Əhdi-Ətiq
Əhdi-Cədid
Azərbaycan Müqəddəs Kitab 2008
← 87

Zəbur 88

89 →
1

يارب، نئجاتيمين تاريسي، گجه-گوندوز سنه يالواريرام،

2

قوي دوعام سنئن حوضورونا يتئشسئن؛ فرياديما قولاق ور.

3

چونکي جانيم بلالارلا دولوب، حياتيم اؤلولر دئيارينا يتئشئب.

4

اؤلوم قويوسونا اِنَنلرله ساييليرام، قووّتي کسئلمئش بئر آدام کئمئيم،

5

اؤلولر آراسيندا ياددان چيخميش آداملار کئمي، قبئرده ياتان جسدلر کئمي، او آداملار کئمي کي، سن اونلاري آرتيق خاطيرلاميرسان، چونکي سنئن نظرئندن کسئلئبلر.

6

مني اؤلوم قويوسونون دئبئنه آتيبسان، قارانليقلارا، درئنلئکلره.

7

قضبئن منئم اوستومه آغير ياتير، بوتون شپه‌لرئني اوستومه اندئرئرسن. سِلا

8

تانيشلاريمي مندن اوزاقلاشديريبسان، مني اونلارا ائيرنج بئر شي ادئبسن. محبوسام و چيخا بئلمئرم؛

9

عذاب اوزوندن گؤزلرئمئن ائشيغي سؤنور، بوتون گون سني چاغيريرام، يارب، اللرئمي سنه اوزاديرام.

10

مگر مؤجوزه‌لرئني اؤلولره گؤرسده‌جکسن؟! مگر اؤلولر قالخيب سنه حمد اده‌جکلر؟! سِلا

11

مگر سنئن محبّتئن قبئرده، وفادارليغين دا هلاکت يرئنده اعلان اولونور؟!

12

مگر سنئن مؤجوزه‌لرئن قارانليقدا، صالحلئيئن اونوتما دئياريندا بئلئنئر؟!

13

لاکئن، يارب، من سني ائمدادا چاغيريرام، سحر واختي دوعام سنئن پئشوازينا چيخير.

14

يارب، نه اوچون مني اؤزوندن آتيرسان؟ نه اوچون اوزونو مندن گئزلدئرسن؟

15

ازئلمئش بئر آدامام، اوشاقليغيمدان اؤلوم حاليندايام، قورخولارينين آلتيندا قووّتدن دوشموشم، چاره‌سئزم.

16

قضبئن اوستومو باسيب؛ قورخولارين مني محو ادئر.

17

اطرافيمي بوتون گون سو کئمي آلير؛ هاميسي بئردن مني آرايا سالير.

18

سوگئلي و قونشونو مندن اوزاقلاشديريبسان؛ تانيشيم بئرجه قارانليقدير.

Azerbaijan Bible 2008
Southern Azeri translation. Copyright © 2008 Elam Ministries