Əhdi-Ətiq
Əhdi-Cədid
Azərbaycan Müqəddəs Kitab 2008
← 33

Zəbur 34

35 →
1

هر زامان ربّه ثنا اده‌جيم، اونون حمدي همئشه آغزيمدا اولاجاق.

2

جانيم ربّه حمد اوخوياجاق، قوي فاغير آدام اشئدئب سوئنسئن.

3

گلئن بئرلئکده ربّئن بؤيوکلويوندن دانيشاق، اونون آديني بئرلئکده اوجالداق.

4

ربّي آختارديم و منه جاواب وردي؛ مني بوتون قورخولاريمدان خئلاص اتدي.

5

اونا باخانلار شفقلندئلر؛ اونلارين اوزو خجالتلي اولمادي.

6

بو يازيق آدام اونو چاغيردي، رب اونون سسئني اشئتدي؛ رب اونو بوتون دارليقلاريندان نئجات وردي.

7

ربّئن مله‌يي اوندان قورخانلارين دؤوره‌سئنده اوردو قوروب اونلاري خئلاص ادر.

8

دادين و گؤرون رب نه ياخشي‌دير! خوش او آدامين حالينا کي، اونا پناه گتئرر.

9

سئز، اي اونون موقدّس آداملاري، ربدن قورخون، چونکي اوندان قورخانلار هچ بئر شيه مؤحتاج اولمازلار.

10

جاوان آصلانلار مؤحتاج اولوب آجليق چکرلر، لاکئن ربّه آرزو چکنلرئن هچ بئر نعمتي اسکئک اولماز.

11

گلئن اؤولادلاريم، منه قولاق آسين؛ ربّئن قورخوسونو سئزه اؤيرده‌رم.

12

حياتا آرزو چکن کئمدئر؟ شاد گونلر گؤرمک ائسته‌ين کئمدئر؟

13

دئلئني شرّدن و دوداقلاريني يالاندان ساخلا.

14

پئسلئکدن ال چک و ياخشيليق اله. صولحو آختار و اونون دالينا دوش.

15

ربّئن گؤزلري صالحلرئن اوستونده‌دئر، قولاقلاري اونلارين فريادلارينا آچيق‌دير.

16

ربّئن اوزو پئسلئک ادنلرئن ضئدّئنه‌دئر کي، ير اوزوندن اونلارين ذئکرئني ده کسسئن.

17

صالحلر ربّي چاغيرارلار، رب اونلارين فرياديني اشئدر؛ رب اونلاري بوتون دارليقلاريندان خئلاص ادر.

18

رب اوره‌يي سينميش آداملارا ياخين‌دير و روحو ازئلمئش آداملارا نئجات ورر.

19

صالح آدامين دردلري چوخدور، لاکئن رب اونو هاميسيندان قورتارار.

20

اونون هامي سوموکلرئني موحافئظت ادر؛ اونلاردان بئري ده سينماز.

21

پئسلئک پئس آداملاري محو ادر، صالح آدامدان نئفرت ادنلر محکوم اولارلار.

22

رب اؤز قوللارينين جانيني قورتارار، و اونا پناه گتئرنلرئن هچ بئري محکوم اولماز.

Azerbaijan Bible 2008
Southern Azeri translation. Copyright © 2008 Elam Ministries