Əhdi-Ətiq
Əhdi-Cədid
Azərbaycan Müqəddəs Kitab 2008
← 29

Saylar 30

31 →
1

موسا ائسرايئل اؤولادلارينين قبئله باشچيلاري ائله دانيشيب اونلارا ددي: "ربّئن امر اتدئيي سؤز بله‌دئر:

2

اگر بئر کئشي ربّه نذئر ادئر، يا دا آند ائچئب بوينونا بئر تکلئف گوتورور، وردئيي سؤزو پوزمامالي‌دير؛ آغزيندان چيخان هر شيي گرک يرئنه يتئرسئن.

3

اگر آتاسينين اِوئنده ياشايان جاوان قيز ربّه نذئر ادئب بوينونا بئر تکلئف گؤتورور،

4

و آتاسي اونون نذئرئني و گؤتوردويو تکلئفي اشئدئر و هچ بئر شي دِمئر، قيزين اتدئيي بوتون نذئرلر و گؤتوردويو تکلئفلرئن هاميسي قووّه‌ده قالار.

5

آمّا آتاسي بونلاري اشئدن گون مانع اولسا، قيزين اتدئيي نذئرلر و گؤتوردويو تکلئفلر قووّه‌دن دوشر. رب اونو باغيشلايار، چونکي آتاسي اونا مانع اولوب.

6

اگر قيز نذئر اتدئکدن، يا دا دوشونمه‌دن بوينونا بئر تکلئف گؤتوردوکدن سونرا اَره گتسه،

7

اَري بونو اشئدن واخت، اشئتدئيي گون اونا هچ بئر شي دمه‌سه، اونون اتدئيي نذئرلر و گؤتوردويو تکلئفلر قووّه‌ده قالار.

8

آمّا اگر اَري بونو اشئدن گون مانع اولسا، گلئنئن اتدئيي نذئر و گؤتوردويو تکلئف قووّه‌دن دوشر. رب اونو باغيشلايار.

9

آمّا دول و يا بوشانان آروادينين نذئري و گؤتوردويو هر تکلئف قووّه‌ده قالار.

10

اگر آرواد اَرئنئن اِوئنده نذئر ادئر، و يا بوينونا بئر تکلئف گؤتورور،

11

و اَري بونو اشئدنده اونا بئر شي دمه‌يئب مانع اولمور، آروادينين بوتون نذئرلري و يا گؤتوردويو تکلئفلرئن هاميسي قووّه‌ده قالار.

12

آمّا اگر اَري بونلاري اشئدن گون اونا حقئقتن مانع اولسا، آروادينين بوتون نذئرلري و گؤتوردويو تکلئفلر قووّه‌دن دوشر. اَري مانع اولدوغو اوچون رب آروادي باغيشلايار.

13

اَر، آروادينين اؤزونو محروم اتمک اوچون اتدئيي هر نذئري و يا آند ائچه‌رک بوينونا گؤتوردويو هر تکلئفي تصدئق يا دا اونا مانع اولا بئلر.

14

آمّا اگر اَري بئر گون ائچئنده بو باره‌ده اونا هچ بئر شی دمه‌سه، بوتون نذئرلرئني و يا تکلئفلرئني تصدئقله‌مئش اولور. اونلاري اشئدن گون آروادا هچ بئر شي دمه‌مکله تصدئقله‌مئش ساييلار.

15

اگر اونلاري اشئتدئکدن بئر مودّت سونرا مانع اولسا، آروادينين جزاسيني اَري چکر.»

16

کئشي ائله آروادي، آتاسي ائله اونون اِوئنده ياشايان جاوان قيزي آراسيندا اولان موناسئبت باره‌ده، ربّئن موسايا امر اتدئيي قايدالار بونلاردير.

Azerbaijan Bible 2008
Southern Azeri translation. Copyright © 2008 Elam Ministries