Əhdi-Ətiq
Əhdi-Cədid
Azərbaycan Müqəddəs Kitab 2008
← 31

Yaradılış 32

33 →
1

يعقوب يولونا داوام وردی. تارينين ملکلري اونا راست گلدئلر.

2

يعقوب اونلاري گؤرنده ددي: "بو، تارينين اوردوگاهيدير." او يرئن آديني مَخه‌نايئم قويدو.

3

يعقوب اؤزوندن قاباق اِدوم چؤلونه، سِعئر تورپاغينا، قارداشي عئسونون يانينا قاصئدلر گؤندردي.

4

اونلارا بو امري وردی: "آغام عئسويا ديئن کي، قولون يعقوب بله ديئر: "من لابانين يانيندا قاليب ائندئيه قدر ياشاديم.

5

اؤکوزلرئم، اششَکلرئم، سورولرئم، قوللاريم و کنئزلرئم اولدو. من آغاما خبر ورمک اوچون يانينا قاصئدلر گؤندردئم کي، سنئن گؤزونده لوطف تاپيم."

6

قاصئدلر يعقوبون يانينا قاييديب ددئلر: "قارداشين عئسونون يانينا گتدئک. اؤزو ده سنئن پئشوازين اوچون گلئر و يانيندا دؤرد يوز نفر وار."

7

يعقوب چوخ قورخوب پرئشان اولدو. يانيندا اولان آداملاري، سورولري، مال-حيواني و دوه‌لري ائکي دسته‌يه آييريب ددی:

8

"اگر عئسو بئر دسته‌يه هوجوم ادئب اونلاري قيرسا، آرخادا قالان دسته قاچا بئلسئن."

9

سونرا يعقوب ددي: "ای آتام ائبراهئمئن تاريسي، آتام ائسحاقين تاريسي! يارب، سن منه دمئشدئن: "اؤز اؤلکه‌نه و قوحوملارينين يانينا قاييت. من سنه ياخشيليق اده‌جيم."

10

قولونا گؤرستدئيئن بوتون خيئرخاهليق و وفايا لايئق ديئلم؛ بو اوردون چاييني تَکجه دَيَنَکئمله کچدئم، و ائندي ائکي دسته کؤچوم وار.

11

يالواريرام، منی قارداشيم عئسونون اَلئندن قورتار. چونکي قورخورام گلئب منه و اوشاقلاريملا آنالارينا هوجوم اتسئن.

12

سن ددئن: "حؤکمن سنه ياخشيليق اده‌جيم، نسلئني ساييسيز-حسابسيز دهنز قومو قدر چوخالداجاغام."

13

يعقوب او گجه‌ني اورادا کچئرتدي. اؤزونده اولان هر شيدن قارداشي عئسويا هدئيّه اولاراق

14

ائکي يوز دئشي کچي، ائيئرمي اِرکَک کچي، ائکي يوز قويون، ائيئرمي قوچ،

15

بالالاري ائله بئرلئکده اوتوز دئشي دوه، قيرخ ائنَک، اون گاميش، ائيئرمي دئشي و اون اِرکَک اِششَک گؤتوردو.

16

سورولري آيري-آيري قوللارينا تاپشيردي و اونلارا ددي: "منئم قاباغيمدا گدئن و بئر سورو ائله او بئري سورو آراسيندا آرا ساخلايين."

17

يعقوب بئرئنجي قولا امر ادئب ددي: "قارداشيم عئسو سنه راست گلئب سوروشاندا کي، «کئمئن آداميسان، هارا گدئرسن، قاباغينداکي بو حيوانلار کئمئندئر؟»

18

اونا دِه: «بونلار قولون يعقوبوندور، بو دا آغام عئسويا گؤندرئلمئش هدئيّه‌دئر. اؤزو ده بئزئم داليميزجا گلئر.»"

19

سونرا يعقوب، ائکئنجي، اوچونجو قولونا و سورولرئن دالينجا گدن هر کسه همن امري وردی: "عئسويا راست گلنده همن شيلري دئيه‌جکسئنئز.

20

دئيه‌جکسئنئز: «قولون يعقوب دا داليميزجا گلئر.»" چونکي او، اؤز-اؤزونه ديئردي: "اوّلجه گؤندردئيئم هدئيّه‌ ائله اونو يومشالديب، سونرا اونونلا گؤروشه‌رم. بلکه اوندا منی قبول ادر."

21

هدئيّه‌لر يعقوبون قاباغيندا گتدي، آمّا او گجه‌ني اوتوراق اتدئيي يرده کچئرتدي.

22

يعقوب او گجه قالخيب ائکي آرواديني، ائکي کنئزئني و اون بئر اوشاغيني گؤتوروب يَبّوق چايينين داهاز يرئندن کچدي.

23

اونلاري گؤتوروب چايي کچئرتدي و وار-يوخونو دا کچئرتدي.

24

سونرا يعقوب تک قالدي. سحر آچيلانا قدر بئر آدام اونونلا گولَشدي.

25

يعقوبا قالئب گله‌بئلمه‌دئيئني گؤرنده، اونون بودونون اويناغينا ضربه ووردو. اله کي، او آداملا گولَشَرکن يعقوبون بودونداکي اويناغي ضربه‌لَندي.

26

او شخص ددي: "بوراخ، گدئم، چونکي سحر آچيلير." يعقوب ددي: "منه برکت ورمَيه‌سن، سني بوراخمارام."

27

او شخص سوروشدو: "آدين ندئر؟" يعقوب ددي: "يعقوب."

28

شخص ددي: "آرتيق سنه يعقوب يوخ، ائسرايئل ديئله‌جک، چونکي سن تاري و ائنسانلارلا گولَشئب قالئب گلدئن."

29

يعقوب سوروشدو: "خاهئش ادئرم، آديني دِه." او ددي: "آديمي نئيه سوروشورسان؟" او شخص اورادا يعقوبا برکت وردی.

30

يعقوب او يِرئن آديني پِنی‌اِل قويدو، چونکي ددي: "تاريني اوز-اوزه گؤردوم و سالامات قالديم."

31

يعقوب پِنی‌اِلي کچئرکن گونش دوغدو. او، بئر بودوندان آخساييردي.

32

اونا گؤره بو گونه قدر ده ائسرايئللی‌لر بود اويناغينين اوستونده‌کي وَطَري يمزلر. چونکي گولَشَن شخص يعقوبون بود اويناغينين وَطَرئنئه توخونموشدو.

Azerbaijan Bible 2008
Southern Azeri translation. Copyright © 2008 Elam Ministries