A A A A A

Éxodo 5:1-23
1. Moisesampi, Aaronampejj Faraonan ucar mantasinjja sapjjänwa: —Israelan Tatitu Diosapajja aqham siwa: ‘Marcajjaru antutam wasararu sarjjapjjañapataqui, ucanwa nayaru cusisita yupaychapjjetani’ —sasa.
2. Ucat faraonasti sänwa: —¿Qhitisa Tatitojja, arup ist'añajjataquejja, uqhamarac israelitanacarus sarjjapjjañapataqui antutañajjataquejja? Janiw nayajj Tatiturojj uñt'cti, uca laycusti janiw antutquiristti israelitanacaru sarjjañapataquejja.
3. Jupanacasti parlasipcaquïnwa: —Hebreonacan Diosapawa nanacaru jicjjatapjjetu, uca laycusti nanacajj sarjjapjjäwa wasaranjama quimsür sararu, ucanwa nanacan Tatitu Diosajjarojja sacrificionac loktanipjjäjja. Jupasti capasaquiw nanacarojj mutuyapjjetaspa usumpi, jan ucajj espadampi jiwarayasina.
4. Ucampis Egiptonquir reyejja sänwa: —Moisés, Aarón, ¿cunatsa jumanacajj, jakenacarojj irnakasipquipana suyt'ayapjjta? ¡Jichhasti cuttjjapjjam ucatsti irnakasipcaquim!
5. Ucat faraonajj sascaquïnwa: —Aca marcansti israelitanacajj waliw mirantjje, ucampis jumanacajj ¡irnakañanacapatti suyt'ayapjjäta! —sasa.
6. Faraonajj uca urpachawa jilïri lurayirinacarojj, uqhamarac tamanacaru apnaker jilïrinacarusa saraquïna,
7. aqham sasa: —Janiw jumanacajj israelitanacarojj jichhunaca nayrjama churcjjapjjätati adobenaca lurapjjañapataquejja, jan ucasti jupanaca sarapjjpan jichhunaca aptasiri.
8. Ucampis mayipjjätawa kawkha adobenactejj jichhacama lurapqui ucatjja, janiw mayas menosäñapäquiti. Jupanacasti jayranacäpjjewa ucatwa jach'at arsusipjje: ‘Nanacajj sarjjapjjä Diosajjaru sacrificionac loktiri’ sasa.
9. Jumanacasti, wali lurayapjjam uca jakenacaru, uqhama wali lurañanacampejja janiw ist'apcaniti jan wali c'ari arunacjja.
10. Ucatsti jilïri lurayirinacampi, uqhamarac tamanac apnaker jilïrinacampejj sarjjasinjja israelitanacarojj sapjjänwa: —Faraonajj ordenapjjetuwa, jichhajj janiw nanacajj jichhunac churcjjapjjämati.
11. Jan ucasti jumanacaw sarapjjäta cawqhatsa jichhunac apthapisiri. Ucampisa kawkha adobtejj nayrajj lurapjjerïcta ucqhacpunwa lurasipcäta janiw menosäcaniti —sasa.
12. Ucatsti israelitanacajja Egiptonjja take tokeruw sarapjjäna cebada ch'allpha t'unanaca thakeri, ucanaca jichhu lanti uchañataqui.
13. Ucampis adobe lurayir munañani jilïrinacajj jariyapjjänwa: “Janc'aqui tucuyapjjam sapürutac churatäpcta uca lurañanacama, cunjämatejj jichhunaca churatäpcayäta ucqhajj lurapjjerïcayätajja uqhama” sasa.
14. Uqhamarac jawk'apjjaraquïnwa, israelit tamanacat encargatäpqui uca lurayir jilïrinacarusa: —¿Cunatsa jan phokhapjjta wasürusa ni jichhürusa kawkha adobenacatejj nayrajj lurapjjericäyäta uqhamjja? —sasa.
15. Ucampis israelitanacan jilïrinacapajj faraonar quejasiriw sarapjjäna, ucatsti sapjjaraquïnwa: —¿Cunatsa uqhama sirvirinacamar lurta?
16. Sirvirinacamarojja janiw jichhunacsa churcjjapjjeti, ucampis waliraquiw jariyapjjaraquitu ‘Janc'aqui adobenac lurapjjam’ sasa, uqhamarac jawk'apjjaraquituwa; ucampis ¡juman jakenacamaw juchanïpjjejja! —sasa.
17. Ucat faraonajj sänwa: —Jumanacasti jayranacat sipansa wali jayranacäpjjtawa, ucatwa sapjjtajja: ‘Sarjjapjjä Tatitur sacrificionaca loktiri’ sasajja.
18. ¡Irnakeri sarapjjam! Jumanacarusti janiw jichhunac churapcätamti, ucampis kawkha adobtejj nayrajja catuyapjjericäyäta ucjracwa jichhajj catuyapjjaraquïta.
19. Ucampis israelitanacan jilïrinacapajj waliw llacthapisipjjäna, sapüru adobe lurañanacamajj pachpaquïscaniw siri ist'asinjja.
20. Ucat faraonampi parlaniwayasa mistunjjasinsti jiquisipjjaraquïnwa Moisesampi, uqhamarac Aaronampi cuna, jupanacasti suyascaraquitaynawa.
21. Jupanacarusti sapjjänwa: —Tatitusti jumanacarojj mutuypan cuntejj lurapcta uca uñjasinjja. Jumanacawa juchanïpjjtajja faraonampi, jilïri lurayirinacapampi uqhama nanacar uñisiñapataquejja. Uqhamarac jumanacaraquiw espadanacsa aptayapjjta nanacar jiwarayañapataquejja.
22. Moisesasti Tatituruw mayïna: —¡Dios Tata! ¿Cunatsa aca marcamaru jan wali lurta? ¿Cunatsa nayarus qhithanista?
23. Cunapachattejj faraonampi sutimat parlir sarcta uca urutjja jupajj juc'ampiw marcamarojj t'akhesiyi, ucampis jumajj janiw cunsa lurctati khespiyañataquejja —sasa.

Éxodo 6:1-30
1. Ucat Tatitusti Moisesarojj saraquïnwa: —Jichhaw uñjätajja cuntejj faraonampi lurcä ucjja. Cunapachatejj nayajj ch'amajja uñacht'aycä ucqhaquiw, marcapat sarjjapjjañamataqui antutapjjätamjja. Ucampis janiw sariricti antutapcätamjja, jan ucasti jupa pachpawa marcapat sarjjapjjam sapjjätamjja.
2. Diosasti Moisesar parlasinjja sänwa: —Nayätwa TATITOJJA.
3. Nayawa uñsttjja Abrahamaru, Isaacaru, Jacoboru, take ch'aman Dios sat sutimpi. Ucampis nayajja jupanacarojj TATITU sat cheka sutejjampejj janiw uñt'ayascti.
4. Uqhamarac jupanacampejja mä suma amtäwiruraquiw mantapjjaracta. Ucat arsuyätjja Canaán orake jupanacar churañataqui, cawqhantejj mä urunacajj jayanquir jakenacjama jacapcäna uca orake.
5. Ucampis israelitanacaru arnakasir ist'asina, uqhamarac egipcionacan sinti t'akhesiyasa irnakayatanacap uñjasinjja amtastwa mä suma amtäwiru mantatajja.
6. Jichhasti saram, israelitanacarojj aqham sätawa: ‘Naya Tatituwa khespiyapjjäma t'akhesis sirviñata, uqhamarac egipcionacajj sinti ch'ama irnakañanaca churapctam ucatsa, jach'a ch'amajja uñacht'ayasa, uqhamarac cheka asqui cancañajjampi.
7. Jumanacarusti nayan marcajjwa tucuyapjjäma, ucatsti nayawa jumanacan Diosamäyäjja. Uqhamatwa jumanacajj yatipjjäta nayajj jumanacan Tatitu Diosamätajja, uqhamat nayajj egipcionacan wali ch'ama lurañanacampi t'akhesiyapctam ucanacata khespiyätajja.
8. Uqhamaraquiw irpapjjäma cawqha oraktejj Abrahamaru, Isaacaru, Jacoboru churañatac arscäyäta ucaru. Ucatsti naya Tatituwa uca orakjja jumanacarojj dueño orakenacamataqui churapjjäma’ sasa.
9. Ucatsti Moisesajj israelitanacaruw parläna, ucampis jupanacajja janiw Moisesarojj ist'añ munapcänti, jupanacajj wali mayjt'atäpjjänwa sinti ch'ama lurañanacampi t'akhesiyatajja.
10. Ucampis Tatitojj Moisesarojj parlascaquïnwa:
11. —Faraonar parliri saram, israelitanacaru antutjjpan Egipto oraket sarjjapjjañapataqui —sasa.
12. Ucampis Moisesajj Tatiturojj saraquïnwa: —Janiw israelitanacas ist'apquituti, ¿cunjämaraqui faraonasti ist'itani? Nayasti janiw suma parlirïcti —sasa.
13. Ucatsti Tatitojj Moisesampi, Aaronampi parlasinjja yatiyäwi arunac churäna israelitanacataqui, uqhamarac Egiptonquir faraonataquisa, jupanacajj israelitanaca Egipto marcat apsuniñapataqui.
14. Acanacänwa nayra awquinacapan familiapanquir jilïrinacan sutinacapajja. Israelan, Rubén sat jilïr wawapan wawanacapajj acanacänwa: Hanoc, Falú, Hezrón, Carmi ucanaca, jupanacasti Rubenan familianacapänwa.
15. Simeonan wawanacapasti acanacaraquïnwa: Jemuel, Jamín, Ohad, Jaquín, Zohar, Saúl ucanaca, jupanacajja mä cananeonquir warmin wawanacapänwa, jupanacasti Simeonan familianacapänwa.
16. Levi chachasti patac quimsa tunca pakallkon maraw jacäna, wawanacapan sutinacapasti jilïrit sullcacamajj acanacänwa: Gersón, Coat, Merari ucanaca.
17. Gersonan wawanacapasti: Libni, uqhamarac Simei satanacaraquïnwa.
18. Coat chachasti patac quimsa tunca quimsani maraw jacaraquïna, wawanacapasti acanacänwa: Amram, Izhar, Hebrón, Uziel ucanaca.
19. Merari chachan wawanacapasti: Mahli, Musi satanacaraquïnwa. Take acanacawa Leví sat chachan familianacapajja jilïrit sullcacama.
20. Amram sat chachasti Jocabed sat tiapampiw casarasïna, ucatsti jupanacan wawanacapajja Aarón, uqhamarac Moisés ucanacänwa. Amramasti patac quimsa tunca pakallkon maraw jacaraquïna.
21. Izhar satan wawanacapasti: Coré, Nefeg, Zicri satanacaraquïnwa.
22. Uziel chachan wawanacapasti: Misael, Elzafán, Sitri satanacaraquïnwa.
23. Aaronasti, Aminadab sat chachan Elisabet phuchapampiw casarasïna. Aca Aaronan warmipan jilapasti Naasón sataraquïnwa. Aaronan wawanacapasti: Nadab, Abiú, Eleazar, Itamar satanacänwa.
24. Coré chachan wawanacapasti: Asir, Elcana, Abiasaf satanacaraquïnwa. Jupanacasti Coré chachan familianacapänwa.
25. Aaronan, Eleazar sat yokapasti, Futiel sat chachan maynïr phuchapampiw casarasïna. Ucatsti jupanacan wawapasti Finees satänwa. Take acanacawa Levitanacan sapa familiancqui uca awquinacapan jilïrinacapajja.
26. Acanacasti Aarón, uqhamarac Moisés pachpawa, jupanacaruw Tatitojj jawsäna israelitanaca Egiptot apsupjjañapataqui, mä jach'a ejercitor uñtata.
27. Aarón, uqhamarac Moisés pachparaquiw Egiptonquir faraón reyir parlapjjaraquïna israelitanaca uca marcat apsunjjañapataqui.
28. Tatitusti mä uru Moisesaru Egipton parlasinsti,
29. saraquïnwa: —Nayätwa Tatitu Diosajja. Jichhasti Egiptonquir faraón reyiru cuntejj nayajj siscäma ucanaca yatiyanim.
30. Ucatsti Moisesajj saraquïnwa: —Tata, nayajj janiw sum parlirïcti, ucasti, ¿cunjämaraqui faraonasti nayarojj ist'itaspa?

Salmos 16:7-11
7. Tatiturojj nayar irpatapat jach'añchä, arumanacamppachaw chuymajj mankhan chekachitu.
8. Nayajj Tatitump chicapuniw sarnakascta, jupaw cupëjjajjanqui, janiw cunas tincuyquitaniti.
9. Ucat chuymajjajj walpun cusisi, ajayojjas cusisi, janchejjas samararaqui.
10. Jumajj janiw jiwar catjjaruyquitätati janiraquiw arquiriman janchip ñusantañaps muncätati.
11. Jumaw jacañ thac uñacht'ayitäta, nayrakataman jach'a cusisiñaw utji; jac'amansti wiñay cusisiñaw utjaraqui.

Proverbios 5:7-14
7. “Munat wawajjay, ist'itaya, jan sarakamti nayan suma ewjja arunacajjatjja.
8. Jan wali warmit jithektam; jan uta puncuparus jac'achasimti,
9. uqhamata kamir cancañamjja yakhanacar jan churañamataqui, jicjjatasitamsa jan uñt'ata jakenacaru jan churañamataqui.
10. Uca jan uñt'ata jakenacajj ch'amamp lurctas ucanacampi jan phokt'asiñapataqui.
11. Jan ucasti kheparojj jachañaquiw wact'ätam, uccañcamasti cuerpomajj juc'at juc'atjamwa aynacht'jjaraquini.
12. Ucatsti ucqhaquiwa jumajj sätajja: ‘¡Janiqui yatichäwi arunacar jisc'achcpachänti! ¡Janiqui chekachäwi arunacarus apanucpachänti!
13. ¡Cunataraqui jan ist'cpachätsti qhitinacatejj nayar yatichapquitäna, uqhamarac sumar irpaña munapquitäna ucanacarusti!
14. ¡Nayasti niyapuniw jan walt'añar purta, take jakenacan nayrakatapana!’ sasa.

Mateo 18:21-35
21. Ucapachaw Pedrojj sartasina Jesusarojj jisct'äna: —Tata, cunapachatejj jilajjajj cuna jan walsa luritan ucajja, ¿kawkha cutis nayajj uca juchapatjja perdonäjja? ¿Pakallk cutcamati? sasa.
22. Jesusasti saraquïnwa: —Janiw pakallk cuti siscsmati, jan ucasti, pakallk tunca pakallko cuti sismawa —sasa.
23. “Diosan reinopajj cunjämtejj mä reyejj jacthapiñ muni sirvirinacapampi ucampi sasiwa.
24. Cunapachatejj jacthapiña kalltcäna ucqhajja, mayni walja millonanac manuniruw irpani.
25. Uca sirviristi janiw cunampis phokherjamäcänti. Reyejj ucjjarojj siwa: ‘Warmipamppach wawanacapamppach take cunanacapamppach esclavot aljantatäpan, uqhamat uca manupajj phokhatäñapataqui’ sasa.
26. Ucapachaw sirvirejja quillt'asisin uca reyin nayrakataparojj achict'asi: ‘Tata, mä juc'a suyt'aquita, nayasti pagjjaquïmawa’ sasa.
27. Reyisti uqham achict'asipanjja qhuyapt'ayasïnwa, take uca manupjja perdonänwa, jupasti sarawayjjänwa.
28. “Uca manut perdonayasir sirviristi, ucat sarcasinjja jicjjataraquïnwa yakha sirvir masiparu. Ucasti manuraquïtaynawa mä kawkha kollke. Cuncat catusinwa juparojj niya jiwayirjam saraqui: ‘¡Pagjjet manüquistas uca!’ sasa.
29. Uca sirviri masipasti pamparuw quillt'asi, ucat achict'asiraqui: ‘Tata, mä juc'a suyt'aquita, nayasti pagjjaquïmawa’ sasa.
30. Ucampis maynejj janiw muncänti, ucatwa carcelaru llaventayi jupar uca manupata phokhañapcama.
31. Mayni jupamp chica sirvirinacajj uc lurir uñjaraquïnwa. Uqham luratapatsti walirac llaquisipjjäna, ucatwa take ucanac reyiru yatiyapjje.
32. Reyisti jawsayiwa ucatsti saraquiwa: ‘¡ñankha lurir jake! Nayajj perdonsmawa take manumatjja achict'asitam laycu.
33. Jumajj qhuyapt'ayasiñamänwa uca sirviri masimatjja cunjämtejj nayajj jumamp lurcta uqhama’ sasa.
34. Ucapachawa reyejj wal colert'asïna, ucatsti t'akhesiyaraquïnwa take uca manupa pagañapcama.
35. Jesusasti aqham sänwa: Uqhamaraquiw alajjpachanquir Awquejjajj jumanacampejj luraraquini, janitejj take chuyma perdonapcät ucajja” sasa.