← 2 4 →

Amos 3

1

ای ائسرايئل اؤولادلاري، ربّئن سئزئن ضئدّئنئزه ددئيي سؤزو اِشئدئن! رب مئصئر تورپاغيندان چيخارتديغي بو نسلئن هاميسينا بله ديئر:

2

«يِر اوزونده‌کي بوتون نسئللرئن آراسيندا فقط سئزي سِچمئشم؛ اونا گؤره ده بوتون تقصئرلرئنئز اوچون سئزي جزالانديراجاغام.»

3

ائکي نفر راضيلاشيب گؤروشمَسه‌لر، بئرلئکده مگر يول گِدَرلر؟

4

شئکاري اولمايان شئر مِشه‌ده مگر نعره چکر؟ هچ نه شئکار اتمه‌مئش جاوان آصلان يوواسيندا مگر نَرئلده‌ير؟

5

تله قورولماميشسا، يرده‌کي تله‌يه مگر قوش دوشَر؟ بئر شي توتمايان تله يِرئندن مگر آتيلار؟

6

شهرده کَره‌ناي چالينسا، خالق مگر قورخويا دوشمَز؟ اگر رب بلا گؤندرمه‌سه، هانسي بئر شهره مگر بلا گلر؟

7

حقئقتن، پروردئگار رب قولو اولان پيغمبرلره اؤز نئيّتئني آچمادان هچ نه اتمئر.

8

شئر نعره چکئب، کئم اوندان قورخماز؟ پروردئگار رب دانيشيب، کئم نبئلئک اتمز؟

9

اَشدودون قالالاريندا، مئصئر تورپاغينين قالالاريندا بله اعلان ادئن: «سامئره داغلارينين اوستونه ييغيلين. اوراداکي بؤيوک قاريشيقليغي، اونون ائچئنده‌کي ظولملري گؤرون.»

10

رب بويورور: «لاکئن اونلار دوز ائش گؤرمه‌يي باجارميرلار. اونلار قالالارينا قدّارليق و قارت ييغيرلار.»

11

اونا گؤره ده پروردئگار رب بله ديئر: «بئر دوشمن، بلی بئري گلئب اؤلکه‌ني موحاصئره‌يه آلاجاق، سني گوجدن سالاجاق، قالالارين قارت اولوناجاق.»

12

رب بله ديئر: «چوبان شئر آغزيندان نجه ائکي بود سومويو، و يا قولاغين بئر پارچاسيني چکئب قورتارير، سامئره‌ده ياتاق گوشه‌لرئنده، دئوان ياستيقلاريندا اوتوران ائسرايئل اؤولادلاري دا اِلَجه خئلاص اولاجاقلار.

13

قولاق آسين و يعقوب نسلئنئن ضئدّئنه شهادت ورئن!» قوشونلار تاريسي پروردئگار رب بله ديئر.

14

«من ائسرايئللی‌لري تقصئرلرئنه گؤره جزالانديراجاغيم گون، بِيت‌ائلده‌کي قوربانگاهلاري دا جزالانديرجاغام. او قوربانگاهين بوينوزلاري کَسئلئب يِره توللاناجاق.

15

من قيشلاق اِولرئني يايلاق اِولري ائله بئرلئکده ييخاجاغام، فئل دئشي ائله بَزَنمئش اِولر داغيلاجاق، بؤيوک کوشکلر وئران قالاجاقلار.» رب بله بويورور.

Azerbaijan Bible 2008
Southern Azeri translation. Copyright © 2008 Elam Ministries