ការជ្រើសរើសព្រះគម្ពីរ
គម្ពីរសញ្ញាថ្មី
ខ្មែរព្រះគម្ពីរ 1954

១ ធីម៉ូថេទី ៥

កុំ​ស្ដី​បន្ទោស​មនុស្ស​ចាស់​តឹងរ៉ឹង​ពេក តែ​ត្រូវ​ទូន្មាន​គាត់​ទុក​ដូច​ជា​ឪពុក ត្រូវ​ទូន្មាន​ក្មេងៗ​ទុក​ដូច​ជា​ប្អូន

ទូន្មាន​ស្ត្រី​ចាស់ៗ ទុក​ដូច​ជា​ម្ដាយ និង​ស្ត្រី​ក្មេងៗ​ទុក​ដូច​ជា​ប្អូន ដោយ​ចិត្ត​បរិសុទ្ធ​ទាំង​ស្រុង។

ត្រូវ​ជួយ​ស្ត្រី​មេម៉ាយ​ណា​ដែល​គ្មាន​ទី​ពឹង​។

ប្រសិន​បើ​ស្ត្រី​មេម៉ាយ​ណា​មាន​កូន ឬ​មាន​ចៅ ត្រូវ​អោយ​កូន​ចៅ​ទាំង​នោះ​រៀន​បំពេញ​ករណីយកិច្ច​របស់​ខ្លួន​ចំពោះ​ក្រុម​គ្រួសារ និង​ចេះ​សង​គុណ​ឪពុកម្ដាយ ធ្វើ​ដូច្នេះ ទើប​បាន​គាប់​ព្រះហឫទ័យ​ព្រះជាម្ចាស់។

ចំពោះ​ស្ត្រី​មេម៉ាយ​ណា​ដែល​គ្មាន​ទី​ពឹង រស់​នៅ​តែ​ម្នាក់​ឯង ស្ត្រី​មេម៉ាយ​នោះ​សង្ឃឹម​លើ​ព្រះជាម្ចាស់ ហើយ​ព្យាយាម​ទូលអង្វរ និង​អធិស្ឋាន*​ទាំង​យប់​ទាំង​ថ្ងៃ។

រីឯ​ស្ត្រី​មេម៉ាយ​ណា​ដែល​គិត​តែ​ពី​ស្រើបស្រាល ថ្វីដ្បិត​តែ​នៅ​រស់​ក៏​ដោយ ក៏​ហាក់​ដូច​ជា​ស្លាប់​ដែរ។

អ្នក​ត្រូវ​ដាស់​តឿន​នាង​តាម​សេចក្ដី​ទាំង​នេះ ដើម្បី​កុំ​អោយ​នាង​មាន​កំហុស។

អ្នក​ណា​មិន​រវល់​ថែ​ទាំ​សាច់ញាតិ​របស់​ខ្លួន ជា​ពិសេស មិន​ថែ​ទាំ​អ្នក​ដែល​នៅ​ក្នុង​ក្រុម​គ្រួសារ​របស់​ខ្លួន​ផ្ទាល់ អ្នក​នោះ​បាន​ក្បត់​ជំនឿ​របស់​ខ្លួន ហើយ​អាក្រក់​ជាង​អ្នក​មិន​ជឿ​ទៅ​ទៀត។

ស្ត្រី​ដែល​អ្នក​ត្រូវ​រាប់​បញ្ចូល​ទៅ​ក្នុង​បញ្ជី​ស្ត្រី​មេម៉ាយ តោង​មាន​អាយុ​ពី​ហុកសិប​ឆ្នាំ​ឡើង​ទៅ ហើយ​ធ្លាប់​មាន​ប្ដី​តែ​មួយ​ប៉ុណ្ណោះ។

១០

គាត់​ត្រូវ​មាន​ឈ្មោះ​ថា​បាន​ប្រព្រឹត្ត​អំពើ​ល្អ គឺ​បាន​អប់រំ​ចិញ្ចឹម​កូន​ចៅ បាន​ទទួល​ភ្ញៀវ​បាន​លាង​ជើង​ជូន​ប្រជាជន​ដ៏វិសុទ្ធ* បាន​ជួយ​ធុរៈ​អ្នក​ដែល​មាន​ទុក្ខ​លំបាក និង​យក​ចិត្ត​ទុក​ដាក់ ប្រព្រឹត្ត​អំពើ​ល្អ​សព្វ​បែប​យ៉ាង។

១១

ចំពោះ​ស្ត្រី​មេម៉ាយ​ដែល​នៅ​ក្មេង​វិញ កុំ​ចុះ​ក្នុង​បញ្ជី​ឡើយ ដ្បិត​នៅ​ពេល​ដែល​នាង​ស្រើបស្រាល​ចង់​បាន​ប្ដី​ទៀត​នោះ នាង​មុខ​ជា​ដាច់​ចេញ​ពី​ព្រះគ្រិស្ដ​មិន​ខាន

១២

ហើយ​បណ្ដាល​អោយ​ខ្លួន​មាន​ទោស ដោយ​ផ្ដាច់​ពាក្យ​ដែល​ខ្លួន​បាន​សន្យា​ពី​មុន។

១៣

មួយ​វិញ​ទៀត ពួក​នាង​មិន​ធ្វើ​ការ​អ្វី​ទេ គឺ​មាន​ទម្លាប់​ដើរ​ពី​ផ្ទះ​មួយ​ទៅ​ផ្ទះ​មួយ។ ពួក​នាង​មិន​គ្រាន់​តែ​អត់​ធ្វើ​អ្វី​ប៉ុណ្ណោះ​ទេ គឺ​ថែម​ទាំង​និយាយ​ប៉ប៉ាច់ប៉ប៉ោច និយាយ​បេះបួយ និង​និយាយ​ពី​ការ​ផ្សេងៗ​ដែល​មិន​ត្រូវ​និយាយ។

១៤

ហេតុ​នេះ ខ្ញុំ​ចង់​អោយ​ស្ត្រី​មេម៉ាយ ដែល​នៅ​ក្មេង​រៀបការ​សា​ជា​ថ្មី​អោយ​មាន​កូន​ចៅ និង​មើល​ការ​ខុស​ត្រូវ​ក្នុង​ផ្ទះ​របស់​ខ្លួន​ទៅ ដើម្បី​កុំ​អោយ​អ្នក​ប្រឆាំង​មាន​ឱកាស​ចាប់​កំហុស​បាន​ឡើយ

១៥

ដ្បិត​មាន​នាង​ខ្លះ​បាន​ឃ្លាត​ចាក​ពី​មាគ៌ា​ល្អ បែរ​ទៅ​តាម​មារ*​សាតាំង​រួច​ទៅ​ហើយ។

១៦

ប្រសិន​បើ​ស្ត្រី​ម្នាក់ ដែល​ជា​អ្នក​ជឿ មាន​ស្ត្រី​មេម៉ាយ​ខ្លះ​ក្នុង​ក្រុម​ញាតិ​របស់​គាត់ គាត់​ត្រូវ​ជួយ​ទំនុក​បម្រុង​នាង​ទាំង​នោះ​ផង មិន​ត្រូវ​ទុក​អោយ​ក្រុមជំនុំ*​ពិបាក​ផ្គត់ផ្គង់​នាង​ឡើយ ធ្វើ​ដូច្នេះ ក្រុមជំនុំ​អាច​នឹង​ជួយ​ទំនុក​បម្រុង​ស្ត្រី​មេម៉ាយ​ដែល​គ្មាន​ទី​ពឹង។

១៧

ព្រឹទ្ធាចារ្យ*​ទាំងឡាយ​ណា​នាំ​មុខ​ក្រុមជំនុំ​បាន​ល្អ​ប្រពៃ ត្រូវ​លើក​កិត្តិយស​គាត់​មួយ​ទ្វេ​ជា​ពីរ​ ជា​ពិសេស​ចំពោះ​ព្រឹទ្ធាចារ្យ​ណា​ដែល​នឿយហត់​ប្រកាស​ព្រះបន្ទូល និង​បង្រៀន​គេ

១៨

ដ្បិត​មាន​ចែង​ទុក​ក្នុង​គម្ពីរ​ថា «កុំ​ឃ្លុំ​មាត់​គោ​នៅ​ពេល​បញ្ជាន់​ស្រូវ​ឡើយ» ហើយ «កម្មករ​ត្រូវ​តែ​ទទួល​ប្រាក់​ឈ្នួល» ។

១៩

បើ​មាន​គេ​ចោទ​ប្រកាន់​ព្រឹទ្ធាចារ្យ​ណា​ម្នាក់ កុំ​ទទួល​ពាក្យ​ចោទ​របស់​គេ​អោយ​សោះ លើកលែង​តែ​មាន​សាក្សី​ពីរ ឬ​បី​នាក់។

២០

បើ​មាន​បង​ប្អូន​ណា​ប្រព្រឹត្ត​អំពើ​បាប ចូរ​បន្ទោស​អ្នក​ទាំង​នោះ​នៅ​មុខ​គេ​ឯង​ទាំង​អស់​គ្នា ដើម្បី​អោយ​បង​ប្អូន​ឯ​ទៀតៗ​ខ្លាច​ដែរ។

២១

ខ្ញុំ​សុំ​អង្វរ​អ្នក នៅ​ចំពោះ​ព្រះភក្ត្រ​ព្រះជាម្ចាស់ នៅ​ចំពោះ​ព្រះភក្ត្រ​ព្រះគ្រិស្ដយេស៊ូ និង​នៅ​ចំពោះ​មុខ​ទេវតា* ដែល​ព្រះអង្គ​បាន​ជ្រើស​រើស​ថា ចូរ​ធ្វើ​តាម​ពាក្យ​ដែល​ខ្ញុំ​ផ្ដែផ្ដាំ​ទាំង​នេះ ដោយ​ឥត​កាន់​ជើង ឬ​រើស​មុខ​បង​ប្អូន​ណា​ឡើយ។

២២

កុំ​ប្រញាប់​ដាក់​ដៃ​តែងតាំង​អ្នក​ណា​ម្នាក់​ពេក ដើម្បី​កុំ​អោយ​ចូល​រួម​ក្នុង​អំពើ​បាប​របស់​អ្នក​ដទៃ។ ចូរ​រក្សា​ខ្លួន​អោយ​បាន​បរិសុទ្ធ*។

២៣

កុំ​ពិសា​តែ​ទឹក​ទៀត​ឡើយ ចូរ​ពិសា​ស្រា​ខ្លះៗ​ផង​ទៅ ដើម្បី​អោយ​ស្រួល​រំលាយ​អាហារ ព្រោះ​អ្នក​មាន​ជំងឺ​ជា​ញឹក​ញាប់។

២៤

អំពើ​បាប​របស់​អ្នក​ខ្លះ​បាន​លេច​មក​អោយ​គេ​ឃើញ​ច្បាស់ មុន​ពេល​វិនិច្ឆ័យ​ទោស តែ​អំពើ​បាប​របស់​អ្នក​ខ្លះ​ទៀត​នឹង​លេច​មក​នៅ​ពេល​ក្រោយ។

២៥

រីឯ​អំពើ​ល្អ​ក៏​នឹង​លេច​មក​អោយ​គេ​ឃើញ​យ៉ាង​ច្បាស់​ដូច្នោះ​ដែរ ហើយ​សូម្បី​តែ​អំពើ​ល្អ​ដែល​មិន​ទាន់​លេច​មក ក៏​ពុំ​អាច​នៅ​លាក់​កំបាំង​បាន​ឡើយ។

Khmer Bible 1954
Public Domain: 1954