Əhdi-Ətiq
Əhdi-Cədid
Azerbaijan Bible 2008
← 2

2 Korinflilərə 3

4 →
1

مگر اؤزوموزو گئنه تعرئف اتمه‌يه باشلاييريق؟ و يا بعضئلر کئمي سئزدن يا دا سئزه تؤوصئيه نامه​لره احتئياجيميز وار؟

2

بئزئم نامه​مئز سئز اؤزونوزسوز کي، اورکلرئمئزده يازيليب و بوتون ائنسانلار طرفئندن تانينيب و اوخونوب.

3

سئز گؤرسدئرسئنئز کي، بئزئم خئدمتئمئزئن سايه​سئنده مسئحئن مکتوبوسونوز؛ مورکّبله يازيلميش يوخ، ياشايان تارينين روحو ائله، داش لؤوحه‌لري اوستونده يازيلميش يوخ، ائنسان اوره‌يئنئن لؤوحه​لري اوستونده.

4

و مسئحئن واسئطه‌سئله بئزئم تارييا بله بئر اعتئماديميز وار.

5

اونا گؤره يوخ کي، گويا بئزده اله بئر قابئلئيّت وار کي، بئزدن بئر شي عمله گلسئن. يوخ، بئزئم قابئلئيّتئمئز تاريداندير کي،

6

بئزي تزه عهدئن قابئلئيّتلي خئدمتچئسي اتدي؛ حرفئن يوخ، موقدّس روحون. چونکي حرف اؤلدورور، آمّا روح ياشادير.

7

لاکئن اگر اؤلوم گتئرن خئدمت، يعني حرفلري داش لؤوحه​لرده حکّ اولونموش، او قدر شؤوکتله گلدي، اله کي، موسانين اوزونده​کي احتئشام فاني اولان حالدا، ائسرايئل اوغوللاري اونون اوزونه باخا بئلمئردئلر،

8

بس نجه روحون خئدمتي اوندان داها چوخ شؤوکتلي اولماياجاق؟!

9

چونکي اگر محکومئيّت گتئرن خئدمتئن شؤوکتي وار، صالحلئک گتئرن خئدمتئن داها چوخ شؤوکتي اولاجاق.

10

اونا گؤره کي، شؤوکتلي اولان شي، بو خوصوصدا، شؤوکتده اونو اؤتن شيئن قاباغيندا شؤوکتي اولماز.

11

چونکي اگر فاني اولان، شؤوکتله‌دئر، نه‌قدر چوخ باقي اولان شؤوکتده اولاجاق.

12

بونا گؤره بله بئر اومئدئمئز وار ائکن، بؤيوک جسارتله دانيشيريق.

13

بئز موسا کئمي ديئلئک؛ او، اوزونه اؤرتوک چکدي کي، ائسرايئل اوغوللاري کچئب-گدن شؤوکتئن آخيريني گؤرمه‌سئنلر.

14

لاکئن اونلارين ذهئنلري کور اولوب، چونکي بو گونه کئمي قدئم عهد اوخوناندا همن اؤرتوک گؤتورولمه​مئش قالير. چونکي بو اؤرتوک مسئحده گؤتورولور.

15

حتّا بو گونه کئمي بله، موسانين يازيلاري اوخونان زامان، اونلارين اورکلري اوستونه بئر اؤرتوک چکئلئر.

16

آمّا نه زامان کي، بئری ربّه دؤنور، بو اؤرتوک آرادان قالديريلير.

17

رب موقدّس روحدور؛ ربّئن روحو هارادا اولسا، آزادليق دا اورادادير.

18

آمّا بئز هاميميز، آچيق اوز​له ربّئن شؤوکتئنه آينا ائمئش کئمي باخيريق و شؤوکتدن شؤوکته کچئب، اِله او صورته ده تبدئل اولونوروق. بو دا ربدندئر کي، موقدّس روحدور.

Azerbaijan Bible 2008
Southern Azeri translation. Copyright © 2008 Elam Ministries