Müqəddəs Seçki
Əhdi-Ətiq
Əhdi-Cədid
Azərbaycan Müqəddəs Kitab 2008

1 Şamuel 16

1

رب سمويئله ددي: "ائندي کي، شاعولو ائسرايئل اوستونده پادشاه اولماقدان ردّ اتمئشم، نه واختا قدر اونون دردئني چکه‌جکسن؟ ياغ بوينوزونو ياغلا دولدور و گت. سني بِيت‌لِخِملي يَسّه‌نئن يانينا گؤندره‌جيم. چونکي اونون اوغوللاري آراسيندان اؤزوم اوچون پادشاه تعيئن اتمئشم."

2

لاکئن سمويئل ددي: "نجه گده‌ بئله‌رم؟ شاعول اشئتسه، منی اؤلدورَر." رب ددي: "اؤزونله بئر بوزوو گؤتوروب ده: «ربّه قوربان کسمک اوچون گلمئشم.»

3

يَسّه‌ني ده قوربان مراسئمئنه دعوت ات، و سونرا نه اده‌جيئني سنه بئلدئره‌‌رم. سنه دئيه‌جيئم آدامي منئم اوچون مسح اِدَرسن."

4

سمويئل ربّئن ددئيي کئمي ادئب بِيت‌لِخِمه گلدي. شهرئن آغساقّاللاري اونو تئتره‌يه‌رک پئشواز اتدئلر و سوروشدولار: "بو گلئشئن آيا خيئردئر؟"

5

او جاواب وردی: "بلی، خيئردئر. ربّه قوربان کسمک اوچون گلمئشم. اؤزونوزو تقدئس ادئن و منئمله برابر قوربان مراسئمئنه گلئن." سمويئل يَسّه ائله اوغوللاريني دا تقدئس ادئب اونلاري دا قوربان مراسئمئنه دعوت اتدي.

6

اونلار گلدئکده سمويئل اِلئيابا باخيب ددي: "دوغرودان دا، ربّئن مسح اتدئيي، ربّئن حوضوروندادير!"

7

لاکئن رب سمويئله ددي: "اونون گؤرونوشونه و اوجا بويونا باخما، من اونو ردّ اتمئشم. اونا گؤره کي، رب ائنسانين گؤردويو کئمي گؤرمَز، چونکي ائنسان ظاهئره، رب آمّا اوره‌يه باخار."

8

او زامان يَسّه اَبئنادابي چاغيردي و اونو سمويئلئن حوضوروندان کچئرتدي. سمويئل ددي: "رب بونو دا سچمه‌‌يئب."

9

يَسّه شمّاني گتئردي و سمويئل ددي: "رب بونو دا سچمه‌يئب."

10

بلجه يَسّه اوغلانلارينين يدّئسئني ده سَمويئلئن قاباغيندان کچئرتدي. آمّا سمويئل يَسّه‌يه ددي: "رب بونلاري سچمه‌يئب."

11

سونرا يَسّه‌دن سوروشدو: "اوغلانلارينين هاميسي بودور؟" يَسّه جاواب وردی: "لاپ کئچئيي ده وار، لاکئن ائندي قويون اوتارير." سمويئل يَسّه‌يه ددي: "داليسيجا آدام گؤندر و اونو دا بورايا گتئر. چونکي او بورايا گلمَسه، بئز سوفره‌يه اوتورماياجاغيق."

12

يَسّه آدام گؤندرئب اونو ائچَري گتئرتدي. اوغلان آل‌ياناق، گؤزلري گؤزل، ظاهئري ده ياراشيقلي ائدي. رب سمويئله ددي: "دور، اونو مسح ات، چونکي سِچئلمئش بودور."

13

سمويئل ياغ بوينوزونو گؤتوروب قارداشلاري آراسيندا اونو مسح اتدي و او گوندن ربّئن روحو قووّتله داوودون اوستونه اِندي. سونرا سمويئل قالخيب رامايا گتدي.

14

ربّئن روحو شاعولدان آيريلميشدي. ربّئن گؤندردئيي شر بئر روح اونا عذاب چکدئرئردي.

15

شاعولون نؤکرلري اونا بله ددئلر: "باخ، تارينين گؤندردئيي شر بئر روح سنه اذئيّت ورئر.

16

ای آغاميز، قاباغيندا اولان قوللارينا امر ات کي، ياخشي چنگ چالان بئر آدام آختارسينلار. تارينين گؤندردئيي شر روح سنئن اوستونه گلن زامان او چنگ چالار، سن ده روحلانارسان."

17

شاعول نؤکرلرئنه ددي: "منئم اوچون ياخشي چنگ چالان بئر آدام تاپيب يانيما گتئرئن."

18

جاوان نؤکرلردن بئري جاواب وردی: "من گؤرموشم کي، بِيت‌لِخِملي يَسّه‌نئن اوغلو ياخشي چنگ چالير. او، ائگئد، جسور دؤيوشچو، حئکمتله دانيشان، ياراشيقلي بئر اوغلاندير و رب اونونلادير."

19

شاعول يَسّه‌نئن يانينا قاصئدلر گؤندرئب ددي: "قويون اوتاران اوغلون داوودو منئم يانيما گؤندر."

20

يَسّه بئر اِششه‌يه چؤرک، بئر تولوق شراب، بئر کچي بالاسي يوکله‌دي و اوغلو داوودون اَلي ائله شاعولا گؤندردي.

21

داوود شاعولون يانينا گلدي و اونون قوللوغوندا دوردو. داوود شاعولون چوخ خوشونا گلدي و اونو اؤز سئلاحداري اتدي.

22

سونرا شاعول يَسّه‌نئن يانينا آدام گؤندرئب ددي: "خاهئش ادئرم، قوي داوود يانيمدا قالسين، چونکي او، گؤزومده لوطف تاپيب."

23

بلجه هر دفه تارينين گؤندردئيي شر روح شاعولا گلن زامان، داوود چنگ گؤتوروب چالاردي، شاعول ساکئتله‌شَردي، ياخشي اولاردي و شر روح اوندان آيريلاردي.

Azerbaijan Bible 2008
Southern Azeri translation. Copyright © 2008 Elam Ministries