Əhdi-Ətiq
Əhdi-Cədid
Azerbaijan Bible 2008
← 1

Daniel 2

3 →
1

نِبوکَدنِصّر پادشاهليغينين ائکئنجي ائلئنده بئر يوخو گؤردو، روحو پرئشان اولدو و يوخوسو قاچدي.

2

پادشاه امر اتدي کي، اونون يانينا سِحربازلار، اووسونچولار، جادوگرلر و مونجّئملر چاغيريلسين، اِله کي، پادشاهين يوخوسونو اونا دسئنلر. اونلار گلئب پادشاهين حوضوروندا دايانديلار.

3

پادشاه اونلارا ددي: "بئر يوخو گؤرموشم و روحوم پرئشاندير کي، بئلئم بو يوخونون معناسي نه‌دئر."

4

مونجّئملر اَرامي دئلئنده پادشاها ددئلر: "پادشاه صاغ اولسون، يوخونو بو قوللارينا دانيش، بئز اونون تعبئرئني دئيه‌رئک."

5

پادشاه مونجّئملره جاواب وردی: "من بله قرارا گلمئشم: اگر سئز منه هم يوخونو، هم ده اونون تعبئرئني دِميه‌سئنئز، پارچا-پارچا ادئله‌جکسئنئز، اِولرئنئز ده وئران ادئله‌جک.

6

آمّا اگر يوخونو و اونون تعبئرئني دئيه‌سئنئز، مندن هدئيّه‌لر، پاداشلار و بؤيوک حؤرمت آلاجاقسينيز. ائندي منه يوخونو و اونون تعبئرئني بئلدئرئن."

7

اونلار گئنه جاواب وردئلر: "قوي پادشاه يوخونو بو قوللارينا دانيشسين، بئز ده اونون تعبئرئني دئيه‌رئک."

8

پادشاه جاواب وردی: "يقئن بئلئرم کي، سئز واخت قازانماق ائسته‌يئرسئنئز، چونکي گؤرورسونوز کي، منئم قراريم قطعي‌دئر.

9

اگر يوخونو منه دِميه‌سئنئز، سئزئن اوچون فقط بئر جزا اولاجاق. سئز سؤزله‌شئبسئنئز کي، وضعئيّتئن دَيئشئلمه‌يئنه‌جک منه يالان و اويدورما سؤزلر دئيه‌سئنئز. ائندي منه يوخونو بئلدئرئن. اوندا بئله‌رم کي، سئز اونو يوزا بئلرسئنئز."

10

مونجّئملر پادشاها جاواب وردئلر: "يِر اوزونده پادشاهين طلبئني يرئنه يتئره بئلَن آدام يوخدور. هچ پادشاه، نه قدر عظمتلي و قودرتلي اولسا دا، بله بئر شيي هچ سِحربازدان، اووسونچودان و يا مونجّئمدن ائستَمه‌يئب.

11

پادشاهين ائسته‌دئيي شي اِله چتئندئر کي، آللاهلاردان باشقا هچ کس بونو پادشاها آشکار اده بئلمز. اونلارين دا مسکني ائنسانلار آراسيندا ديئل."

12

پادشاه بو سؤزه گؤره قضبله‌نئب چوخ حئرصلَندي و امر اتدي کي، بابئلئن بوتون حئکمتلی‌لرئني محو اتسئنلر.

13

بِلجه حئکمتلی‌لري اؤلدورمک باره‌ده امر چيخدي؛ و اونلار دانيال و اونون يولداشلاريني آختارديلار کي، اؤلدورسونلر.

14

او زامان دانيال کشئکچئلر ريئسي اَريوکلا کي، بابئلئن حئکمتلی‌لرئني اؤلدورميه گتمئشدي، حئکمت و بصئرتله دانيشدي.

15

او، پادشاهين حَربي ريئسي اَريوکدان سوروشدو: "نئيه پادشاه بله بئر عاجئل امر ورئب؟" او واخت اَريوک اَحوالاتي دانيالا دانيشدي.

16

دانيال ائچه‌ري گئرئب پادشاهدان خاهئش اتدي کي، يوخونون تعبئرئني پادشاها بئلدئرمک اوچون اونا واخت ورسئن.

17

دانيال اؤز اِوئنه قاييديب اَحوالاتي دوستلاري خَنَنيا، مئشااِل و عَزَريايا دانيشدي

18

و اونلارا ددی کي، بو سئرّ باره‌ده گؤيلرئن تاريسيندان مرحمت ائسته‌سئنلر و دانياللا اونون يولداشلاري باشقا بابئل حئکمتلی‌لري ائله بئرلئکده محو اولماسينلار.

19

او زامان بو سئرّ دانيالا گجه گلن رؤيادا آشکار اولدو. او واخت دانيال گؤيلرئن تاريسينا شوکور اتدي.

20

دانيال ددي: "تارينين آدي ابددن ابده‌جک موبارک اولسون! چونکي حئکمت و قودرت اونوندور.

21

واختي و دؤورو دَيئشدئرَن اودور. او، پادشاهلاري تختدن سالار و تخته قويار، حئکمتلی‌لره حئکمت، عاقئل‌لره عاغيل وِرَر.

22

درئن و گئزلي سئرّلري او آچار، قارانليقدا قالاني او بئلر. ائشيق اونونلا ساکئندئر.

23

ای آتالاريمين تاريسي، سنه شوکور و حمد اولسون کي، منه حئکمت و قودرت وردئن، ائندي سندن ائسته‌دئيئمئز شيي منه آشکار اتدئن. بلجه پادشاهين مَسَله‌سئني بئزه بئلدئردئن."

24

بلجه دانيال اَريوکون يانينا کی، پادشاه اونو بابئلئن حئکمتلی‌لرئني اؤلدورمک اوچون تعيئن اتمئشدي، گلئب اونا ددي: "بابئلئن حئکمتلی‌لرئني اؤلدورمه. منی پادشاهين يانينا آپار، اونا يوخوسونون معناسيني بئلدئره‌رم."

25

او واخت اَريوک دانيالي تَله‌سئک پادشاهين يانينا گتئرئب اونا ددي: "من اسئر اولونموش يهودالي‌لار آراسيندان بئر آدام تاپميشام کي، پادشاهين يوخوسونو تعبئر اده بئلر."

26

پادشاه، بِلطِشَصّر آدلانان دانيالدان سوروشدو: "آيا قادئرسن کي، گؤردويوم يوخونو و اونون تعبئرئني منه دئيه‌سن؟"

27

دانيال پادشاها جاواب وردی: "پادشاهين سوروشدوغو سئرّي حئکمتلی‌لر، اووسونچولار، سِحربازلار و فالچيلار اونا آچا بئلمزلر.

28

آنجاق گؤيلرده سئرّلري آچان بئر تاري وار و گله‌جکده نه اولاجاغيني پادشاه نِبوکَدنِصّره او بئلدئرئب. ياتارکن گؤردويون يوخو و رؤيالار بله‌دئر:

29

ای پادشاه، سن اؤز ياتاغيندا اولارکن بو فئکئرلر گلدي کي، بوندان سونرا نه اولاجاق؟ سئرّلري آچان دا نه اولاجاغيني سنه گؤرستدي.

30

منه بو سئرّ اونون اوچون آچيلمادي کي، گويا باشقا آداملاردان داها چوخ حئکمتئم وار. آنجاق بونون اوچون کي، يوخو پادشاها بئلدئرئلسئن و سن ده اؤز اوره‌يئنئن دوشونجه‌لرئني بئله‌سن.

31

ای پادشاه، سن يوخودا بؤيوک بئر موجسّمه گؤروبسن. چوخ بؤيوک و چوخ عظمتلي اولان بو موجسّمه، سنئن قاباغيندا دوردو. اونون گؤرونوشو قورخولو ائدي.

32

بو موجسّمه‌نئن باشي خالئص قيزيلدان، سئنه‌سي و قول‌لاري گوموشدن، قارني و بودلاري دا بورونجدن ائدي.

33

بالديرلاري دمئردن، آياقلارينين بئر حئصّه‌سي دمئردن، بئر حئصّه‌سي ده گئلدن ائدي.

34

سن باخارکن، اَل دَيمه‌دن بئر داش يِرئندن قوپاريلدي، موجسّمه‌نئن دمئر و گئل آياقلاريندان ووروب اونلاري تئکه-تئکه اتدي.

35

او زامان دمئر، گئل، بورونج، گوموش و قيزيل بئرلئکده پارچالاندي و ياي خرمنلرئنده‌کي سامان چؤپو کئمي سوورولدو. کولَک اونلاري آپاردي و اونلاردان اثر-علامت قالمادي. لاکئن موجسّمه‌ني داغيدان داش، بؤيوک بئر داغ اولدو و بوتون دونياني توتدو.

36

يوخو بو ائدي. ائندي اونون تعبئرئني پادشاها دئيه‌رئک.

37

ای پادشاه، سن شاهَنشاهسان. گؤيلرئن تاريسي پادشاهليغي، قووّتي، قودرتي و عئزّتي سنه ورئب.

38

او هر يرده ياشايان بشر اؤولادلاريني، چؤلون حيوانلاريني و گؤيون قوشلاريني سنئن ائختئيارينا ورمکله، سني اونلارا حؤکمدار ادئب. قيزيلدان اولان باش سنسن!

39

سندن سونرا سندن آشاغي مرتبه‌ده اولان باشقا پادشاهليق ظوهور اده‌جک. اوندان سونرا دا بورونجدن اولان، بوتون دونيايا حؤکمرانليق ادن اوچونجو بئر پادشاهليق اولاجاق.

40

دؤردونجو پادشاهليق دا دمئر کئمي مؤحکم اولاجاق، نجه دمئر هر شيي اَزئب قيرار، او دا بوتون باشقالاريني، هر شيي قيران دمئر کئمي اَزئب قيراجاق.

41

آياقلارين و بارماقلارين بئر حئصّه‌سئنئن کوزه‌گر گئلئندن، بئر حئصّه‌سئنئن ده دمئردن اولدوغونو گؤرمه‌يئنئن معناسي بودور کي، او بؤلونموش پادشاهليق اولاجاق. اوندا بئر قدر دمئر مؤحکملئيي قالاجاق، نجه کي سن دمئري کوزه‌گر گئلي ائله قاريشيق گؤروبسن.

42

آياق بارماقلارينين بئر حئصّه‌سي دمئردن، بئر حئصّه‌سي گئلدن اولدوغو کئمي، بو پادشاهليغينين دا بئر حئصّه‌سي مؤحکم، بئر حئصّه‌سي ضعئف اولاجاق.

43

دمئري کوزه‌گر گئلي ائله قاريشيق گؤردويونون معناسي بودور کي، اونلار اِولَنمک واسئطه‌سئله بئربئرلري ائله قاريشاجاقلار، لاکئن دمئر گئل‌له بئرلَشمه‌دئيي کئمي، اونلار دا بئربئرلري ائله بئرلَشميه‌جکلر.

44

او پادشاهلارين دؤورونده گؤيلرئن تاريسي هچ واخت داغيلمايان بئر پادشاهليق قوراجاق و بو پادشاهليق باشقا خالقين اَلئنه کِچميه‌جک. او بوتون اوّلکي پادشاهليقلاري اَزئب داغيداجاق، و اؤزو ابدی قالاجاق.

45

سن گؤردون کي، داغدان بئر داش اَل دَيمه‌دن قوپاريلدي، دمئري، بورونجو، گئلي، گوموشو و قيزيلي تئکه-تئکه اتدي. بلجه بؤيوک تاري بوندان سونرا نه اولاجاغيني پادشاها بئلدئرئب. بو يوخو دوغرودور و اونون تعبئري ده ائنانمالي‌دير."

46

او زامان پادشاه نِبوکَدنِصّر اوزو اوسته دوشوب دانيالا سجده اتدي و امر اتدي کي، اونون اوچون تقدئم گتئرئب بوخور يانديرسينلار.

47

پادشاه دانيالا ددي: "ائندي کي، سن بو سئرّي آچا بئلدئن، حقئقتن، سئزئن تارينيز، آللاهلارين تاريسي و پادشاهلارين آغاسي‌دير، سئرّلري آچان دا اودور."

48

بوندان سونرا پادشاه دانيالي اوجا وظئفه‌يه قويدو و اونا چوخ قئيمتلي هدئيّه‌لر وردی. اونو بابئل وئلايتئنئن باشچيسي و بوتون بابئلئن حئکمتلی‌لرئنئن باش ريئسي تعيئن اتدي.

49

دانيال پادشاهدان خاهئش اتدي و او دا شَدرَکي، مِشَکي و عَبِدنِگونو بابئل وئلايتئنه مأمور قويدو. لاکئن دانيال پادشاهين ساراييندا قالدي.

Azerbaijan Bible 2008
Southern Azeri translation. Copyright © 2008 Elam Ministries