca payan konuñaruraquiw kont'asipjjäta ucat tunca payani Israel tribüquis ucar taripañataqui.
29. Uqhamaraqui take qhitinacatejj jaytanucuni utanacapa, jilanacapa, cullacanacapa, taycapa, awquipa, wawapa uqhamarac orakepsa naya laycu ucanacajja, patac cuti ucqhampwa catokapjjani, uqhamaraqui wiñay jacañampi.
30. Ucampisa qhitinacatejj jichhürun nayrancqui ucanacatjja waljaniw khepancapjjani, khepanquirinacatsti waljaniraquiw nayrancjjapjjani.