ការជ្រើសរើសព្រះគម្ពីរ
គម្ពីរសញ្ញាថ្មី
ខ្មែរព្រះគម្ពីរ 1954

កាឡាទី ៥

ព្រះគ្រិស្ដ*​បាន​រំដោះ​យើង​អោយ​មាន​សេរីភាព​ពិត​ប្រាកដ ហេតុ​នេះ ចូរ​រក្សា​សេរីភាព​នេះ​អោយ​បាន​ខ្ជាប់​ខ្ជួន កុំ​បណ្ដោយ​ខ្លួន​ធ្លាក់​ទៅ​ជា​ខ្ញុំ​បំរើ​ទៀត​ឡើយ។

រីឯ​ខ្ញុំ ប៉ូល ខ្ញុំ​សូម​ជំរាប​បង​ប្អូន​ថា ប្រសិន​បើ​បង​ប្អូន​ទទួល​ពិធី​កាត់​ស្បែក*​នោះ ព្រះគ្រិស្ដ​លែង​មាន​ប្រយោជន៍​អ្វី​ដល់​បង​ប្អូន​ទៀត​ហើយ។

ចំពោះ​អស់​អ្នក​ដែល​ចង់​ទទួល​ពិធី​កាត់​ស្បែក ខ្ញុំ​សូម​បញ្ជាក់​ប្រាប់​ម្ដង​ទៀត​ថា ត្រូវ​តែ​កាន់​តាម​ក្រឹត្យវិន័យ​ទាំង​ស្រុង​ផង​ទៅ។

ប្រសិន​បើ​បង​ប្អូន​ណា​ចង់​បាន​សុចរិត​ដោយ​ពឹង​ផ្អែក​លើ​ក្រឹត្យវិន័យ បង​ប្អូន​នោះ​បែក​ចេញ​ពី​ព្រះគ្រិស្ដ ហើយ​ក៏​ដាច់​ចេញ​ពី​ព្រះគុណ​របស់​ព្រះជាម្ចាស់​ដែរ។

រីឯ​យើង​វិញ ដោយ​យើង​មាន​ជំនឿ ព្រះវិញ្ញាណ​ជួយ​យើង​អោយ​ទន្ទឹង​រង់ចាំ​ព្រះជាម្ចាស់​ប្រោស​យើង​អោយ​បាន​សុចរិត ស្រប​តាម​សេចក្ដី​សង្ឃឹម​របស់​យើង​ជា​មិន​ខាន។

ចំពោះ​អ្នក​ដែល​រួម​រស់​ជា​មួយ​ព្រះគ្រិស្ដយេស៊ូ ការ​កាត់​ស្បែក ឬ​មិន​កាត់​ស្បែក​នោះ​មិន​សំខាន់​អ្វី​ឡើយ គឺ​មាន​តែ​ជំនឿ​ដែល​នាំ​អោយ​ប្រព្រឹត្ត​អំពើ​ផ្សេងៗ ដោយ​ចិត្ត​ស្រឡាញ់​ប៉ុណ្ណោះ​ទើប​សំខាន់។

បង​ប្អូន​បាន​ចាប់​ផ្ដើម​ជឿ​ល្អ​ណាស់​ តើ​នរណា​រារាំង​បង​ប្អូន​មិន​អោយ​ស្ដាប់​បង្គាប់​សេចក្ដី​ពិត​ដូច្នេះ?

ការ​បញ្ចុះបញ្ចូល​បែប​នេះ មិន​មែន​មាន​ប្រភព​មក​ពី​ព្រះជាម្ចាស់​ដែល​បាន​ត្រាស់​ហៅ​បង​ប្អូន​ទេ។

«មេ​ម្សៅ​តែ​បន្តិច​អាច​ធ្វើ​អោយ​ម្សៅ​ទាំង​មូល​ដោរ​ឡើង​បាន»​។

១០

ចំពោះ​ខ្ញុំ ព្រះអម្ចាស់​ធ្វើ​អោយ​ខ្ញុំ​ទុក​ចិត្ត​បង​ប្អូន​ថា បង​ប្អូន​មុខ​ជា​មិន​បែក​គំនិត ទៅ​រក​អ្វី​ផ្សេង​សោះ​ឡើយ។ រីឯ​អ្នក​ដែល​ធ្វើ​អោយ​បង​ប្អូន​កើត​វឹកវរ​នោះ​វិញ ទោះ​ជា​នរណា​ក៏​ដោយ គេ​ត្រូវ​តែ​ទទួល​ទោស។

១១

បង​ប្អូន​អើយ​ចំពោះ​ខ្ញុំ​វិញ ប្រសិន​បើ​ខ្ញុំ​ប្រកាស​អោយ​ធ្វើ​ពិធី​កាត់​ស្បែក​ទៀត​នោះ ម្ដេច​ក៏​គេ​នៅ​តែ​បៀតបៀន​ខ្ញុំ​ទៀត? ប្រសិន​បើ​ខ្ញុំ​ប្រកាស​ដូច្នេះ​ដំណឹងល្អ​អំពី​ព្រះគ្រិស្ដ​ជាប់​ឆ្កាង នឹង​លែង​ធ្វើ​អោយ​គេ​រវាត​ចិត្ត ឃ្លាត​ចាក​ពី​ជំនឿ​ទៀត​ហើយ។

១២

អ្នក​ដែល​នាំ​អោយ​បង​ប្អូន​ជ្រួលច្របល់​បែប​នេះ ត្រូវ​តែ​អោយ​គេ​ក្រៀវ​ខ្លួន​ឯង​តែ​ម្ដង​ទៅ។

១៣

បង​ប្អូន​អើយ ព្រះជាម្ចាស់​បាន​ត្រាស់​ហៅ​បង​ប្អូន​អោយ​មាន​សេរីភាព ក៏​ប៉ុន្តែ សូម​កុំ​យក​សេរីភាព​នេះ​មក​ធ្វើ​ជា​លេស ដើម្បី​រស់​តាម​និស្ស័យ​លោកីយ៍​សោះ​ឡើយ ផ្ទុយ​ទៅ​វិញ ត្រូវ​បំរើ​គ្នា​ទៅ​វិញ​ទៅ​មក​ដោយ​ចិត្ត​ស្រឡាញ់

១៤

ដ្បិត​ក្រឹត្យវិន័យ​ទាំង​មូល​សរុប​មក​ត្រឹម​តែ​ឃ្លា​មួយ​នេះ​ថា «អ្នក​ត្រូវ​ស្រឡាញ់​បង​ប្អូន​ឯ​ទៀតៗ​អោយ​បាន​ដូច​ស្រឡាញ់​ខ្លួន​ឯង​ដែរ» ។

១៥

បើ​បង​ប្អូន​ប្រខាំ​គ្នា និង​ហែកហួរ​គ្នា​ទៅ​វិញ​ទៅ​មក​ដូច្នេះ ចូរ​ប្រយ័ត្ន​ក្រែងលោ​បង​ប្អូន​ត្រូវ​វិនាស​អន្តរាយ ដោយសារ​តែ​គ្នា​ឯង។

១៦

ខ្ញុំ​សូម​ជំរាប​ថា ចូរ​រស់​នៅ​អោយ​ស្រប​តាម​ព្រះវិញ្ញាណ នោះ​បង​ប្អូន​នឹង​មិន​បំពេញ​តាម​បំណង​ចិត្ត​លោភលន់​របស់​និស្ស័យ​លោកីយ៍​ទៀត​ឡើយ

១៧

ដ្បិត​បំណង​លោភលន់​របស់​និស្ស័យ​លោកីយ៍ តែងតែ​ទាស់​នឹង​ព្រះវិញ្ញាណ ហើយ​ព្រះវិញ្ញាណ​ក៏​មាន​បំណង​ទាស់​នឹង​និស្ស័យ​លោកីយ៍​ដែរ។ និស្ស័យ​លោកីយ៍ និង​ព្រះវិញ្ញាណ​ផ្ទុយ​គ្នា​ទាំង​ស្រុង ដូច្នេះ បង​ប្អូន​ពុំ​អាច​ធ្វើ​អ្វី​ដែល​បង​ប្អូន​ចង់​ធ្វើ​នោះ​បាន​ឡើយ។

១៨

ប្រសិន​បើ​ព្រះវិញ្ញាណ​ណែនាំ​បង​ប្អូន បង​ប្អូន​លែង​នៅ​ក្រោម​អំណាច​របស់​ក្រឹត្យវិន័យ​ទៀត​ហើយ។

១៩

យើង​ស្គាល់​ច្បាស់​នូវ​អំពើ​ផ្សេងៗ​ដែល​កើត​ចេញ​មក​ពី​និស្ស័យ​លោកីយ៍ គឺ​មាន​អំពើ​ប្រាស​ចាក​សីលធម៌ អំពើ​សៅហ្មង កាមគុណ​ថោក​ទាប

២០

ការ​ថ្វាយបង្គំ​ព្រះក្លែងក្លាយ វិជ្ជា​ធ្មប់ ឈ្លោះ​ប្រកែក​គ្នា បាក់​បែក​គ្នា ច្រណែន​គ្នា កំហឹង​ឃោរឃៅ ប្រកួត​ប្រជែង​គ្នា​ប្រឆាំង​គ្នា ប្រកាន់​បក្ស​ពួក

២១

ឈ្នានីស​គ្នា ប្រមឹក​ស៊ី​ផឹក​ជ្រុល និង​អំពើ​ផ្សេងៗ​ទៀត ដែល​ស្រដៀង​នឹង​អំពើ​ទាំង​នេះ​ដែរ។ ខ្ញុំ​សូម​ជំរាប​អោយ​បង​ប្អូន​ដឹង​ជា​មុន ដូច​ខ្ញុំ​បាន​និយាយ​រួច​មក​ហើយ​ថា អស់​អ្នក​ដែល​ប្រព្រឹត្ត​អំពើ​ទាំង​អស់​នេះ ពុំ​អាច​ទទួល​ព្រះរាជ្យ*​របស់​ព្រះជាម្ចាស់​ទុក​ជា​មត៌ក​បាន​ឡើយ។

២២

រីឯ​ផល​ដែល​កើត​មក​ពី​ព្រះវិញ្ញាណ​វិញ គឺ​សេចក្ដី​ស្រឡាញ់ អំណរ សេចក្ដី​សុខសាន្ត ចិត្ត​អត់ធ្មត់ ចិត្ត​សប្បុរស ចិត្ត​សន្ដោស មេត្តា ជំនឿ

២៣

ចិត្ត​ស្លូតបូត ចេះ​ទប់​ចិត្ត​ខ្លួន​ឯង។ គ្មាន​វិន័យ​ណា​ជំទាស់​នឹង​សេចក្ដី​ទាំង​នេះ​ទេ។

២៤

អស់​អ្នក​ដែល​រួម​ជា​មួយ​ព្រះគ្រិស្ដយេស៊ូ​បាន​ឆ្កាង​តណ្ហា និង​បំណង​លោភលន់​ផ្សេងៗ​របស់​និស្ស័យ​លោកីយ៍​នោះ​ចោល​ហើយ។

២៥

ប្រសិន​បើ​យើង​មាន​ជីវិត​ដោយសារ​ព្រះវិញ្ញាណ​មែន យើង​ក៏​ត្រូវ​ប្រតិបត្តិ​តាម​ព្រះវិញ្ញាណ​ដែរ។

២៦

យើង​មិន​ត្រូវ​អួត​បំប៉ោង រក​រឿង​គ្នា​ទៅ​វិញ​ទៅ​មក និង​ឈ្នានីស​គ្នា​នោះ​ឡើយ។

Khmer Bible 1954
Public Domain: 1954