Əhdi-Ətiq
Əhdi-Cədid
Azərbaycan Müqəddəs Kitab 2008
← 31

Yezekel 32

33 →
1

اسئرلئيئمئزئن اون ائکئنجي ائلئنده، اون ائکئنجي آيين بئرئنجي گونو منه ربّئن بو سؤزو نازئل اولدو:

2

"ای بشر اوغلو، مئصئر پادشاهي فئرعون اوچون مرثئيه اوخويوب اونا دِه: «مئلّتلر ائچئنده اؤزونو جاوان بئر آصلانا بَنزَتدئن، آمّا سن بئر دهنز اژداهاسي کئمي‌سن. چايلاري قاريشديريرسان، آياقلارينلا سولاري چالخالاييب چايلاري بولانديريرسان«»

3

پروردئگار رب بله ديئر: «چوخلو خالقدان عئبارت بئر قوشون گؤنده‌رئب تورومو اوستونه آتاجاغام. اونلار سني توروملا قالديريب چيخارداجاقلار.

4

سني قورويا چيخارداجاغام، چؤلون اوزونه آتاجاغام، گؤيده‌کي قوشلاري اوستونه قوندوراجاغام. بوتون يِر اوزونون وحشي حيوانلاريني سنئنله دويدوراجاغام.

5

بدنئني داغلارين اوستونه سَره‌جيم، دره‌لري لِشئنله دولدوراجاغام.

6

اؤلکه‌ني داغلارا قدر آخان قانينلا سولاياجاغام، دره‌لر مِيئتئنله دولاجاق.

7

سني محو اتدئيئم زامان گؤيلري باغلاياجاغام، اولدوزلاري قارالداجاغام، گونشي بولودلا اؤرته‌جيم، آي، ائشيغيني ورميه‌جک.

8

سنئن اوستونده نور ساچان بوتون گؤي جئسئملرئني قارالداجاغام، اؤلکه‌ني قارانليغا قرق اده‌جيم.» پروردئگار رب بله بويورور.

9

«سنئن محو اولماق خبرئني، مئلّتلرئن آراسينا، تانيماديغين اؤلکه‌لره چاتديرديغيم زامان بئر چوخ خالقلارين اوره‌يئني کَدَرلَندئره‌جيم.

10

سنئن باشينا گلنلرله بئر چوخ خالقي حيرته سالاجاغام. اونلارين قاباغيندا قيلينجيمي يِلله‌دئيئم زامان سنه گؤره پادشاهلارينين توکلري بئز-بئز اولاجاق. ييخيلديغين گون اونلارين هاميسي اؤز جانلاري اوچون دورمادان قورخو ائچئنده تئترَيه‌جک.»

11

پروردئگار رب بله ديئر: «بابئل پادشاهينين قيلينجي سنئن اوستونه گله‌جک.

12

مئلّتلرئن لاپ رحمسئز ائگئدلرئنه ائجازه وره‌جيم کی، سنئن چوخلو خالقيني قيلينجدان کچئرتسئنلر. مئصئرئن تکبّورونو قيراجاقلار، بوتون چوخلو خالقيني محو اده‌جکلر.

13

بول سولارين يانيندا اوتلايان بوتون مال-حيواني يوخ اده‌جيم. بوندان سونرا ائنسان آياغي دا، حيوان آياغي دا سولاري قاريشديريب بولانديرماياجاق.

14

او زامان اونلارين سولاريني دورولداجاغام، چايلاريني ياغ کئمي آخيداجاغام.» پروردئگار رب بله بويورور.

15

«مئصئري خاراباليغا چِوئردئيئم زامان، اؤلکه‌ هر شيدن محروم اولاندا، اورادا ياشايان هر کسي محو اتدئيئم زامان بئله‌جکلر کي، رب منم.»

16

مئصئر اوچون اوخونان مرثئيه بودور. مئلّتلرئن قيزلاري بو مرثئيه‌ني اوخوياجاقلار. مئصئر و اونون چوخلو خالقي اوچون بو مرثئيه‌ني اوخوياجاقلار. پروردئگار رب بله بويورور."

17

اسئرلئيئمئزئن اون ائکئنجي ائلئنده، آيين اون بِشئنجي گونو منه گئنه ربّئن سؤزو نازئل اولدو:

18

«ای بشر اوغلو، مئصئرئن چوخلو خالقي اوچون ياس توت. اونلاري و گوجلو مئلّتلرئن قيزلاريني قبئره اِنَنلرله بئرلئکده يِرئن درئنلئکلرئنه اِندئر.

19

اونلارا دِه: «مگر سن باشقالاريندان داها گؤزَلسن؟ يِرئن آلتينا اِن و اوراداکي ختنه‌سئزلرله بئرلئکده اوزان.»

20

مئصئر خالقي قيلينجلا اؤلدورولَنلرئن آراسينا دوشه‌جک. بو خالق قيلينجين ائختئيارينا ورئلدي. قوي مئصئر چوخلو خالقي ائله بئرلئکده سوروکلَنسئن.

21

قودرتلي باشچيلار اؤلولر دئياريندان مئصئر و اونا آرخا اولانلار اوچون بله دئيه‌جک: «يِرئن آلتينا اِندئلر، قيلينجلا اؤلدورولَن ختنه‌سئزلر کئمي ائندي بورادا ياتيرلار.»

22

آشور و بوتون قوشونو اورادادير. قيلينجدان کچئرئلمئش، اؤلموش عسگرلرئنئن مزارلاري اطرافيني بوروموشدور.

23

اونلارين مزارلاري قبئرئن لاپ دئبئنده، قوشونو مزارينين اطرافيندا اوزانيب. دئرئلر آراسينا قورخو سالانلارين هاميسي قيلينجدان کچئرئلئب اؤلدورولموشدور.

24

عِيلام اورادادير و اونون چوخلو خالقي اؤز مزارلارينين اطرافيندا اوزانيب. اونلارين هاميسي قيلينجدان کچئرئلمئش، اؤلموش و ختنه‌سئز حالدا يِرئن درئنلئکلرئنه اِنمئشدئر. دئرئلر آراسينا قورخو سالميشديلار، ائندي آمّا خجالت ائچئنده قبئره اِنَنلره قوشولدولار.

25

عِيلام اوچون اؤلدورولَنلر آراسيندا بئر ياتاق حاضيرلاندي. اونون چوخلو خالقي مزارينين اطرافيندادير. اونلارين هاميسي ختنه‌سئز حالدا قيلينجدان کچئرئلئب اؤلدورولموشدور. دئرئلر آراسينا قورخو سالميشديلار، ائندي آمّا خجالت ائچئنده قبئره اِنَنلره قوشولوب اؤلدورولَنلرئن آراسينا قويولدولار.

26

مِشِک، توبال اورادادير و اونلارين چوخلو خالقي اؤز مزارلارينين اطرافيندا اوزانيب. اونلارين هاميسي ختنه‌سئز حالدا قيلينجدان کچئرئلئب اؤلدورولموشدور. دئرئلر آراسينا قورخو سالميشديلار.

27

اونلار دا دؤيوش سئلاحلاري ائله اؤلولر دئيارينا اِنَن، قيلينجلاري باشلارينين آلتينا قويولان، سوقوط اتمئش ختنه‌سئز ائگئدلرله بئرلئکده مزارا اوزاناجاقلار. اونلارين تقصئري اؤزلرئنئن اوستونه گلدي. صاغ ائکَن بو ائگئدلر دئرئلر آراسينا قورخو سالميشديلار.

28

سن ده، ای فئرعون، قيريلاجاقسان، قيلينجلا اؤلدورولَنلرله بئرلئکده ختنه‌سئزلرئن آراسيندا اوزاناجاقسان.

29

اِدوم، پادشاهلاري و بوتون رهبرلري اورادادير. گوجلو اولمالارينا باخماياراق، قيلينجلا اؤلدورولَنلرئن يانينا قويولدولار. قبئره اِنَنلرئن، ختنه‌سئزلرئن يانينا اوزانيرلار.

30

بوتون شئمال اؤلکه‌لرئنئن باشچيلاري، بوتون صئدونلولار اورادادير. گوجلري ائله قورخو سالديقلاري حالدا اؤلدورولَنلرله بئرلئکده روسوايچيليق ائچئنده يِرئن آلتينا اِندئلر. ختنه‌سئز حالدا قيلينجلا اؤلدورولَنلرله بئرلئکده خجالت ائچئنده قبئره اِنَنلرئن يانينا اوزانديلار.

31

«فئرعون و اونون بوتون قوشونو، قيلينجلا اؤلدورولموش بو بؤيوک جاماعاتي گؤرنده تسلّی تاپاجاق.» پروردئگار رب بله بويورور.

32

«دئرئلر آراسينا قورخو سالماسينا ائجازه وردئيئمه باخماياراق، فئرعون و اونون چوخلو خالقي قيلينجلا اؤلدورولَنلرله بئرلئکده ختنه‌سئزلرئن يانينا اوزاناجاق.» پروردئگار رب بله بويورور."

Azerbaijan Bible 2008
Southern Azeri translation. Copyright © 2008 Elam Ministries