Əhdi-Ətiq
Əhdi-Cədid
Azerbaijan Bible 2008
← 30

Yaradılış 31

32 →
1

يعقوب لابانين اوغوللارينين بو سؤزلري ددئکلرئني اشئتدي: "يعقوب آتاميزا مخصوص اولان هر شيه صاحئب اولدو، بوتون بو وار-دؤولتي آتاميزين واريندان اَله گتئردي."

2

يعقوب لابانين اونا اولان رفتاريني گؤردو، باخ، او دا يعقوبلا اَوّلکي کئمي رفتار اتمئردي.

3

رب يعقوبا ددي: "آتالارينين اؤلکه‌سئنه، اؤز قوحوملارينين يانينا قاييت. من سنئنله اولاجاغام."

4

يعقوب خبر گؤندرئب راحئلي و لئيه‌ني چؤله، سوروسونو اوتارديغي يره چاغيردي.

5

يعقوب اونلارا ددي: "من آتانيزين رفتاريني گؤرورَم کي، منئمله اَوّلکي کئمي رفتار اتمئر. لاکئن آتامين تاريسي منئمله‌دئر.

6

سئز بئلئرسئنئز کي، بوتون وار گوجومله آتانيزا خئدمت اتمئشم.

7

آتانيز منی آلداتدي و حاقّيمي اون دفه ديئشدئردي، آمّا تاري اونو قويمادي کي، منه پئسلئک اتسئن.

8

او، «خاللي حيوانلار سنئن حاقّين اولاجاق» دئيَنده، بوتون سوروده خاللي حيوانلار دوغولدو. «آلابَزَک حيوانلار سنئن حاقّين اولاجاق» دئيَنده ده، بوتون سوروده آلابَزَک حيوانلار دوغولدو.

9

بلجه تاري آتانيزين سوروسونو آليب منه وردی.

10

سورونون جوتلَشدئيي واخت، يوخودا گؤزلرئمي آچيب گؤردوم کي، جوتلَشَن اِرکَک کِچئلر آلابَزَک، خاللي و لکه‌لی‌دئر.

11

يوخودا تارينين مله‌يي منه ددي: "يعقوب!" جاواب وردئم: "من بورادايام!"

12

او ددي: "ائندي باخ! گؤزلرئني قالديريب گؤر کي، جوتلَشَن بوتون اِرکَک کِچئلر آلابَزَک، خاللي و لَکه‌لي‌دئر، چونکي لابانين سنه اتدئيي هر شيي گؤردوم.

13

من بِيت‌ائلئن تاريسييام؛ اورادا کي بئر سوتون مسح اتدئن و منه نذئر اتدئن. ائندي قالخ و بو تورپاقدان گت و دوغولدوغون اؤلکه‌يه قاييت."

14

راحئل و لئيه اونا جاواب وردئلر: "مگر آتاميزين مولکونده بئر پاييميز يا مئراثيميز وار؟

15

مگر او بئزي اؤزگه حساب اتمئر؟ آخي او بئزي ساتيب، بئزئم اوچون ورئلمئش پولو دا خَرجلَدي.

16

بونا گؤره ده تارينين آتاميزدان آلديغي بوتون او وار-دؤولت، بئزئم و اوشاقلاريميزيندير. ائندي سن ده تارينين ددئيي شيلرئن هاميسينا عمل ات."

17

اوندا يعقوب قالخيب اوشاقلار و آروادلاريني دوه‌لره مئندئردي.

18

بوتون سوروسونو، قازانديغي بوتون وار-دؤولتئني، پَدّان‌اَرامدا اَله گتئردئيي اؤز سوروسونو سوردو کي، کَنَعان تورپاغينا، آتاسي ائسحاقين يانينا گتسئن.

19

لابان قويونلاريني قيرخماغا گدنده، راحئل آتاسينين اِو بوتلرئني اوغورلادي.

20

يعقوب قاچديغيني بئلدئرمه‌مکله اَراملي لاباني آلداتدي.

21

بلجه اؤزونه مخصوص اولان هر شيي گؤتوروب قاچدي. او، فرات چاييني کچئب، گئلعادين داغليق بؤلگه‌سئنه طرف گتدي.

22

يعقوبون قاچديغي لابانا اوچونجو گون بئلدئرئلدي.

23

او، قوحوملاريني اؤزو ائله گؤتوروب، يدّي گون اونو تعقئب اتدي و گئلعادين داغليق بؤلگه‌سئنده يعقوبا چاتدي.

24

تاري گجه يوخوسوندا اَراملي لابانا گؤرونوب ددي: "اؤزونو گؤزله، يعقوبا نه ياخشي، نه ده پئس سؤز دِه."

25

لابان يعقوبا چاتدي. يعقوب داغليق بؤلگه‌سئنده چادير قورموشدو. لابان قوحوملاري ائله بئرلئکده گئلعاد داغيندا چادير قوردو.

26

لابان يعقوبا ددي: "نئيه بله اتدئن؟ نئيه منی آلداتدين و قيزلاريمي موحارئبه اسئرلري کئمي آپاردين؟

27

نه اوچون گئزلئجه قاچيب منی آلداتدين؟ منه بونو بئلدئرمه‌دئن کي، سني سِوئنجله، ماهني اوخوماقلا، دف و طنبور چالماقلا يولا ساليم.

28

قويمادين کی، نوه‌لرئمله قيزلاريمي اؤپوم؛ آغيلسيزجاسينا رفتار ادئبسن.

29

سئزه پئسلئک اده بئلَردئم، لاکئن آتانيزين تاريسي دونَن گجه منه بله ددي: "اؤزونو گؤزله، يعقوبا نه ياخشي، نه ده پئس سؤز دِه."

30

ائندي آتانين اِوي اوچون چوخ داريخديغينا گؤره چيخيب گدئرسن. بس بوت آللاهلاريمي نئيه اوغورلاييب آپاريرسان؟"

31

يعقوب لابانا جاواب وردی: "قورخوب دوشوندوم کي، قيزلاريني زورلا مندن آلارسان.

32

آمّا بوت آللاهلاريني کئمئن يانيندا تاپاسان، او، صاغ قالماياجاق. قوحوملاريميزين قاباغيندا منئم اولان شيلرئن آراسيندا هانسي سنئندئر، گؤرسد و اؤزونه گؤتور." آنجاق يعقوب راحئلئن اونلاري اوغورلاديغيني بئلمئردي.

33

لابان يعقوبون، لئيه‌نئن و ائکي کنئزئن چاديرينا گئردي، آمّا بوت آللاهلاري تاپمادي. او، لئيه‌نئن چاديريندان چيخيب، راحئلئن چاديرينا گئردي.

34

راحئل اِو بوتلرئني گؤتورموشدو و دوه‌نئن يَهَرئنه قويوب اونلارين اوستونده اوتورموشدو. لابان بوتون چاديري گَزدي، آمّا اونلاري تاپمادي.

35

راحئل آتاسينا ددي: "حوضوروندا قالخا بئلمه‌دئيئم اوچون قوي آغام قضبلنمه‌سئن، چونکي آيباشي عادتئنده‌يم." لابان آختاردي، آمّا اِو بوتلرئني تاپمادي.

36

يعقوب قضبله‌نئب لابانلا موباحئثه اتدي. او، لابانا ددي: "گوناهيم و تقصئرئم ندئر کي، منی بله تعقئب ادئرسن؟

37

بوتون شيلرئمي گزدئن، بوتون اِو شيلرئندن نه تاپدين؟ تاپديغين شيي منئم قوحوملاريمين و اؤز قوحوملارينين قاباغينا قوي کي، ائکئمئزئن آراسيندا حؤکم اتسئنلر.

38

کچن ائيئرمي ائل سنئن يانيندا ائشله‌دئم، قويونلارين و کِچئلرئن هچ بالاسي دوشمه‌دي، سورولرئنده‌کي قوچلاريني يمه‌دئم.

39

وحشي حيوانلارين پارچالاديغي حيواني سنئن يانينا گتئرمزدئم، ضررئني اؤزوم چکَردئم. ائستر گوندوز، ائستر گجه اوغورلانان هر حيواني مندن طلب ادردئن.

40

گوندوزون ائستئسي، گجه‌نئن سويوغو منی اَلدن سالاردي، يوخوم گؤزومدن تؤکولردي.

41

بو ائيئرمي ائل سنئن اِوئنده قالميشديم: ائکي قيزين اوچون اون دؤرد ائل و سورون اوچون آلتي ائل سنه خئدمت اتدئم. آمّا سن اون دفه حاقّيمي ديئشدئردئن.

42

اگر آتامين و ائبراهئمئن تاريسي، ائسحاقين سئتايئش اتدئيي تاري منئمله اولماسايدي، ائندي يقئن منی اَلی‌بوش يولا سالاردين. تاري عذابيمي و اَلئمئن زحمتئني گؤردو، دونَن گجه سني توبيخ اتدي."

43

لابان يعقوبا بله جاواب وردی: "قيزلار منئم قيزلاريم، اوشاقلار منئم اوشاقلاريم، سورولر منئم سورولرئم و سنئن گؤردويون هر شي منئمدئر. بو گون قيزلاريما و يا اونلارين دوغدوغو اوشاقلارا نه اده بئله‌رم؟

44

ائندي گل بئربئرئمئز؛ من و سن عهد ادک کي، منئمله سنئن آراندا شاهئد اولسون."

45

يعقوب بئر داش گؤتوروب سوتون کئمي قويدو.

46

اورادا اؤز قوحوملارينا ددي: "داش ييغين." اونلار داشلاري گؤتوروب بئر قالاق دوزلتدئلر و او قالاغين يانيندا يمک يدئلر.

47

لابان اونون آديني يِگَر‌ساحه‌دوتا قويدو، لاکئن يعقوب اونون آديني قَلعِد قويدو.

48

لابان ددي: "بو قالاق بو گون منئمله سنئن آراندا شاهئددئر". بونا گؤره ده اونون آدي قالِددئر.

49

اونا هم ده مئصپا ديئلدي، چونکي لابان ددي: "بئربئرئمئزدن آيريلان زامان قوي رب سنئنله منئم آرامدا گؤزتچي اولسون.

50

اگر قيزلاريمي ائنجئده‌سن و يا اونلارين اوستونه آرواد آلاسان، بئل کي، بئزئم آراميزدا بئر نفر شاهئد اولماسا دا، تاري آراميزدا شاهئددئر."

51

لابان گئنه يعقوبا ددي: "باخ بو دا اؤز آراميزدا دوزلتدئيئم قالاق و سوتون!

52

بو قالاق و سوتون شاهئد اولسون کي، نه من سنئن طرفئنه-قالاغين او تايينا گده‌جيم، نه ده سن پئسلئک اتمک اوچون منئم طرفئمه-قالاغين و سوتونون بو تايينا گله‌جکسن.

53

قوي ائبراهئمئن، ناخورون و اونلارين آتاسينين تاريسي آراميزدا حؤکم اتسئن!" يعقوب آتاسي ائسحاقين سئتايئش اتدئيي تارييا آند ائچدي.

54

سونرا يعقوب او داغدا قوربان کسدي و قوحوملاريني يميه چاغيردي. اونلار يدئلر و داغدا گجه‌ني قالديلار.

55

لابان سحر تزدن قالخيب نوه‌لرئني و قيزلاريني اؤپدو، اونلارا برکت وردی. سونرا اؤز يرئنه گتدي.

Azerbaijan Bible 2008
Southern Azeri translation. Copyright © 2008 Elam Ministries